ڢَرِلَّاجِ لٜوِعٜنْ 26

بَرْکَاجِ طٛوْتَارٜ

(تٛوکْتَاکِ تَوْرٜىٰتَ 7‏:2‏-24؛ 28‏:1‏-14)

1جَوْمِرَاوٛ وِعِ‏: «تَا مبَطَنٜ کٛعٜ مٛنْ لَبِّ، تَا ندَرْنٜ سُورَاجِ شٜحَاطِ مَلَّ دَنغْرَنغٜ مَلَّ کَاعٜ بٜى سُورَاجِ دِيدَاطِ دٛوْ مُوطُمْعٜنْ ندٜرْ لٜسْدِ مٛوطٛنْ، نغَمْ عٛنْ شُجِدَنَ طُمْ؞ مِنْ وٛنِ جَوْمِرَاوٛ اَللَّه مٛنْ#غُرْتَاکِ 20‏:1؛ ڢَرِلَّاجِ لٜوِعٜنْ 19‏:4؛ تٛوکْتَاکِ تَوْرٜىٰتَ 5‏:8؛ 16‏:21‏-22؛ 27‏:1؞؞ 2کَکِّلَنٜ ࢩَلْطٜ شِوْتٛرْطٜ عَمْ، تٜدِّنٜ سُودُ عَمْ سٜنِيندُ بٛو؞ مِنْ وٛنِ جَوْمِرَاوٛ؞

3«تٛ عٛنْ تٛکَّکٜ ڢَرِلَّاجِ عَمْ، تٛ عٛنْ کَکِّلَنِ عُمْرٛوجٜ عَمْ، تٛ عٛنْ طٛوْتَنَکٜ طٜ، 4ندٜنْ کَمْ مِتٛࢡْنَنَنْ عٛنْ عِيٜىٰلٜ ندٜرْ سَاعِيجٜ مَاجٜ، حَا لٜسْدِ وَطَ ࢨَامْلٜ، لٜطّٜ ندٜرْ لَدّٜ بٛو ندِمَ ࢡِࢡّٜ؞ 5عَلْکَمَارِ مٛنْ طُوطَنْ مَسِنْ؞ حِدّٜکٛ عٛنْ تِمِّنَ ڢِيُغٛ ندِ، عٛنْ عِتَّنْ عِنَبٛوجٜ؞ دِغَ عٛنْ تِمِّنَايْ تٜࢡُغٛ عِنَبٛوجٜ تَوٛنْ، سَاعِ عَاوُغٛ يَالْتَنْ؞ عٛنْ ࢩَامَنْ، عٛنْ کَارَنْ، عٛنْ نجٛوطٛتٛ جَمْ ندٜرْ لٜسْدِ مٛنْ#تٛوکْتَاکِ تَوْرٜىٰتَ 11‏:13‏-15؞؞

6«مِحٛکَّنْ عٛنْ سَلَامَنْ ندٜرْ لٜسْدِ مٛنْ؞ عٛنْ مبَالٛتٛ جَمْ، وَلَا کُلْنَنْطٛ عٛنْ؞ مِنَتِّنَنْ دَبَّاجِ مبَرٛوجِ ندٜرْ لٜسْدِ، کٛنُ مٜىٰتَتَا لَاتَاغٛ ندٜرْ لٜسْدِ مٛنْ؞ 7عٛنْ ندِيوَنْ کٛنّٜعٜنْ مٛنْ، عٛنْ مبَرَنْ ࢡٜ بٜى کَاڢَاجٜ مٛنْ؞ 8نجٛوٛ مٛوطٛنْ ندِيوَنْ تٜىٰمٜرّٜ، تٜىٰمٜرّٜ مٛنْ بٛو ندِيوَنْ عُجِنٜ سَݠّٛ، عٛنْ مبَرَنْ کٛنّٜعٜنْ مٛنْ بٜى کَاڢَاجٜ؞ 9مِبَرْکِطِنَنْ عٛنْ بٜى ࢡِکّٛيْ طُوطْکٛيْ، مِتَبِتِنَنْ عَلْکَوَلْ عَمْ بٜى مٛوطٛنْ؞ 10دِغَ عٛنْ تِمِّنَايْ عَلْکَمَارِ رٛوَنِيرِ تَوٛنْ، عٛنْ شٛدَنْ حِکَّارِ؞ دٛولٜ عٛنْ نغُدِنَ رٛوَنِيرِ، حَا کٜࢡٛنْ بَبَلْ وَلِّنْغٛ کٜسْرِ؞ 11مِجٛوطٛتٛ شَکَ مٛوطٛنْ ندٜرْ جٛوطٛرْدٜ عَمْ، مِمٜىٰطَتَا وَࢩُغٛ عٛنْ؞ 12مِوٛنْدَنْ بٜى مٛوطٛنْ، مِلَاتٛتٛ اَللَّه مٛنْ، عٛنٛنْ بٛو عٛنْ لَاتٛتٛ عُمَّاتٛورٜ عَمْ؞#2 کٛرِنْتُعٜنْ 6‏:16؞ 13مِنْ جَوْمِرَاوٛ اَللَّه مٛنْ مِوُرْتِنِ عٛنْ لٜسْدِ مِصْرَ، نغَمْ تَا عٛنْ تٛکّٛ حُووَنْغٛ ࢡٜ بَنَ مَشُّࢡٜ؞ مِيٜوِ کَࢡِّرْغَلْ دٛوْ دَاطٜ مٛنْ، حَا عٛنْ نجَحَ عٛنْ رِمْࢡٜ، عٛنْ ࢡَنغْتَ کٛعٜ مٛنْ؞»

کِيتَ دٛوْ لُوتَنْࢡٜ عُمْرٛوجٜ

(تٛوکْتَاکِ تَوْرٜىٰتَ 28‏:15‏-68)

14جَوْمِرَاوٛ ࢡٜسْدِ وِعُغٛ‏: «عَمَّا تٛ عٛنْ طٛوْتَنَاکِ يَمْ، تٛ عٛنْ تٛکَّاکِ عُمْرٛوجٜ طٜعٜ ڢُو، 15تٛ عٛنْ نغُدِنِ ڢَرِلَّاجِ عَمْ، تٛ عٛنْ نغَࢩِ کِيتَاجِ عَمْ، تٛ عٛنْ طٛوْتَنَاکِ عُمْرٛوجٜ عَمْ ڢُو، تٛ عٛنْ ݠِيسْتِ عَلْکَوَلْ عَمْ، 16ندٜنْ کَمْ مِحِيتٛتٛ عٛنْ؞ مِعُکَّنَنْ عٛنْ کُلْتٛرٜىٰنغٛلْ، مِࢩَوْنَنْ عٛنْ ࢩَوُجِ شِيࢡَنْطِ عٛنْ عٜ جٛنْتٜ، حَا غِتٜ مٛنْ تَمْݠَ، تُمْ سٜمْبٜ مٛنْ عُسْتَنْ؞ عٛنْ عَاوَنْ غٜسٜ مٛنْ، عَمَّا عٛنْ نَڢْتٛرْتَا طٜ، نغَمْ کٛنّٜعٜنْ مٛنْ نجَࢡْتَنْ ࢨَامْلٜ مٛنْ؞ 17مِحٛنَنْ عٛنْ، حَا کٛنّٜعٜنْ مٛنْ نجَالٛ عٛنْ، وَࢩْࢡٜ عٛنْ لَامَنٛ عٛنْ؞ عٛنْ ندٛغَّنْ نغَمْ کُلٛلْ، کٛو تٛ دِيوَنْطٛ عٛنْ وَلَا؞

18«تٛ عٛنْ طٛوْتَنَاکِ يَمْ ࢡَاوٛ کُوجٜ طٜعٜ ڢُو، ندٜنْ کَمْ مِطُطِّنَنْ کِيتَاجِ دٛوْ حَکّٜىٰجِ مٛوطٛنْ شٛوِ جٛوٜىٰطِطِ؞ 19مِعِتَّنْ بَاوْطٜ طٜ عٛنْ مَنغْتٛرْتٛ؞ مِحَطَنْ عَسَمَ تٛࢡْنُغٛ عِيٜىٰندٜ؞ لٜسْدِ مٛنْ يٛورَنْ، سَاتَنْ بَنَ نجَمْندِ مبٛطٜىٰرِ؞ 20عٛنْ تٛرّٛتٛ مٜىٰرٜ، نغَمْ لٜسْدِ مٛنْ ࢨَامْنَتَا، لٜطّٜ بٛو ندِمَتَا ࢡِࢡّٜ؞

21«تٛ عٛنْ تٛکَّکٜ تُورْتَنْغٛ يَمْ، تٛ عٛنْ شَلَکٜ طٛوْتَنَاغٛ يَمْ، ندٜنْ کَمْ مِطُطِّنَنْ کِيتَاجِ دٛوْ حَکّٜىٰجِ مٛوطٛنْ شٛوِ جٛوٜىٰطِطِ ڢَحِنْ؞ 22مِنٜلْدَنْ دَبَّاجِ لَدّٜ شَکَ مٛوطٛنْ، طِ مبَرَ ࢡِکّٛيْ مٛنْ، طِ نَتِّنَ دَبَّاجِ مٛنْ، طِ عُسْتَ عٛنْ، طِ ݠٜرْوِنَ لَابِ مٛنْ؞

23«تٛ عٛنْ تٛکَّکٜ تُورْتَنْغٛ يَمْ، تٛ عٛنْ نجَࢡَايْ عٜلْتٛ تَوٛنْ، 24ندٜنْ کَمْ مِحٛنَنْ عٛنْ، مِࢡٜسْدَنْ سَاتِنغٛ کِيتَاجِ دٛوْ حَکّٜىٰجِ مٛنْ شٛوِ جٛوٜىٰطِطِ؞ 25مِعُکَّنْ کَاڢَحِ دٛوْ مٛوطٛنْ، مِوَاتٛتٛ عٛنْ نغَمْ عٛنْ ݠِيسْتِ عَلْکَوَلْ بٜى عَمْ؞ تٛ عٛنْ طَࢡِّتِ حِسْرُدٜ ندٜرْ بٜرْنِيجِ مٛنْ، مِࢩَوْنَنْ عٛنْ ࢩَوُ کَلُّنغُ ندَاࢡٛووُ، مِحٛکَّنْ عٛنْ حَا جُوطٜ کٛنّٜعٜنْ مٛنْ؞ 26مِسٛويْنَنْ عٛنْ ࢩَامْدُ؞ تَمْسِرْدٜ وٛورٜ حٜعَنْ رٜوْࢡٜ سَݠّٛ سَعُغٛ تَمْسٜىٰجٜ مُوطُمْعٜنْ؞ ࢡٜݠٛونْدَنَنْ عٛنْ طٜ دٛوْ عَوْنٛرْطُمْ؞ عٛنْ ࢩَامَنْ طٜ، عَمَّا عٛنْ کَارَتَا سَمْ؞

27«تٛ عٛنْ تٛکَّکٜ تُورْتَنْغٛ يَمْ ࢡَاوٛ کِيتَاجِ طِعِ ڢُو، تٛ عٛنْ شَلَکٜ طٛوْتَنَاغٛ يَمْ، 28ندٜنْ کَمْ مِحٛنَنْ عٛنْ بٜى تِکّٜرٜ، مِتُلِّتِنَنْ کِيتَاجِ دٛوْ حَکّٜىٰجِ مٛنْ شٛوِ جٛوٜىٰطِطِ ڢَحِنْ؞ 29عٛنْ ࢩَامَنْ کُسٜلْ ࢡِکّٛيْ مٛنْ نغَمْ دَلِيلَ وٜىٰلٛ؞ 30مِنَتِّنَنْ نٛکُّوجٜ مٛنْ تٛوْطٜ، مِيِبِّنَنْ غُلْدُطٜ عُورٜتٜىٰطُمْ، مِسَکِّنَنْ ࢩَوْمَنْطٜ مٛنْ دٛوْ لَبِّ مٛنْ ݠٜعَّاطِ؞ مِوَࢩَنْ عٛنْ، 31حَا مِلَاتِنَ بٜرْنِيجِ مٛنْ بِلّٜ؞ مِيِبِّنَنْ شُوطِ مٛنْ شٜنَاطِ، مِجَࢡَتَا عُورٜىٰنغٛلْ کِرْسٜتٜىٰطِ مٛنْ؞ 32مِلَاتِنَنْ لٜسْدِ مٛنْ لَدّٜ مٜىٰرٜ، حَا کٛنّٜعٜنْ مٛنْ وَرَنْࢡٜ تٛنْ کَيْطِنَ؞ 33مِسَنغْکِتَنْ عٛنْ ندٜرْ عُمَّاتٛوجٜ غٛطّٜ، مِڢَرْتَنْ عٛنْ بٜى کَاڢَحِ لٛسَاکِ؞ لٜسْدِ مٛنْ لَاتٛتٛ لَدّٜ مٜىٰرٜ، بٜرْنِيجِ مٛنْ لَاتٛتٛ بِلّٜ؞ 34‏-35ندٜنْ کَمْ لٜسْدِ سٜيٛرْتٛ کِتَالٜ شِوْتٛرْطٜ طٜ شَلِيطٛنْ حٛکُّغٛ ندِ؞ ندِ ڢٜرْوَنْ، ندِ سِوْتٛتٛ، سَاعِ عٛنْ طٛنْ ݠَࢡَّ ندٜرْ لٜسْطٜ کٛنّٜعٜنْ مٛنْ؞

36«لُتَّنْࢡٜ مٛنْ ندٜرْ لٜسْطٜ کٛنّٜعٜنْ مٛنْ، مِوَطَنْ کُلٛلْ مَنغٛلْ ندٜرْ ࢡٜرْطٜ مَࢡّٜ؞ کٛو سٛࢩٛ حَاکٛ يٛورْکٛ ندٜرْ حٜنْدُ دٛغِّنَنْ ࢡٜ؞ ࢡٜندٛغَّنْ بَنَ تٛ کَاڢَحِ تٛکَّکٜ ࢡٜ، ࢡٜندٛعّٛتٛ کٛو تٛ دِيوَنْطٛ ࢡٜوَلَا؞ 37غٛطّٛ دٛعّٛتٛ دٛوْ غٛطّٛ بَنَ دٛعّٛتٛوࢡٜ يٜىٰسٛ کَاڢَحِ، کٛو تٛ دِيوَنْطٛ ࢡٜوَلَا؞ سَاعِ مَنْ عٛنْ مبَاوَتَا دَرْتَاغٛ يٜىٰسٛ کٛنّٜعٜنْ مٛنْ؞ 38عٛنْ کَلْکَنْ شَکَ عُمَّاتٛوجٜ، لٜسْدِ کٛنّٜعٜنْ مٛنْ مٛطَنْ عٛنْ؞ 39لُتَّنْࢡٜ مٛنْ ندٜرْ لٜسْطٜ کٛنّٜعٜنْ مٛنْ نجِنَّنْ نغَمْ دَلِيلَ عَيْبٜىٰجِ مَࢡّٜ عٜ عَيْبٜىٰجِ کَاکِرَاࢡٜ مَࢡّٜ؞

40«ندٜنْ ࢡٜمبَنغِنَنْ عَيْبٜ مَࢡّٜ عٜ عَيْبٜ کَاکِرَاࢡٜ مَࢡّٜ يٜىٰسٛ عَمْ، نغَمْ ࢡٜنغٜوِ عُمْرٛورٜ عَمْ، ࢡٜتُورْتَنِ يَمْ؞ 41دَلِيلَ مَنْ مِحٛنِ ࢡٜ، مِدَحِ ࢡٜ ندٜرْ لٜسْطٜ کٛنّٜعٜنْ مَࢡّٜ؞ ندٜنْ ࢡٜعَنْدِتَنْ سٛويْندٜ طٛوْتَارٜ مَࢡّٜ، ࢡٜلٜىٰسْتِنَنْ کٛعٜ مَࢡّٜ، ࢡٜنجَࢡَنْ کِيتَ دٛوْ عَيْبٜ مَࢡّٜ؞ 42سَاعِ مَنْ مِسِڢْتٛرَنْ عَلْکَوَلْ عَمْ بٜى يَعْقُوبُ عٜ إِسْحَاقَ عٜ إِبْرَاهِيمَ، مِسِڢْتٛرَنْ لٜسْدِ بٛو#لَاتَانٛوجِ 17‏:7‏-8؛ 26‏:3‏-4؛ 28‏:13‏-14؞؞ 43عَمَّا سٜيْ لٜسْدِ سٛويَ يِمْࢡٜ تَوٛنْ، نغَمْ ندِ سٜيٛرٛ سِوْتَارٜ مَارِ وَکَّتِ ࢡٜطٛنْ ندَايِ بٜى مَارِ؞ کَمْࢡٜ بٛو، سٜيْ ࢡٜنجٛࢡَ عَيْبٜ مَࢡّٜ تَوٛنْ، نغَمْ ࢡٜنجَوِ کِيتَاجِ عَمْ، ࢡٜنغَࢩِ ڢَرِلَّاجِ عَمْ؞ 44عَمَّا کٛو تٛ ࢡٜطٛنْ ندٜرْ لٜسْطٜ کٛنّٜعٜنْ مَࢡّٜ، مِوُدِنْتَا ࢡٜ، مِوَࢩَتَا ࢡٜ؞ مِنَتِّنْتَا ࢡٜ، مِڢِيسْتَتَا عَلْکَوَلْ عَمْ بٜى مَࢡّٜ، نغَمْ مِنْ وٛنِ جَوْمِرَاوٛ اَللَّه مَࢡّٜ؞ 45مِيٜجِّتِتَّا عَلْکَوَلْ عَمْ بٜى کَاکِرَاࢡٜ مَࢡّٜ ࢡٜ نغُرْتِنْمِ لٜسْدِ مِصْرَ يٜىٰسٛ عُمَّاتٛوجٜ، حَا مِلَاتٛ اَللَّه مَࢡّٜ؞ مِنْ وٛنِ جَوْمِرَاوٛ؞»

46کَنْجُمْ وٛنِ ڢَرِلَّاجِ عٜ کِيتَاجِ عٜ عُمْرٛوجٜ طُمْ جَوْمِرَاوٛ تَبِتِنِ حَکُّندٜ مُوطُمْ بٜى إِسْرَاءِيلَعٜنْ دٛوْ حٛوسٜىٰرٜ سِنَ بٜى حُنْدُکٛ مُوسَى؞

Currently Selected:

ڢَرِلَّاجِ لٜوِعٜنْ 26: داَ

Highlight

Copy