ڢَرِلَّاجِ لٜوِعٜنْ 13
13
عُمْرٛوجٜ دٛوْ کُودُوجٜ
1جَوْمِرَاوٛ وِعِ مُوسَى عٜ هَـٰرُونَ: 2«تٛ غٛطّٛ وٛودِ ࢡُودِ مَلَّ ڢُوڢْرٜ مَلَّ عِرِنْ ڢَارْدٜ ڢٜىٰرٜ حَا ࢡَنْدُ مُمْ، تٛ وَرْتِ طُمْ سَطَوْرٜ کٛو ندٜيٜىٰرٜ، سٜيْ ࢡٜنغَدَّ مٛ يٜىٰسٛ هَـٰرُونَ، لِمَنْجٛ مَلَّ يٜىٰسٛ غٛطّٛ دَࢩْغٛلْ هَـٰرُونَ؞ 3لِمَنْجٛ لَارَ حُودُورٜ لَرَلْ مَنْ؞ تٛ سُوڢُوٛلْ ندٜرْ حُودُورٜ لَاتَکٜ دَنٜىٰوٛلْ، حُودُورٜ بٛو ࢡُرِ لُغُّغٛ دٛوْ لَرَلْ تَارِينغَلْ ندٜ، ندٜنْ کَمْ طُمْ سَطَوْرٜ ڢَکَتْ؞ لِمَنْجٛ لَارَنْ ࢩَوْطٛ عٛو، سٜىٰدٛتٛ عٛ شٛࢡْطٛ؞ 4عَمَّا تٛ عِرِنْ ڢَارْدٜ حَا ࢡَنْدُ مَاکٛ رَنْوِ، ࢡُرَايْ لُغُّغٛ دٛوْ لَرَلْ تَارِينغَلْ ندٜ، سُوڢُوٛلْ بٛو رَنْوَايْ، ندٜنْ کَمْ لِمَنْجٛ سٜنْدَ مٛ بٜى يِمْࢡٜ ࢩَلْطٜ جٛوٜىٰطِطِ؞ 5ࢩَنْدٜ جٛوٜىٰطِطَوْرٜ لِمَنْجٛ لَارَ مٛ ڢَحِنْ؞ تٛ عٛيِعَايْ حُودُورٜ ࢡٜسْدَکٜ، ندٜ وَعِ بَنَ نَانٜ، سٜيْ عٛسٜنْدَ مٛ بٜى يِمْࢡٜ ࢩَلْطٜ جٛوٜىٰطِطِ ڢَحِنْ؞ 6ࢩَنْدٜ جٛوٜىٰطِطَوْرٜ لِمَنْجٛ لَارَ مٛ ڢَحِنْ؞ تٛ عٛيِعِ حُودُورٜ عُسْتَکٜ، يَاجَايْ حَا لَرَلْ، سٜيْ عٛسٜىٰدٛ غٛطّٛ مَنْ عٛ لَاࢡْطٛ، طُمْ ڢُوڢْرٜ مٜىٰرٜ نٛنْ؞ سٜيْ غٛطّٛ مَنْ لٛوتَ لِمْشٜ مُمْ نغَمْ عٛلَاࢡَ؞ 7عَمَّا تٛ ڢُوڢْرٜ ࢡٜسْدَکٜ حَا لَرَلْ مَاکٛ، ࢡَاوٛ لِمَنْجٛ سٜىٰدِمٛ عٛ لَاࢡْطٛ، سٜيْ عٛوَنغَ يٜىٰسٛ لِمَنْجٛ کَدِبٛو؞ 8لِمَنْجٛ لَارَ مٛ ڢَحِنْ؞ تٛ ڢُوڢْرٜ ࢡٜسْدَکٜ حَا لَرَلْ مَاکٛ ڢَکَتْ، لِمَنْجٛ سٜىٰدٛتٛ مٛ عٛ شٛࢡْطٛ، نغَمْ طُمْ سَطَوْرٜ ڢَکَتْ؞
9«تٛ سَطَوْرٜ کٛو ندٜيٜىٰرٜ نَنغِ ࢡَنْدُ غٛطّٛ، سٜيْ ࢡٜنغَدَّ مٛ يٜىٰسٛ لِمَنْجٛ؞ 10لِمَنْجٛ لَارَ مٛ؞ تٛ عٛوٛودِ ࢡُودِ ندِ رَنْوِنِ لَرَلْ عٜ سُوڢُوٛلْ مَارِ، ندِ لَاتَکٜ حُودُورٜ حَلُّندٜ، 11ندٜنْ کَمْ طُمْ سَطَوْرٜ دُورْندٜ؞ لِمَنْجٛ سٜىٰدٛ مٛ عٛ شٛࢡْطٛ؞ وَلَا حَاجٜ عٛسٜنْدَ مٛ بٜى يِمْࢡٜ نغَمْ لِࢩُغٛ حَالَ ࢩَوُ مَنْ، نغَمْ شٛࢡْکِ مَاکٛ وَنغِ؞ 12تٛ سَطَوْرٜ مَنْ ࢡٜسْدَکٜ، ڢِيلْتِ ࢡَنْدُ غٛطّٛ ڢُو، 13ندٜنْ کَمْ لِمَنْجٛ لَارَ مٛ؞ تٛ لِمَنْجٛ يِعِ ندٜ ڢِيلْتِ ࢡَنْدُ مَاکٛ ڢُو، سٜيْ عٛسٜىٰدٛ مٛ عٛ لَاࢡْطٛ؞ ࢡَنْدُ مَاکٛ ڢُو ندُ رَنٜىٰرُ، نغَمْ مَاجُمْ عٛ لَاࢡْطٛ؞ 14عَمَّا تٛ حُودُورٜ ڢٜتِّ حَا مَاکٛ، ندٜنْ کَمْ عٛ شٛࢡْطٛ؞ 15لِمَنْجٛ لَارَ مٛ ڢَحِنْ؞ تٛ عٛيِعِ حُودُورٜ ڢٜتِّ حَا مَاکٛ، سٜيْ عٛسٜىٰدٛ مٛ عٛ شٛࢡْطٛ؞ حُودُورٜ بَنَ ندٜعٜ وٛنِ عَلَامَ سَطَوْرٜ، نغَمْ مَاجُمْ عٛ شٛࢡْطٛ؞ 16عَمَّا تٛ حُودُورٜ مَنْ يَمْطِتَکٜ، لَاتِ رَنٜىٰرٜ، سٜيْ عٛيَحَ حَا لِمَنْجٛ؞ 17لِمَنْجٛ لَارَ مٛ ڢَحِنْ؞ تٛ حُودُورٜ مَاکٛ رَنْوِ، لِمَنْجٛ سٜىٰدٛتٛ مٛ عٛ لَاࢡْطٛ؞
18«تٛ غٛطّٛ وٛودِ حُودُورٜ حَلُّندٜ حَا ࢡَنْدُ مُمْ، ندٜ يَمْطِتِ، 19عَمَّا حَا نٛکُّورٜ مَارٜ ࢡُودِ ندَنٜىٰرِ مَلَّ عِرِنْ ڢَارْدٜ#13:19 ڢَارْدٜ طُمْ عَلَامَ ڢُطَّمْ سَطَوْرٜ؞ رَنٜىٰرٜ بَنَ وٛطٜىٰرٜ سٜطَّ سٜطَّ وَطِ، سٜيْ عٛيَحَ حَا لِمَنْجٛ؞ 20لِمَنْجٛ لَارَ مٛ؞ تٛ عِرِنْ ڢَارْدٜ مَنْ ࢡُرِ لُغُّغٛ دٛوْ لَرَلْ تَارِينغَلْ ندٜ، سُوڢُوٛلْ دٛوْ مَارٜ لَاتَکٜ دَنٜىٰوٛلْ بٛو، ندٜنْ کَمْ لِمَنْجٛ سٜىٰدٛتٛ مٛ عٛ شٛࢡْطٛ؞ طُمْ سَطَوْرٜ ڢُطِّ ندٜرْ حُودُورٜ حَلُّندٜ مَنْ؞ 21عَمَّا تٛ لِمَنْجٛ لَارِمٛ، سُوڢُوٛلْ دٛوْ عِرِنْ ڢَارْدٜ مَنْ رَنْوَايْ، ندٜ ࢡُرَايْ لُغُّغٛ دٛوْ لَرَلْ تَارِينغَلْ ندٜ، ندٜ ڢُرْطِ بٛو، سٜيْ لِمَنْجٛ سٜنْدَ مٛ بٜى يِمْࢡٜ ࢩَلْطٜ جٛوٜىٰطِطِ؞ 22تٛ ندٜ ࢡٜسْدَکٜ حَا لَرَلْ، لِمَنْجٛ سٜىٰدٛتٛ مٛ عٛ شٛࢡْطٛ، طُمْ سَطَوْرٜ ڢَکَتْ؞ 23عَمَّا تٛ ندٜ وَيْلَاکِ، ࢡٜسْدَايْ مَوْنُغٛ، ندٜنْ کَمْ طُمْ ࢡَتَّرّٜ ڢٜىٰرٜ تَنْ، لِمَنْجٛ سٜىٰدٛ مٛ عٛ لَاࢡْطٛ؞
24«تٛ غٛطّٛ وٛودِ وُلَنْدٜ يِيتٜ حَا ࢡَنْدُ مُمْ، ࢡَتَّرّٜ مَنْ رَنْوِ بَنَ وٛوجَنْ سٜطَّ سٜطَّ، 25سٜيْ لِمَنْجٛ لَارَ مٛ؞ تٛ سُوڢُوٛلْ دٛوْ مَارٜ لَاتَکٜ دَنٜىٰوٛلْ، ندٜ ࢡُرِ لُغُّغٛ دٛوْ لَرَلْ تَارِينغَلْ ندٜ بٛو، ندٜنْ کَمْ طُمْ سَطَوْرٜ ڢُطِّ ندٜرْ وُلَنْدٜ مَنْ؞ سٜيْ لِمَنْجٛ سٜىٰدٛ مٛ عٛ شٛࢡْطٛ؞ 26عَمَّا تٛ سُوڢُوٛلْ دٛوْ ࢡَتَّرّٜ مَنْ رَنْوَايْ، ندٜ ࢡُرَايْ لُغُّغٛ دٛوْ لَرَلْ تَارِينغَلْ ندٜ، ندٜ ڢُرْطِ بٛو، سٜيْ لِمَنْجٛ سٜنْدَ مٛ بٜى يِمْࢡٜ ࢩَلْطٜ جٛوٜىٰطِطِ؞ 27ࢩَنْدٜ جٛوٜىٰطِطَوْرٜ لِمَنْجٛ لَارَ مٛ ڢَحِنْ؞ تٛ ࢡَتَّرّٜ ࢡٜسْدِ يَاجُغٛ، ندٜنْ کَمْ طُمْ سَطَوْرٜ، لِمَنْجٛ سٜىٰدٛ مٛ عٛ شٛࢡْطٛ؞ 28عَمَّا تٛ ࢡَتَّرّٜ غٛ وَيْلَاکِ، ࢡٜسْدَايْ مَوْنُغٛ، ڢُرْطِ بٛو، ندٜنْ کَمْ طُمْ ࢡُودِ مٜىٰرٜ؞ لِمَنْجٛ سٜىٰدٛتٛ مٛ عٛ لَاࢡْطٛ، نغَمْ طُمْ ࢡَتَّرّٜ يِيتٜ تَنْ؞
29«تٛ غٛرْکٛ مَلَّ دٜبّٛ وٛودِ حُودُورٜ حَا لَرَلْ حٛورٜ مَلَّ وَکُّدٜ، 30سٜيْ لِمَنْجٛ لَارَ حُودُورٜ مَنْ؞ تٛ ندٜ ࢡُرِ لُغُّغٛ دٛوْ لَرَلْ تَارِينغَلْ ندٜ، سُوڢُوٛلْ دٛوْ مَارٜ بٛو عٛولْطِ، طِغِّ، ندٜنْ کَمْ طُمْ مٜتٜمٜتٜلْدٜ حَا لَرَلْ حٛورٜ مَلَّ حَا وَکُّدٜ؞ لِمَنْجٛ سٜىٰدٛتٛ مٛ عٛ شٛࢡْطٛ؞ 31تٛ لِمَنْجٛ لَارِ حُودُورٜ مَنْ، ندٜ ࢡُرَايْ لُغُّغٛ دٛوْ لَرَلْ تَارِينغَلْ ندٜ، عَمَّا غَاسَ ࢡَلٜىٰحَ وَلَا دٛوْ مَارٜ، سٜيْ لِمَنْجٛ سٜنْدَ مَرْطٛ مٜتٜمٜتٜلْدٜ عٛو بٜى يِمْࢡٜ ࢩَلْطٜ جٛوٜىٰطِطِ؞ 32ࢩَنْدٜ جٛوٜىٰطِطَوْرٜ لِمَنْجٛ لَارَ ندٜ ڢَحِنْ؞ تٛ مٜتٜمٜتٜلْدٜ مَنْ ࢡٜسْدَايْ يَاجُغٛ، سُوڢُوٛلْ عٛولٛلْ وَلَا دٛوْ مَارٜ، ندٜ ࢡُرَايْ لُغُّغٛ دٛوْ لَرَلْ تَارِينغَلْ ندٜ بٛو، 33سٜيْ عٛلَࢡَ حٛورٜ مَاکٛ، عَمَّا عٛعَشَّ ݠٜلّٜلْ مٜتٜمٜتٜلْدٜ مَنْ؞ لِمَنْجٛ سٜنْدَ مٛ بٜى يِمْࢡٜ ࢩَلْطٜ جٛوٜىٰطِطِ ڢَحِنْ؞ 34ࢩَنْدٜ جٛوٜىٰطِطَوْرٜ لِمَنْجٛ لَارَ مٛ ڢَحِنْ؞ تٛ ݠٜلّٜلْ نغٜلْ ࢡٜسْدَايْ يَاجُغٛ، ࢡٜسْدَايْ لُغُّغٛ دٛوْ لَرَلْ تَارِينغَلْ نغٜلْ، لِمَنْجٛ سٜىٰدٛتٛ مٛ عٛ لَاࢡْطٛ؞ سٜيْ عٛلٛوتَ لِمْشٜ مَاکٛ نغَمْ عٛلَاࢡَ؞ 35عَمَّا تٛ مٜتٜمٜتٜلْدٜ ندٜعٜ ࢡٜسْدِ يَاجُغٛ دٛوْ لَرَلْ ࢡَاوٛ لِمَنْجٛ سٜىٰدِمٛ عٛ لَاࢡْطٛ، 36سٜيْ لِمَنْجٛ لَارَ مٛ ڢَحِنْ؞ تٛ عٛيِعِ ندٜ ࢡٜسْدَکٜ حَا لَرَلْ، وَلَا حَاجٜ عٛطَࢡِّتَ عٛولْطُغٛ غَاسَ: عٛ شٛࢡْطٛ؞ 37عَمَّا تٛ مٜتٜمٜتٜلْدٜ مَنْ ࢡٜسْدَايْ، غَاسَ ࢡَلٜىٰحَ مَوْنِ دٛوْ مَارٜ بٛو، ندٜنْ کَمْ ندٜ يَمْطِتِ؞ غٛطّٛ غٛ عٛ لَاࢡْطٛ، لِمَنْجٛ بٛو سٜىٰدٛتٛ مٛ عٛ لَاࢡْطٛ؞
38«تٛ غٛرْکٛ مَلَّ دٜبّٛ وٛودِ عِرِنْ ڢَارْدٜ رَنٜىٰرٜ حَا ࢡَنْدُ مُمْ، 39سٜيْ لِمَنْجٛ لَارَ مٛ؞ تٛ عٛيِعِ ندٜ رَنْوَايْ تَلْ، ندٜنْ کَمْ طُمْ ڢُوڢْرٜ مٜىٰرٜ حَا لَرَلْ غٛطّٛ مَنْ، عٛ لَاࢡْطٛ؞
40-41«تٛ غَاسَ عِتَّکٜ حَا حٛࢡُّدُ غٛطّٛ مَلَّ حَا تِيندٜ مَاکٛ، طُمْ سٛࢡْنَتَا مٛ؞ 42عَمَّا تٛ حَا ڢٜلّٜرٜ مَنْ حُودُورٜ رَنٜىٰرٜ بَنَ وٛوجَنْ سٜطَّ سٜطَّ وَنغِ حَا تٛنْ، ندٜنْ کَمْ طُمْ سَطَوْرٜ؞ 43لِمَنْجٛ لَارَ مٛ؞ تٛ حَا حُودُورٜ مَنْ ࢡُودِ ندَنٜىٰرِ بَنَ بٛطٜىٰجُمْ سٜطَّ سٜطَّ وَطِ تٛنْ، نَنْدُندٜ سَطَوْرٜ، 44سٜيْ لِمَنْجٛ سٜىٰدٛ مٛ عٛ شٛࢡْطٛ، نغَمْ دَلِيلَ سَطَوْرٜ حَا حٛورٜ مَاکٛ؞
45«غٛطّٛ مٛ سَطَوْرٜ کٛو ندٜيٜىٰرٜ وَطِ طُمْ، ࢡٛرْنٛ لِمْشٜ شٜىٰکَاطٜ؞ عٛيٛوڢَ غَاسَ حٛورٜ مَاکٛ، عٛسُدَّ وَکُّدٜ مَاکٛ، عٛوِعَ بٜى سَوْتُ: مِ شٛࢡْطٛ! مِ شٛࢡْطٛ! 46سَاعِ ࢩَوُ مَنْ طٛنْ حَا مَاکٛ تَوٛنْ، عٛ شٛࢡْطٛ؞ تَا عٛوٛنْدَ بٜى يِمْࢡٜ وٛطْࢡٜ، عٛجٛوطٛ يَاسِ سَنغٜىٰرٜ؞»
عُمْرٛورٜ دٛوْ کُوجٜ ݠُونْطٜ
47«تٛ ݠُونٛلْ وَطِ حَا لِمْشٜ غَاسَ بَالِ مَلَّ لٜنغْ، 48نٛنْ بٛو حَا کُوجٜ شَنْࢩِرَاطٜ غَاسَ بَالِ مَلَّ لٜنغْ، کٛو حَا لَرَلْ ندَبَّاوَ مَلَّ کُووْرَاطُمْ بٜى لَرَلْ بٛو، 49تٛ طُمْ لَاتَکٜ بٛطٜىٰجُمْ سٜطَّ مَلَّ حَاکٛ-حَاکٛوجُمْ سٜطَّ دٛوْ لِمْشٜ مَلَّ دٛوْ لَرَلْ مَلَّ حَا کُوجٜ شَنْࢩَاطٜ، کٛو حُوندٜ حُووْرَاندٜ بٜى لَرَلْ کٛو ندٜيٜىٰرٜ، ندٜنْ کَمْ طُمْ ݠُونٛلْ ࢩَامٛووٛلْ؞ سٜيْ ࢡٜکٛلَّ طُمْ لِمَنْجٛ؞ 50عٛلَارَ طُمْ، ندٜنْ عٛمَࢡَّ طُمْ ࢩَلْطٜ جٛوٜىٰطِطِ؞ 51ࢩَنْدٜ جٛوٜىٰطِطَوْرٜ عٛلَارَ طُمْ ڢَحِنْ؞ تٛ ݠُونٛلْ ࢡٜسْدِ يَاجُغٛ دٛوْ لِمْشٜ مَلَّ دٛوْ لَرَلْ مَلَّ حَا کُوجٜ شَنْࢩَاطٜ، کٛو حُوندٜ حُووْرَاندٜ بٜى لَرَلْ کٛو ندٜيٜىٰرٜ، ندٜنْ کَمْ حُوندٜ مَنْ سٛࢡِ؞ 52لِمَنْجٛ وُلَ ندٜ، نغَمْ طُمْ ݠُونٛلْ ࢩَامٛووٛلْ؞ دٛولٜ عٛوُلَ ندٜ بٜى يِيتٜ؞
53«عَمَّا تٛ لِمَنْجٛ يِعِ ݠُونٛلْ ࢡٜسْدَايْ يَاجُغٛ دٛوْ حُوندٜ مَنْ، 54سٜيْ عٛعُمْرَ لٛوتُغٛ ندٜ؞ ندٜنْ عٛمَࢡَّ ندٜ ࢩَلْطٜ جٛوٜىٰطِطِ ڢَحِنْ؞ 55ࢡَاوٛ مَنْ عٛلَارَ ندٜ کَدِبٛو؞ تٛ نٛوندٜ ݠُونٛلْ وَيْلَکٜ، کٛو تٛ ندٜ ࢡٜسْدَايْ يَاجُغٛ بٛو، حُوندٜ مَنْ سٛࢡِ؞ سٜيْ ندٜ وُلٜ بٜى يِيتٜ؞ تٜىٰمَ ݠُونٛلْ وَطِ حَا وَکٜىٰرٜ ندٜعٜ مَلَّ حَا وَکٜىٰرٜ ندٜيَ، طُمْ غٛوتُمْ؞ 56عَمَّا تٛ لِمَنْجٛ يِعِ ݠُونٛلْ ڢُرْطِ، سٜيْ عٛسٜىٰکَ ݠٜلّٜلْ ݠُونْنغٜلْ، عٛعِتَّ نغٜلْ دِغَ لِمْشٜ مَلَّ لَرَلْ؞ 57تٛ ݠُونٛلْ ڢُطِّتِ دٛوْ لِمْشٜ مَلَّ دٛوْ لَرَلْ مَلَّ حَا کُوجٜ شَنْࢩَاطٜ، کٛو حُوندٜ حُووْرَاندٜ بٜى لَرَلْ کٛو ندٜيٜىٰرٜ، ندٜنْ کَمْ طُمْ ݠُونٛلْ ࢡٜسْدٛتٛونغٛلْ؞ سٜيْ حُوندٜ مَنْ وُلٜ بٜى يِيتٜ؞ 58تٛ ࢡٜلٛوتِ حُوندٜ، ݠُونٛلْ بٛو عِتَّکٜ، سٜيْ ندٜ لٛوتٜ ڢَحِنْ، نغَمْ ندٜ لَاࢡَ؞
59«کَنْجُمْ وٛنِ عُمْرٛورٜ دٛوْ ݠُونٛلْ حَا لِمْشٜ غَاسَ بَالِ مَلَّ لٜنغْ، نٛنْ بٛو حَا کُوجٜ کُووْرَاطٜ بٜى لَرَلْ؞»
Currently Selected:
ڢَرِلَّاجِ لٜوِعٜنْ 13: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
