غُرْتَاکِ 40

دَرْنٜىٰکِ جٛوطٛرْدٜ

1جَوْمِرَاوٛ وِعِ مُوسَى‏: 2«ࢩَنْدٜ غٛعٛورٜ ندٜرْ لٜوْرُ عَرَنْدُ، سٜيْ عَدَرْنَ جٛوطٛرْدٜ لَيْمَارُ ڢٛتِّرْدٜ؞ 3جٛعِّنْ سُنْدُکْرُ سٜىٰدَمْکُ ندٜرْ مَارٜ، عَوِيرْنَ ندُ بٜى وِيرْندَلّٛ؞ 4نَسْتِنْ تَابَلْ، تَاسْکِتِنْ کٛ وٛنِ دٛوْ مَاغَلْ؞ نَسْتِنْ بٛو جٛعِّنِرْطُمْ ݠِتِّرْلَاجِ، جَمْنُ ݠِتِّرْلَاجِ مَاجُمْ؞ 5جٛعِّنْ غُلْدُطُمْ عُورْلٜ طُمْ کَنغّٜىٰرِ يٜىٰسٛ سُنْدُکْرُ سٜىٰدَمْکُ؞ ࢡِلْ وِيرْندَلّٛ حَا دَمُّغَلْ جٛوطٛرْدٜ سٜنَاندٜ؞ 6جٛعِّنْ حِرْسِرْدٜ نغَمْ وُلُغٛ غُلٜتٜىٰطِ يٜىٰسٛ دَمُّغَلْ جٛوطٛرْدٜ، وَاتٛ لَيْمَارُ ڢٛتِّرْدٜ؞ 7جٛعِّنْ دَارٛ حَکُّندٜ لَيْمَارُ ڢٛتِّرْدٜ عٜ حِرْسِرْدٜ؞ لٛووْ ندِيَمْ ندٜرْ مَاغٛ؞ 8دَرْنُ وِيرْندَلّٛوجِ تَارٛتٛوطِ دَلْدَلْ ڢُو، ࢡِلْ وِيرْندَلّٛ حَا دَمُّغَلْ مَاغَلْ؞ 9حٛوعُ نٜبَّمْ شٜنِرْطَمْ؞ وُجُ جٛوطٛرْدٜ سٜنَاندٜ عٜ کٛ وٛنِ ندٜرْ مَارٜ ڢُو بٜى مَاجَمْ؞ سٜنُ ندٜ عٜ کُوجٜ مَارٜ ڢُو، ندٜ لَاتٛ سٜنِيندٜ؞ 10وُجُ حِرْسِرْدٜ عٜ کُوجٜ مَارٜ بٜى نٜبَّمْ غٛ؞ سٜنُ حِرْسِرْدٜ، ندٜ لَاتٛ ࢡُرْندٜ سٜنَاغٛ؞ 11وُجُ دَارٛ عٜ جٛعِّنِرْطُمْ مَاغٛ بٜى نٜبَّمْ، سٜنْ نغٛ؞ 12ࢡَدِتِنْ هَـٰرُونَ عٜ ࢡِکّٛيْ مُمْ حَا دَمُّغَلْ لَيْمَارُ ڢٛتِّرْدٜ، ࢡٜلَࢡِّنَ کٛعٜ مَࢡّٜ بٜى ندِيَمْ؞ 13ࢡٛرْنُ هَـٰرُونَ لِمْشٜ شٜنِيطٜ، رُڢْ نٜبَّمْ غٛ دٛوْ مَاکٛ، سٜنْ مٛ، نغَمْ عٛحُووَنَمِّ کُوغَلْ لِمَنْکُ؞ 14ࢡَدِتِنْ بٛو ࢡِکّٛيْ مَاکٛ، ࢡٛرْنُ ࢡٜ تٛغّٛوجٜ؞ 15رُڢْ طَمْ دٛوْ مَࢡّٜ بَنَ ندُڢِرْطَ طَمْ دٛوْ بَابَ مَࢡّٜ، نغَمْ ࢡٜکُووَنَمِّ کُوغَلْ لِمَنْکُ؞ دُڢْکِ نٜبَّمْ طَعَمْ دٛوْ مَࢡّٜ نَسْتِنَ ࢡٜ ندٜرْ کُوغَلْ لِمَنْکُ ندُومِينغُ ندٜرْ غِدٜ مَࢡّٜ ڢُو؞»

16مُوسَى وَطِ کٛو طُمٜ ڢُو بَنَ جَوْمِرَاوٛ عُمْرِمٛ؞ 17لٜوْرُ عَرَنْدُ ندٜرْ ندُوࢡُ طِطَࢡْرُ، ࢩَنْدٜ غٛعٛورٜ مَارُ، جٛوطٛرْدٜ سٜنَاندٜ دَرْنَامَ؞ 18مُوسَى دَرْنِ ندٜ؞ عٛجٛعِّنِ کٛسْطٜ مَارٜ، عٛدَرْنِ کَاتَاکٛوجٜ مَارٜ، عٛوَطِ غَاڢٛتٛوطٜ مَارٜ، عٛدَرْنِ دَنغْرَنغٜ مَارٜ؞ 19ندٜنْ عٛوٜعِّتِ لَيْمَارُ دٛوْ مَارٜ؞ عٛوٜعِّتِ سُدَّارٜ حَا دٛوْ مَارُ، بَنَ جَوْمِرَاوٛ عُمْرُنٛ مٛ؞ 20عٛحٛوعِ عَلُّحَاجٜ سٜىٰدَمْکُ، عٛوَاتِ طٜ ندٜرْ سُنْدُکْرُ؞ عٛوَطِ شَبِّ حَا مَارُ، عٛوَلِّنِ جٛوطٛرْدٜ نغَمْ کٜڢٜرْغَلْ دٛوْ مَارُ؞ 21عٛنَسْتِنِ ندُ ندٜرْ جٛوطٛرْدٜ سٜنَاندٜ، عٛࢡِلِ وِيرْندَلّٛ، عٛوِيرْنِ سُنْدُکْرُ سٜىٰدَمْکُ بٜى مَاغٛ، بَنَ جَوْمِرَاوٛ عُمْرُنٛ مٛ؞ 22عٛجٛعِّنِ تَابَلْ ندٜرْ لَيْمَارُ ڢٛتِّرْدٜ حَا وُتُّدُ جٛوطٛرْدٜ وٛيْلَ، يَاسِ وِيرْندَلّٛ؞ 23عٛيٛوْنْدِنْدِرِ تَمْسٜىٰجٜ جٛعِّنْتٜىٰطٜ دٛوْ مَاغَلْ يٜىٰسٛ جَوْمِرَاوٛ، بَنَ عٛعُمْرُنٛ مٛ؞ 24عٛجٛعِّنِ جٛعِّنِرْطُمْ ݠِتِّرْلَاجِ ندٜرْ جٛوطٛرْدٜ لَيْمَارُ ڢٛتِّرْدٜ حَا طُمْ تِيتٛتِرَ بٜى تَابَلْ، وُتُّدُ جٛوطٛرْدٜ ندٜ ڢٛمْبِنَارٜ؞ 25عٛجَمْنِ ݠِتِّرْلَاجِ يٜىٰسٛ جَوْمِرَاوٛ، بَنَ جَوْمِرَاوٛ عُمْرُنٛ مٛ؞ 26عٛجٛعِّنِ غُلْدُطُمْ عُورْلٜ طُمْ کَنغّٜىٰرِ ندٜرْ لَيْمَارُ ڢٛتِّرْدٜ، يٜىٰسٛ وِيرْندَلّٛ؞ 27عٛوُلِ دٛوْ مَاجُمْ عُورٜتٜىٰطُمْ، بَنَ جَوْمِرَاوٛ عُمْرُنٛ مٛ؞ 28عٛࢡِلِ وِيرْندَلّٛ حَا دَمُّغَلْ جٛوطٛرْدٜ سٜنَاندٜ؞ 29عٛدَرْنِ حِرْسِرْدٜ حَا دَمُّغَلْ جٛوطٛرْدٜ لَيْمَارُ ڢٛتِّرْدٜ؞ عٛلِيعِ دٛوْ مَارٜ نغُلٜتٜىٰنغَ عٜ دٛکَّلْ ࢩَامْدُ، بَنَ جَوْمِرَاوٛ عُمْرُنٛ مٛ؞ 30عٛجٛعِّنِ دَارٛ حَکُّندٜ لَيْمَارُ ڢٛتِّرْدٜ عٜ حِرْسِرْدٜ، عٛلٛووِ ندِيَمْ ندٜرْ مَاغٛ نغَمْ لَࢡِّنٜىٰکِ؞ 31مُوسَى عٜ هَـٰرُونَ عٜ ࢡِکّٛيْ مُمْ لٛوتِرَ جُوطٜ عٜ کٛسْطٜ مُوطُمْعٜنْ، 32ندٜ ࢡٜنَسْتَتَ لَيْمَارُ ڢٛتِّرْدٜ ڢُو؞ بَنَ نِي ࢡٜلَࢡِّنِرْتَ کٛعٜ مَࢡّٜ حِدّٜکٛ ࢡٜࢡَدِتٛ حِرْسِرْدٜ، بَنَ جَوْمِرَاوٛ عُمْرُنٛ مُوسَى؞ 33عٛوَطِ دَلْدَلْ تَارٛتٛونغَلْ جٛوطٛرْدٜ سٜنَاندٜ عٜ حِرْسِرْدٜ ڢُو، عٛࢡِلِ وِيرْندَلّٛ حَا نَسْتِرْدٜ مَاغَلْ؞ بَنَ نٛنْ مُوسَى تِمِّنِرِ کُوغَلْ ڢُو؞

رُولْدٜرٜ دٛوْ جٛوطٛرْدٜ

34رُولْدٜرٜ سُدِّ جٛوطٛرْدٜ لَيْمَارُ ڢٛتِّرْدٜ؞ تٜدُّنغَلْ جَوْمِرَاوٛ حٜبِّنِ جٛوطٛرْدٜ#1 لَامِيࢡٜ 8‏:10‏-11؛ عٜسَايَ 6‏:4؛ عٜزٜکِيٜلْ 43‏:4‏-5؛ وَحَيُ يُحَنَّ 15‏:8؞؞ 35مُوسَى وَاوَايْ نَسْتُغٛ جٛوطٛرْدٜ لَيْمَارُ ڢٛتِّرْدٜ، نغَمْ رُولْدٜ وَالِ دٛوْ مَارُ، تٜدُّنغَلْ جَوْمِرَاوٛ حٜبِّنِ جٛوطٛرْدٜ؞ 36ندٜ رُولْدٜ عٜىٰنغِ دِغَ جٛوطٛرْدٜ سٜنَاندٜ ڢُو، إِسْرَاءِيلَعٜنْ عُمّٛ، مبَطَ جَحَالٜ مُوطُمْعٜنْ؞ 37تٛ رُولْدٜ عٜىٰنغَايْ، ࢡٜعُمَّتَاکٛ، حَا ࢩَلَادٜ ندٜ عٜىٰنغَ؞ 38نغَمْ ندٜرْ ࢩَلَوْمَ، رُولْدٜ جَوْمِرَاوٛ طٛنْ دٛوْ جٛوطٛرْدٜ سٜنَاندٜ؞ جٜمَّ بٛو يِيتٜ طٛنْ ندٜرْ مَارٜ يٜىٰسٛ إِسْرَاءِيلَعٜنْ ندٜرْ جَحَالٜ مَࢡّٜ ڢُو؞

Currently Selected:

غُرْتَاکِ 40: داَ

Highlight

Copy