عَمٛسْ 6

حَلْکٜرٜ إِسْرَاءِيلَ

1«بٛنٜ لَاتَنْتٛ عٛنْ، عٛنٛنْ نٜىٰمِنِيࢡٜ حَا سِيٛنَ عٜ حٛولْطِنِيࢡٜ دٛوْ حٛوسٜىٰرٜ سَمَرِيَ، مَوْࢡٜ ندٜرْ عُمَّاتٛورٜ ࢡُرْندٜ مَوْنُغٛ؞ إِسْرَاءِيلَعٜنْ طٛنْ نجَحَ حَا مٛوطٛنْ‏! 2نجٜحٜ حَا بٜرْنِوٛلْ کَلْنٜ، ندَارٜ؞ عُمّٜ تٛنْ، نجٜحٜ حَا حَمَتْ، بٜرْنِوٛلْ مَنغٛلْ؞ ندٜنْ نجِݠّٜ حَا غَاتْ، بٜرْنِوٛلْ ڢِلِسْتِعٜنْ؞ عٛنْ ࢡُرِ لَامُوجِ طِعِ نَ؟ کٛو مَرَلْ مٛنْ ࢡُرِ نغَلْ مَاجِ نَ؟

3«عٛنْ تَمِّ ࢩَلَادٜ حَلُّندٜ دَايِ مَسِنْ، عَمَّا عٛنْ ࢡَدِتِنِ لَامُ تٛوࢩَارٜ؞ 4عٛنْ طٛنْ مبَالِ دٛوْ لٜىٰسٜ کُووْرَاطٜ بٜى ࢩِيعٜ ࢩِيبِ، عٛنْ طٛنْ ݠٛرْتٛ دٛوْ بٜعِّتّٜىٰجِ؞ عٛنْ طٛنْ ࢩَامَ کُسٜلْ جَوْطِ عٜ نَعِ ݠَيْطِ؞ 5عٛنْ طٛنْ نغِمَ بٜى مٛولٛوجِ، عٛنْ طٛنْ مبَنغِنَ کُوطٜ غِمْرُطٜ کٜسٜ بَنَ دَاوُدَ؞ 6عٛنْ طٛنْ نجَرَ عِنَبٛوجَمْ ندٜرْ تَاسَاجٜ، عٛنْ طٛنْ نغُجَ ࢡَلِّ مٛوطٛنْ بٜى نٜبَّمْ ࢡُرْطَمْ وٛوطُغٛ؞ عَمَّا حَلْکٜرٜ لٜࢩٛلْ يُوسُڢُ نَاوَتَا عٛنْ؞ 7نغَمْ مَاجُمْ عٛنْ عَارْتَنْ دَحٜىٰغٛ؞ جُولْطٜ نٜىٰمِنِيࢡٜ جِنَّنْ؞»

8جَوْمِرَاوٛ اَللَّه حُنٛرِ بٜى حٛورٜ مُوطُمْ‏: ندَا کٛ جَوْمِرَاوٛ اَللَّه حٛنٛوࢡٜ عَسَمَ وِعِ‏: «مِطٛنْ وَࢩَ مَوْنِتَارٜ يِمْࢡٜ يَعْقُوبُ، مِطٛنْ وَࢩَ شُوطِ مَࢡّٜ شٜمْبِطِّ؞ نغَمْ مَنْ نجٛوڢَنْمِ بٜرْنِوٛلْ عٜ کٛ وٛنِ ندٜرْ مَاغٛلْ ڢُو حَا کٛنّٜعٜنْ مُمْ؞» 9کٛو تٛ وٛرْࢡٜ سَݠّٛ لُتِّ ندٜرْ سَارٜ وٛورٜ، ࢡٜمَايَنْ؞ 10بَنْدِرَاوٛ عُوَنْطٛ وَرَنْ نغَمْ عٛوُرْتِنَ مَايْࢡٜ عٜ سُودُ؞ عٛࢨَمَنْ ࢩُکِّيطٛ ندٜرْ سُودُ‏: «غٛطّٛ طٛنْ وٛنْدِ بٜى مَاطَ نَ؟» کَنغْکٛ عٛجَابٛتٛ‏: «عَاعَ، وٛودَا؞» عٛوِعَنْ‏: «جٜىٰطَ‏! تَا عٜوْنَ عِنْدٜ جَوْمِرَاوٛ‏!»

11ندَا کٛ جَوْمِرَاوٛ عُمْرِ‏: «شَمْݠِتٜ شُوطِ مَوْطِ، ݠُسٜ شُوطِ ݠَمَرِ‏!»

12ݠُشِّ نجَاوَنْ دٛوْ تَݠَاجٜ نَ؟ غٛطّٛ يَحْرَنْ غَعِ نغَمْ رٜمُغٛ نٛکُّورٜ ندٜعٜ نَ؟ عَمَّا عٛنٛنْ عٛنْ نغَرْتِرِ کِيتَ نغٛونغْطُکَ تٛوکٜ مبَرٛوجٜ، غٛونغَاکُ بٛو نجَرَمْ کَاطَّمْ؞ 13عٛنْ طٛنْ شٜيٛرٛ جَالٛرْغَلْ دٛوْ بٜرْنِوٛلْ لٛودٜبَرْ، عٛنْ طٛنْ مبِعَ‏: «مِنْ ࢩَامِ کَرْنَيِمْ بٜى سٜمْبٜ عَمِنْ‏!» 14نغَمْ مَاجُمْ کَکِّلٜ، عٛنٛنْ إِسْرَاءِيلَعٜنْ‏! جَوْمِرَاوٛ، اَللَّه حٛنٛوࢡٜ عَسَمَ وِعِ‏: «مِعُمِّنَنْ عُمَّاتٛورٜ دٛوْ مٛوطٛنْ، ندٜ ࢡِلَّ عٛنْ دِغَ نَسْتِرْدٜ حَمَتْ، حَا يٛتّٛ مَايٛ عَرَبَ، دِغَ وٛيْلَ حَا ڢٛمْبِنَ؞»

Currently Selected:

عَمٛسْ 6: داَ

Highlight

Copy