کُوطٜ نٜلَابٜٔ 27
27
ݠٛلْ نٜلَامَ حَا رٛمَ
1ندٜ طُمْ تَبِتِ مِنْ نجَحَنْ عِتَلِيَ بٜى کٛومْبٛوَلْ#27:1 کٛومْبٛوَلْ مَلَّ لَانَوَلْ؞، ࢡٜکَلْڢِنِ ݠٛلْ عٜ نَنغَاࢡٜ وٛطْࢡٜ حَا يُلِيُسْ، عَرْدِيطٛ دٛوْ سٛوجٜعٜنْ تٜىٰمٜرّٜ، غٛنْطٛ ندٜرْ يٜࢡْرٜ وِعٜتٜىٰندٜ يٜࢡْرٜ-لَامِيطٛ-رٛمَ؞ 2مِنْ نَسْتِ کٛومْبٛوَلْ عَدَرَمِتّٜنُسْ، مِنْ مبَکِّ غُرٜ غٛنْطٜ ڢٛمٛوندٜ مبٜىٰلَ عٜ ندٜرْ لٜسْدِ عَسِيَ؞ عَرِسْتَرْکُسْ، غٛطّٛ تٜسَّلٛنِيکِ ندٜرْ لٜسْدِ مَکٜدٛنِيَ يَحْدِ بٜى عَمِنْ؞ 3جَنغٛ مَنْ مِنْ نجٛتِّ سِدٛنْ؞ يُلِيُسْ عٜنْطِ ݠٛلْ، دُنغَنِمٛ يَحُغٛ حَا سٛوبِرَاࢡٜ مَاکٛ حَا عٛحٜࢡَ بَلَّلْ مَࢡّٜ؞ 4دِغَ طٛنْ مِنْ عُمِّ، مِنْ مبَکِّ دُوندٜ کِݠْرُسْ حَا وَکٜىٰرٜ ندٜ وَلَا حٜنْدُ، نغَمْ مِنْ طٛنّٛ ݠٛتَّ بٜى حٜنْدُ حَا وَکٜىٰرٜ ڢٜىٰرٜ؞ 5مِنْ تَعِ مبٜىٰلَ کٛمْبِ سِلِکِيَ بٜى ݠَمْڢِلِيَ، مِنْ نجٛتِّ وُرٛ مِرَ ندٜرْ لٜسْدِ لِسِيَ؞ 6تٛنْ عَرْدِيطٛ دٛوْ سٛوجٜعٜنْ غٛ تَوِ کٛومْبٛوَلْ عِوْنغَلْ عَلٜکْسَنْدِرِيَ، جَحَنْنغَلْ عِتَلِيَ، عٛنَسْتِنِ مِنْ ندٜرْ مَاغَلْ؞
7بَاکِنْ بَلْطٜ طُوطّٜ، کٛومْبٛوَلْ يَاوَايْ سَمْ، بٜى دَکٜرْ مِنْ نجٛتّٛرِ کِنِدُسْ؞ ندٜ حٜنْدُ حَطِ مِنْ يَحُغٛ يٜىٰسٛ، مِنْ مبَکِّ کٜرٜتَ حَا وَکٜىٰرٜ ندٜ وَلَا حٜنْدُ، مِنْ شَالِ نٛکُّورٜ سَلْمٛنِ؞ 8مِنْ مبَکِّ ڢٛمٛوندٜ، بٜى دَکٜرْ مِنْ نجٛتّٛرِ نٛکُّورٜ وِعٜتٜىٰندٜ جِݠّٛرْطٜ-بٛوطّٜ، ندٜ دَايَاکِ وُرٛ لَسٜيَ؞
9مِنْ ݠَࢡِّ تٛنْ، وَکَّتِ مَنْ جَحَانغَلْ بٜى کٛومْبٛوَلْ سَطِ مَسِنْ نغَمْ سَاعِ سُومَيٜ مَا سَالَکٜ؞ نغَمْ مَاجُمْ ݠٛلْ رٜىٰنْتِنِ يِمْࢡٜ، 10وِعِ: «حٜيْ يِمْࢡٜ، جَحَانغَلْ مٜىٰطٜنْ نغَعَلْ تَمِّ سَطُغٛ، کُوجٜ عٜ کٛومْبٛوَلْ مبٛنّٛتٛ؞ نَا کَنْجُمْ تَنْ، کٛو يٛنغْکِيجِ مٜىٰطٜنْ مَا کِسَتَا؞» 11عَمَّا عَرْدِيطٛ سٛوجٜعٜنْ يٜرْدِ کٛ لَاࢩٛووٛ عٜ جَوْمُ کٛومْبٛوَلْ مبِعِ، عٛيٜرْدَاکِ کٛ ݠٛلْ وِعِ؞ 12طُمْ نَاوْطُمْ جٛوطَاغٛ حَا جِݠّٛرْدٜ مَنْ دَبُّندٜ؞ نغَمْ مَاجُمْ ࢡُرْنَ يِمْࢡٜ مَنْ ڢُو نغِطِ دِلُّغٛ؞ ࢡٜنغِطِ يٛتَّاغٛ ڢٜنِکِسْ حَا ࢡٜشَالِنَ دَبُّندٜ تٛنْ، تٛ حٜࢡٛتٛ؞ ڢٜنِکِسْ وٛنِ جِݠّٛرْدٜ کٛومْبٛوجٜ حَا دُوندٜ کٜرٜتَ تِيتِيندٜ حِيرْنَانغٜ وَلَادُ وٛيْلَ#27:12 وٛيْلَ مَلَّ سٛࢡِّيرٜ؞ عٜ حِيرْنَانغٜ وَلَادُ ڢٛمْبِنَ#27:12 ڢٛمْبِنَ مَلَّ حٛورٜ-حُطٛ؞؞
حٜنْدُ حَا مبٜىٰلَ
13ندٜ حٜنْدُ ڢٛمْبِنَ ڢُطِّ وَطُغٛ، ࢡٜنُمِ تٛکِّتِنغٛ جَحَانغَلْ مَࢡّٜ نغَمْ حٜنْدُ ندُعُ سَاتَايْ، ࢡٜطٛوڢِ تِغِّرْطُمْ کٛومْبٛوَلْ، ࢡٜمبَکِّ ڢٛمٛوندٜ کٜرٜتَ؞ 14نِي سٜطَّ، حٜنْدُ سَاتُندُ وِعٜتٜىٰندُ عٜرَکِلٛنْ عُمِّ؞ 15ندُ حَطِ کٛومْبٛوَلْ؞ ندٜ نغَلْ وَاوَايْ تِيتَاغٛ ندُ، مِنْ عَشِّ حٜنْدُ طٛنْ يٜرْࢡَ نغَلْ؞ 16ندٜ مِنْ شَالِ وَکٜىٰرٜ دُونغٜلْ بِعٜتٜىٰنغٜلْ کَوْدَ ندٜ وَلَا حٜنْدُ تٛنْ، مِنْ کِسْنِ کٛومْبٛوَلْ ݠَمَرَلْ بٜى دَکٜرْ؞ 17ࢡٜࢡَنغْتِ کٛومْبٛوَلْ ݠَمَرَلْ غٛ؞ ندٜنْ ࢡٜکَࢡِّ کٛومْبٛوَلْ مَࢡّٜ بٜى ࢡٛغِّ؞ ࢡٜکُلِ طَغُّغٛ حَا سِرْتِسْ؞ نغَمْ مَاجُمْ ࢡٜنجِݠِّنِ لٜغَّلْ مَنغَلْ دَرْنَنْنغَلْ کٛومْبٛوَلْ، ࢡٜنجٛوڢِ کٛومْبٛوَلْ حَا حٜنْدُ يَحْرَ نغَلْ#27:17 عَايَارٜ ندٜعٜ سَطِ ڢَامٜىٰغٛ؞؞ 18ندٜ حٜنْدُ مَنْ طٛنْ تٛکِّ وَطُغٛ بٜى سٜمْبٜ، جَنغٛ مَنْ ࢡٜݠُطِّ وُدِنْغٛ دٛنغْلٜ کٛومْبٛوَلْ؞ 19ڢَࢡِّجَنغٛ مَنْ ࢡٜنغُدِنِ ࢡٛغِّ عٜ کٛ وٛنّٛ ندٜرْ کٛومْبٛوَلْ بٜى جُوطٜ مَࢡّٜ؞ 20بَلْطٜ طُوطّٜ مِنْ نغِعَايْ کٛودٜ عٜ نَانغٜ، نغَمْ حٜنْدُ تٛکِّ سَاتُغٛ، حَا مِنْ عِتِّ تَمُّندٜ حِسُغٛ ڢُو؞
21ڢَࢡِّ وٛنْࢡٜ ندٜرْ کٛومْبٛوَلْ مَنْ ࢩَامَايْ کٛو طُمٜ؞ ندٜنْ ݠٛلْ دَرِ شَکَ مَࢡّٜ، وِعِ: «حٜيْ يِمْࢡٜ، ندِکَّ تٛ عٛنْ جَࢡِنٛ کٛ مبِعْمِ عٛنْ، عٛنْ عُمَّتَانٛ کٜرٜتَ؞ عٜنْ کِسَنّٛ عَسَرْ عٜ حَلْکٜرٜ ندٜعٜ؞ 22عَمَّا جٛنْتَ مِطٛنْ تٛرٛ عٛنْ، تِطِّنٜ ࢡٜرْطٜ مٛنْ! کٛو غٛوتٛ شَکَ عَمِنْ مَايَتَا، سٜيْ کٛومْبٛوَلْ تَنْ وٛنّٛتٛ؞ 23نغَمْ حَنغْکِ مَلَاعِکَاجٛ اَللَّه مٛ مِجَغَّنْتٛ وَنغَنِ يَمْ، 24وِعِ: ݠٛلْ، تَا حُلْتٛرْ! سٜيْ عَدَرٛ يٜىٰسٛ لَامِيطٛ رٛمَ؞ ندَا، اَللَّه مٛعَّنِ مَ؞ عٛحِسْنَنْ وٛنْدُࢡٜ بٜى مَ ندٜرْ کٛومْبٛوَلْ نغَعَلْ ڢُو؞ 25نغَمْ مَاجُمْ تَا کُلْتٛرٜ، لَاتٜ عٛنْ سُوسْࢡٜ؞ نغَمْ مِحٛولِ اَللَّه، کٛ عٛوِعِ يَمْ ڢُو لَاتٛتٛ؞ 26عَمَّا حٜنْدُ يَحْرَنْ عٜنْ حَا دُوندٜ ڢٜىٰرٜ، دَرْنَنْ عٜنْ تٛنْ؞»
27ندٜرْ جٜمَّارٜ سَݠّٛ عٜ نَيَࢡْرٜ، حٜنْدُ يٜرْࢡِ مِنْ ندٜرْ مبٜىٰلَ عَدِرِيَ؞ شَکَ جٜمَّ لَاࢩٛوࢡٜ تَمِّ مِنْ ࢡَدَکٜ لٜسْدِ نجٛورْدِ؞ 28ندٜنْ ࢡٜنجِݠِّنِ ࢡٛغّٛلْ بٜى نجَمْندِ کَࢡَّاندِ حَا مَاغٛلْ، نغَمْ ڢٛونْدُغٛ لُغّٜىٰنغَ ندِيَمْ؞ ࢡٜتَوِ لُغّٜىٰنغَ مَنْ وَطِ بَاکِنْ مٜىٰتِرْ شَݠَّنْطٜ تَتِ عٜ جٛوٜىٰطِطِ، يٜىٰسٛ سٜطَّ نغَ وَطِ بَاکِنْ مٜىٰتِرْ نٛوغَسْ عٜ جٛوٜىٰتَتِ؞ 29ࢡٜکُلِ تَا حٜنْدُ يَحْرَ کٛومْبٛوَلْ#27:29 کٛومْبٛوَلْ مَلَّ لَانَوَلْ؞ حَا تَݠَاجٜ، نغَمْ مَاجُمْ ࢡٜنجِݠِّنِ جَمْطٜ تِغِّرْطٜ نَيِ ࢡَاوٛ کٛومْبٛوَلْ؞ ࢡٜنغٜلِ بَࢡّٛلْ وَطَ لَوْ؞ 30لَاࢩٛوࢡٜ نغِطْنٛ وُرْتَاغٛ کٛومْبٛوَلْ، ࢡٜندِلَّ؞ ࢡٜنجِݠِّنِ کٛومْبٛوَلْ ݠَمَرَلْ حَا ندِيَمْ، ࢡٜمبَطِ بَنَ ࢡٜنجِݠِّنَنْ جَمْطٜ تِغِّرْطٜ ڢٜىٰرٜ يٜىٰسٛ کٛومْبٛوَلْ؞ 31عَمَّا ݠٛلْ وِعِ سٛوجٜعٜنْ عٜ عَرْدِيطٛ مَࢡّٜ: «تٛ لَاࢩٛوࢡٜ نجٛوطَاکِ حَا کٛومْبٛوَلْ، عٛنْ کِسَتَا؞» 32ندٜنْ سٛوجٜعٜنْ تَعِ ࢡٛغِّ نَنغُطِ کٛومْبٛوَلْ ݠَمَرَلْ، ࢡٜنجٛوڢِ نغَلْ، نغَلْ دٛعِّ؞
33ندٜ ࢡَدِ وٜىٰتُغٛ، ݠٛلْ تٛرِ ࢡٜ ࢡٜ ࢩَامَ، عٛوِعِ: «حَنْدٜ وَطِ بَلْطٜ سَݠّٛ عٜ نَيِ، عٛنْ ࢩَامَايْ کٛو طُمٜ، عٛنْ طٛنْ ندٜىٰنَ؞ 34نغَمْ مَاجُمْ مِتٛرِ عٛنْ عٛنْ ࢩَامَ تٛ عٛنْ نغِطِ حِسُغٛ؞ عَمَّا کٛو غَاسَاوٛلْ حٛورٜ مٛنْ غٛوتٛلْ مَجَّتَا؞» 35ندٜ عٛوِعِ طُمْ، عٛحٛوعِ تَمْسٜىٰرٜ، عٛيٜتِّ اَللَّه يٜىٰسٛ مَࢡّٜ ڢُو، عٛيٜوِ ندٜ، عٛڢُطِّ ࢩَامُغٛ؞ 36ندٜنْ حَکِّيلٛوجِ مَࢡّٜ ندٜعِّتِ، ࢡٜ ڢُو ࢡٜࢩَامِ؞ 37لِمْغَلْ يِمْࢡٜ حَا کٛومْبٛوَلْ وَطِ تٜىٰمٜطّٜ طِطٛ عٜ شَݠَّنْطٜ نجٛوٜىٰطِطٛ عٜ نجٛوٜىٰغٛ (276)؞ 38ندٜ ࢡٜکَارِ، ࢡٜشَکِّنِ عَلْکَمَارِ ندٜرْ ندِيَمْ نغَمْ عُسْتُغٛ دٛنغَلْ؞
ࢨُوغٜ ندِيَمْ ݠُسِ کٛومْبٛوَلْ
39ندٜ وٜىٰتِ، لَاࢩٛوࢡٜ عَنْدَا تٛيْ ࢡٜنغٛنِ، عَمَّا ࢡٜنغِعِ ݠٜلّٜلْ نجَارٜىٰندِ حَا ڢٛمٛوندٜ دُوندٜ؞ ࢡٜنغِطِ يَحْرُغٛ کٛومْبٛوَلْ حَا تٛنْ، تٛ حٜࢡٛتٛ؞ 40نغَمْ مَاجُمْ ࢡٜتَعِ ࢡٛغِّ جَمْطٜ تِغِّرْطٜ، ࢡٜعَشِّ طٜ ندٜرْ ندِيَمْ؞ ندٜنْ ࢡٜݠِيسْتِ ࢡٛغِّ کَࢡُّطِ لٜطّٜ لَاࢩِرْطٜ؞ ندٜنْ ࢡٜࢡَنغْتِ لٜݠّٛلْ مَنغٛلْ غٛنْنغٛلْ يٜىٰسٛ کٛومْبٛوَلْ نغَمْ حَا حٜنْدُ يَحْرَ نغَلْ حَا دُوندٜ؞ 41عَمَّا کٛومْبٛوَلْ تَوِ ݠٜلّٜلْ حَا ندِيَمْ لُغَّايْ، دَرِ تٛنْ؞ يٜىٰسٛ مَاغَلْ طَغِّ حَا نجَارٜىٰندِ، دِمْبَتَاکٛ سَمْ، ࢨُوغٜ ندِيَمْ بٛو ݠُسِ ࢡَاوٛ مَاغَلْ؞
42سٛوجٜعٜنْ نُڢِ مبَرُغٛ نَنغَاࢡٜ، نغَمْ تَا ࢡٜنغِنٛ، ࢡٜندٛغَّ؞ 43عَمَّا عَرْدِيطٛ سٛوجٜعٜنْ، ندٜ يِطِ حِسْنُغٛ ݠٛلْ، حَطِ ࢡٜ وَطُغٛ عَنِّيَ مَࢡّٜ؞ عٛعُمْرِ وَاوْࢡٜ نغِنَمْ ࢡٜعَارْتَ دِوُغٛ حَا ندٜرْ ندِيَمْ، ࢡٜنغِنٛ، ࢡٜنجٛتّٛ لٜسْدِ نجٛورْندِ؞ 44لُتُّࢡٜ بٛو نَنغَ کَاتَاکٛوجٜ مَلَّ لٜطّٜ کٛومْبٛوَلْ غٜوْطٜ؞ بَنَ نِي ࢡٜ ڢُو ࢡٜنجٛتّٛرِ لٜسْدِ جَمْ؞
Currently Selected:
کُوطٜ نٜلَابٜٔ 27: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
