کُوطٜ نٜلَابٜٔ 28

ݠٛلْ طٛنْ حَا دُوندٜ مَلْتَ

1ندٜ مِنْ نجٛتِّ دُوندٜ جَمْ، مِنْ نَنِ عِنْدٜ دُوندٜ مَنْ مَلْتَ؞ 2وٛنْࢡٜ حَا تٛنْ کٛلِّ مِنْ مبٛوطٜىٰنغَ ݠَنْتُنغَ؞ ࢡٜنجَࢡِّ مِنْ، ࢡٜکُࢡِّ يِيتٜ نغَمْ عِيٜىٰندٜ ڢُطِّ تٛࢡُغٛ عٜ ݠٜىٰوٛلْ بٛو وَطِ؞ 3ݠٛلْ ࢡٛڢْتِ لٜطّٜ، سَکِّنِ طٜ ندٜرْ يِيتٜ؞ دَلِيلَ نغُلٜىٰنغَ يِيتٜ، مبٛودِ نغٛنْدِ ندٜرْ لٜطّٜ مَنْ وُرْتِ، نغَتِمٛ؞ 4ندٜ يِمْࢡٜ دُوندٜ مَنْ نغِعِ مبٛودِ طٛنْ ࢡِلِ حَا جُنغٛ مَاکٛ، ࢡٜمبِعْمبِعْتِرِ‏: «وَلَا سٜکٛ، غٛرْکٛ عٛو عٛ مبَرٛووٛ يِمْࢡٜ؞ کٛو ندٜ عٛحِسِ مبٜىٰلَ، طٛوَنْتٜىٰطٛ مٜىٰطٜنْ حِيتٛتٛ مٛ، عَشَّتَا مٛ عٛيٜىٰطَ؞» 5عَمَّا ݠٛلْ ڢِطِّ مبٛودِ، ندِ يَنِ ندٜرْ يِيتٜ؞ عٛمَاتَايْ نَاوْطُمْ کٛو سٜطَّ؞ 6ࢡٜتَمِّ جُنغٛ مَاکٛ ࢡُوتَنْ مَلَّ عٛمَايَنْ لَوْ؞ عَمَّا ندٜ حَا نٜىٰࢡِ ࢡٜنغِعِ وَلَا کٛ وَطِمٛ سَمْ، ࢡٜشَنْجِ نُمٛ، ࢡٜمبِعِ‏: «عَسٜى، عٛ طٛوَنْتٜىٰطٛ‏!»

7ݠُبِلِيُسْ، مَوْطٛ دُوندٜ مَنْ جَࢡِّ مِنْ، وٜىٰرْنِ مِنْ حَا مَاکٛ بَلْطٜ تَتِ؞ مَرَلْ مَاکٛ دَايَاکِ بٜى نٛکُّورٜ مَنْ؞ 8بَابَ ݠُبِلِيُسْ طٛنْ وَالِ ࢩَوْطٛ يٛنْتٜرٜ عٜ عٜىٰمٛرَلْ؞ ݠٛلْ يٜحِ حَا مَاکٛ، وَطِ دٛعَ، وَلِّنِ جُوطٜ مُمْ دٛوْ مَاکٛ، يَمْطِتِنِمٛ؞ 9ࢡَاوٛطٛنْ ࢩَوْࢡٜ وٛطْࢡٜ بٛو نغَرِ حَا ݠٛلْ، عٛيَمْطِتِنِ ࢡٜ؞ 10ࢡٜتٜدِّنِ مِنْ بٜى کُوجٜ طُوطّٜ؞ سَاعِ مِنْ طٛنْ ندِلَّ بٛو، ࢡٜندٛکِّ مِنْ کٛ مِنْ مَرْنٛ حَاجٜ؞

ݠٛلْ عُمِّ مَلْتَ دِلِّ رٛمَ

11ࢡَاوٛ لٜبِّ تَتِ مِنْ ندِلِّ بٜى کٛومْبٛوَلْ عِوْنغَلْ عَلٜکْسَنْدِرِيَ، بِعٜتٜىٰنغَلْ لَبِّ-شِوْتُطِ؞ نغَلْ سَالِنِ دَبُّندٜ حَا دُوندٜ مَنْ؞ 12مِنْ نجٛتِّ وُرٛ سِرَکُسْ، مِنْ ݠَࢡِّ تٛنْ بَلْطٜ تَتِ؞ 13مِنْ عُمِّ تٛنْ، مِنْ نجٛتِّ وُرٛ رٜغِيٛنْ؞ جَنغٛ مَنْ حٜنْدُ ڢٛمْبِنَ ڢُطِّ وَطُغٛ؞ ࢡَاوٛ بَلْطٜ طِطِ، مِنْ نجٛتِّ ݠٛتِيٛلِ؞ 14مِنْ تَوِ نُطِّنْࢡٜ تٛنْ؞ ࢡٜتٛرِ مِنْ مِنْ ݠَࢡَّ حَا مَࢡّٜ عَسَوٜىٰرٜ؞ بَنَ نِي مِنْ نجٛتّٛرِ رٛمَ؞ 15ندٜ دٜىٰرْطِرَاࢡٜ وٛنْࢡٜ حَا رٛمَ نَنِ حَبَرُ مَنْ، ࢡٜنغَرِ حَا لُومٛ-عَݠِّيُسْ عٜ حَا بٜىٰرْلٜ-تَتِ#28‏:15 لُومٛ-عَݠِّيُسْ عٜ بٜىٰرْلٜ-تَتِ طُمْ عِنْطٜ غُرٜ؞ نغَمْ ࢡٜݠٛتَّ بٜى عَمِنْ؞ ندٜ ݠٛلْ يِعِ ࢡٜ، عٛيٜتِّ اَللَّه، عٛتِطِّنِ ࢡٜرْندٜ مَاکٛ؞

ݠٛلْ حَا رٛمَ

16ندٜ مِنْ نجٛتِّ رٛمَ، ݠٛلْ حٜࢡِ دُنغَيٜىٰرٜ جٛوطَاغٛ ڢٜىٰرٜ مَاکٛ، کٛو تٛ سٛوجٜىٰجٛ طٛنْ عَيْنَ مٛ؞

17ࢡَاوٛ بَلْطٜ تَتِ ݠٛلْ عٜوْنِ مَوْࢡٜ يَحُودُعٜنْ وٛنْࢡٜ رٛمَ؞ ندٜ ࢡٜکَوْتِ، عٛوِعِ ࢡٜ‏: «دٜىٰرْطِرَاࢡٜ عَمْ‏! مِوَطَايْ کٛو طُمٜ دٛوْ عُمَّاتٛورٜ مٜىٰطٜنْ مَلَّ دٛوْ عَلْعَادَاجِ کَاکِرَاࢡٜ مٜىٰطٜنْ، عَمَّا ࢡٜنَنغِ يَمْ، ࢡٜمَࢡِّ يَمْ دِغَ حَا عُرُسَلِيمَ ࢡٜندٛکِّ يَمْ حَا جُوطٜ رٛمَعٜنْ؞ 18ندٜ ࢡٜلِࢩِ حَالَ مَنْ، ࢡٜنغِطْنٛ يٛوڢُغٛ يَمْ، نغَمْ ࢡٜتَوِ مِوَطَايْ کٛو طُمٜ کٛ حٜعِ دٛعُّغٛ يَمْ کِيتَ مَايْدٜ؞ 19عَمَّا ندٜ يَحُودُعٜنْ نجَࢡَايْ مِيٛوڢٜ، دٛولٜ مِتٛرٛ مِحِيتٜ حَا لَامِيطٛ رٛمَ، کٛو ندٜ مِوَلَا نُمٛ عَيْبِنْغٛ عُمَّاتٛورٜ عَمْ بٛو#کُوطٜ نٜلَاࢡٜ 25‏:11؞؞ 20نغَمْ مَاجُمْ مِعٜوْنِ عٛنْ حَا مِيِعَ عٛنْ، مِوٛلْوَنَ عٛنْ بٛو؞ نغَمْ دَلِيلَ تَمُّندٜ إِسْرَاءِيلَ مِطٛنْ ندٜرْ شَلَّلُّوٛلْ نغٛعٛلْ؞» 21ࢡٜمبِعِمٛ‏: «مِنِنْ کَمْ، مِنْ کٜࢡَايْ بَتَاکٜوٛلْ حَبَرُ مَ دِغَ يَحُدِيَ، وَلَا بٛو دٜىٰرْطِرَاوٛ غَرْطٛ حَا طٛ نغَمْ حَلِّنْغٛ عِنْدٜ مَ؞ 22عَمَّا مِنْ نغِطِ نَنُغٛ کٛ نُمَتَ دٛوْ بِطُعَاکُ نغُعُ، نغَمْ مِنْ عَنْدِ يِمْࢡٜ کٛو تٛيْ طٛنْ نغٜدَّ نغُ؞»

23ࢡٜندَرْنِ سَرْتِ ندٜ ࢡٜکَوْتَتَ ڢَحِنْ حَا وٜىٰرْدٜ مَاکٛ؞ ندٜ ࢩَنْدٜ مَنْ يٛتِّ، ࢡٜنغَرِ ࢡٜ طُوطْࢡٜ؞ ݠٛلْ ࢩَلِّ ڢَامْتِنْغٛ ࢡٜ عٜ وَازَاغٛ ࢡٜ حَالَ لَامُ اَللَّه؞ عٛحَࢡْدِ غٛونغْطِنَنْغٛ ࢡٜ کٛ وِعَ دٛوْ عِيسَى دِغَ تَوْرٜىٰتَ مُوسَى عٜ دٜڢْتٜ اَلنَّبِعٜنْ؞ 24وٛطْࢡٜ نجَࢡِ کٛ ݠٛلْ وٛلْوِ، عَمَّا وٛطْࢡٜ نجَࢡَايْ؞ 25ندٜنْ ࢡٜطٛنْ نغَابٛتِرَ، ࢡٜشَاکِ؞ عَمَّا دِغَ ࢡٜشَاکَاکِ تَوٛنْ، ݠٛلْ ࢡٜسْدَنِ ࢡٜ وٛلْدٜ ندٜعٜ، وِعِ‏: «ندَا کٛ رُوحُ شٜنِيطٛ وٛلْوَنِ کَاکِرَاࢡٜ مٛوطٛنْ بٜى حُنْدُکٛ اَلنَّبِي عٜسَايَ‏: 26يَحْ، وِعْ عُمَّاتٛورٜ ندٜعٜ‏:

عٛنْ نَنَنْ بٜى نٛݠِّ مٛنْ، عَمَّا عٛنْ ݠَامَتَا سَمْ؞

عٛنْ ندَارَنْ بٜى غِتٜ مٛنْ، عَمَّا عٛنْ نغِعَتَا کٛو طُمٜ؞

27نغَمْ ࢡٜرْطٜ يِمْࢡٜ ࢡٜعٜ مَاتَتَا کٛو طُمٜ،

ࢡٜشُکِّ نٛݠِّ مَࢡّٜ،

ࢡٜمَࢡِّ غِتٜ مَࢡّٜ نغَمْ تَا ࢡٜنغِعَ،

تَا ࢡٜنَنَ،

تَا ࢡٜݠَامَ،

تَا ࢡٜتُوبَ بٛو، نغَمْ تَا مِنْ مِيَمْطِتِنَ ࢡٜ#عٜسَايَ 6‏:9‏-10؞؞»

28ݠٛلْ وِعِ ڢَحِنْ‏: «کَدِ سٜيْ عَنْدٛنْ، اَللَّه نٜلِ حَبَرُ کِسْندَمْ مُوطُمْ حَا يِمْࢡٜ عُمَّاتٛوجٜ غٛطّٜ؞ کَمْࢡٜ ࢡٜنَنَنْ‏!» ‏[‏ 29ࢡَاوٛ بٛلّٜ طٜعٜ، يَحُودُعٜنْ ندِلِّ، ࢡٜطٛنْ نغَابٛتِرَ شَکَ مَࢡّٜ مَسِنْ؞]‏

30دُوࢡِ طِطِ ݠٛلْ جٛوطِ حَا سُودُ ندُ عٛحٛوسِ حَيَ، عٛطٛنْ جَࢡّٛ کٛو مٛيْ غَرْطٛ حَا مَاکٛ؞ 31عٛوَازِ حَالَ لَامُ اَللَّه، عٛعٜکِّتِنِ يِمْࢡٜ حَالَ عِيسَى اَلْمَسِيحُ، جَوْمِرَاوٛ، عٛوٛلْوِ بٜى دَرْتَارٜ، وَلَا مٛ حَطِمٛ؞

Currently Selected:

کُوطٜ نٜلَابٜٔ 28: داَ

Highlight

Copy