کُوطٜ نٜلَابٜٔ 19
19
وَازُ ݠٛلْ حَا عٜڢٜسُسْ
1يَاکٜ عَݠٛلّٛسْ طٛنّٛ حَا کٛرِنْتُ، ݠٛلْ تٛکِّ لَاوٛلْ کٛوسٜىٰجٜ حَا عٛيٛتِّ عٜڢٜسُسْ؞ تٛنْ عٛتَوِ نُطِّنْࢡٜ وٛطْࢡٜ، 2عٛࢨَمِ ࢡٜ: «عٛنْ کٜࢡِ رُوحُ شٜنِيطٛ ࢩَنْدٜ عٛنْ نُطِّنِ نَ؟» ࢡٜنجَابِ: «مِنْ مٜىٰطَايْ نَنُغٛ حَالَ رُوحُ شٜنِيطٛ؞» 3ݠٛلْ ࢨَمِ: «کَدِ بَݠْتِسْمَ کَيٜ عٛنْ نجَࢡِ؟» ࢡٜنجَابِ: «مِنْ نجَࢡِ بَݠْتِسْمَ يُحَنَّ؞» 4ݠٛلْ وِعِ: «يُحَنَّ وَطَنِ يِمْࢡٜ بَݠْتِسْمَ نغَمْ ࢡٜنغَيْلِتٛ، ࢡٜتُوبَ؞ يُحَنَّ وِعِ ࢡٜ بٛو ࢡٜنُطِّنَ غٛطّٛ تَمِّيطٛ وَرْغٛ ࢡَاوٛ مَاکٛ، وَاتٛ عِيسَى#مَتَّ 3:11؛ مَرْکُسْ 1:4،7-8؛ لُکَ 3:4،16؛ يُحَنَّ 1:26-27؞؞» 5ندٜ ࢡٜنَنِ طُمْ، ࢡٜنجَࢡِ بَݠْتِسْمَ بٜى عِنْدٜ جَوْمِرَاوٛ عِيسَى؞ 6ݠٛلْ وَلِّنِ جُوطٜ مُوطُمْ دٛوْ کٛعٜ مَࢡّٜ، رُوحُ شٜنِيطٛ جِݠِّ دٛوْ مَࢡّٜ، ࢡٜمبٛلْوِ طٜمْطٜ غٛطّٜ، ࢡٜمبَطِ عَنَّبَاکُ؞ 7لِمْغَلْ يِمْࢡٜ مَنْ ڢُو وَطِ بَاکِنْ سَݠّٛ عٜ طِطٛ؞
8لٜبِّ تَتِ ݠٛلْ طٛنْ تٛکِّ يَحُغٛ سُودُ دٜوَلْ يَحُودُعٜنْ، عٛطٛنْ وٛلْوَنَ يِمْࢡٜ بٜى دَرْتَارٜ، عٛطٛنْ حُجّٛتِرَ بٜى مَࢡّٜ، عٛطٛنْ حَࢡْدَ ڢَامْتِنْغٛ ࢡٜ حَالَ لَامُ اَللَّه حَا ࢡٜنجَࢡَ کَ؞ 9عَمَّا وٛطْࢡٜ مَࢡّٜ شَاتِنِ کٛعٜ مُوطُمْعٜنْ، ࢡٜشَلِ جَࢡُغٛ کَ، ࢡٜمبٛلْوِ کَلُّکَ دٛوْ لَاوٛلْ جَوْمِرَاوٛ يٜىٰسٛ مٛوࢡْرٜ؞ نغَمْ مَاجُمْ ݠٛلْ دَايِ ࢡٜ، حَوْتَنِ نُطِّنْࢡٜ؞ ࢩَلْطٜ ڢُو عٛحُجّٛتِرِ بٜى مَࢡّٜ حَا ݠٜلّٜلْ جَنغِرْدٜ تِرَنُّسْ؞ 10عٛوَطِ طُمْ دُوࢡِ طِطِ، حَا يَحُودُعٜنْ عٜ يِمْࢡٜ عُمَّاتٛوجٜ غٛطّٜ وٛنْࢡٜ لٜسْدِ عَسِيَ ڢُو نَنِ وٛلْدٜ جَوْمِرَاوٛ؞
حَالَ ࢡِࢡّٜ سِکٜوَسْ
11اَللَّه وَطِ کَايٜىٰڢِيجِ کَيْطِنِيطِ بٜى جُنغٛ ݠٛلْ؞ 12ࢡٜنجَحْرَنِ ࢩَوْࢡٜ لٜݠِّ عٜ لِمْشٜ مٜىٰمْطٜ ࢡَنْدُ ݠٛلْ، ࢩَوُجِ مَࢡّٜ تِمِّ، رُوحُوجِ کَلُّطِ بٛو نغُرْتِ؞ 13يَحُودُعٜنْ وٛطْࢡٜ يِيلٛتٛوࢡٜ نغَمْ وُرْتِنْغٛ رُوحُوجِ کَلُّطِ، طَࢡِّ کَمْࢡٜ بٛو وُرْتِنْغٛ طِ بٜى عِنْدٜ عِيسَى؞ ࢡٜمبِعِ: «مِنْ عُمْرِ عٛنْ نغُرْتَ بٜى عِنْدٜ عِيسَى، مٛ ݠٛلْ وَازَتَ!» 14ࢡِࢡّٜ حٛورٜىٰجٛ لِمَنْعٜنْ بِعٜتٜىٰطٛ سِکٜوَسْ مبَطَتَ طُمْ؞ ࢡٜ نجٛوٜىٰطِطٛ؞ 15عَمَّا رُوحُوٛلْ کَلُّنغٛلْ جَابِ ࢡٜ: «مِعَنْدِ عِيسَى، ݠٛلْ بٛو مِعَنْدِ طُمْ، عَمَّا عٛنٛنْ عٛنْ ࢡٜيٜ؟» 16مٛ رُوحُوٛلْ کَلُّنغٛلْ طٛنْ ندٜرْ مُوطُمْ غٛ حِݠِّ ࢡٜ، ࢡُرْدِ ࢡٜسٜمْبٜ، جَالِ ࢡٜ ڢُو؞ ࢡٜنغُرْتِ سُودُ مَنْ، ࢡٜندٛغِّ ࢡٜ تٜمْبُࢡٜ عٜ نَاوْنَاࢡٜ؞ 17يَحُودُعٜنْ عٜ يِمْࢡٜ عُمَّاتٛوجٜ غٛطّٜ جٛوطِيࢡٜ حَا عٜڢٜسُسْ ڢُو نَنِ طُمْ، ࢡٜرْطٜ مَࢡّٜ تَعِ، ندٜنْ ࢡٜتٜدِّنِ عِنْدٜ جَوْمِرَاوٛ عِيسَى؞ 18طُوطْࢡٜ شَکَ نُطِّنْࢡٜ نغَرِ، مبَنغِنِ کُوطٜ حِيلَ طٜ ࢡٜکُووِنٛ يٜىٰسٛ يِمْࢡٜ ڢُو؞ 19وَطٛوࢡٜ حِيلَ طُوطْࢡٜ نغَدِّ دٜڢْتٜ مَࢡّٜ، نغُلِ طٜ حَا يٜىٰسٛ يِمْࢡٜ ڢُو؞ ࢡٜمبَطِ لِسَاڢِ شٛغُّ دٜڢْتٜ مَنْ، طُمْ وَطِ شٜىٰدٜ شَرْدِ عُجِنٜ شَݠَّنْطٜ جٛوِ (50,000)؞ 20بَنَ نِي وٛلْدٜ جَوْمِرَاوٛ تٛکِّ سَنغْکِتَاغٛ، بَاوْطٜ مَارٜ ࢡٜسْدِ يٜىٰسٛ يٜىٰسٛ؞
جِيࢡٛتِرَلْ وَطِ حَا عٜڢٜسُسْ
21ࢡَاوٛ حَالَ کَعَ، ݠٛلْ وَطِ عَنِّيَ سَالَاغٛ غَلْ مَکٜدٛنِيَ عٜ عَکَيَ نغَمْ يَحُغٛ عُرُسَلِيمَ؞ عٛوِعِ: «تٛ مِيٜحِ تٛنْ، مِيَحَنْ رٛمَ بٛو؞» 22عٛنٜلِ وَلّٛوࢡٜ مَاکٛ طِطٛ تِمٛتٜ عٜ عٜرَسْتُسْ حَا مَکٜدٛنِيَ، عَمَّا کَنغْکٛ عٛڢَࢡِّ حَا لٜسْدِ عَسِيَ سٜطَّ؞
23يَاکٜ مَنْ ڢِتِنَ مَکَّ عُمِّ حَا عٜڢٜسُسْ دٛوْ لَاوٛلْ جَوْمِرَاوٛ؞ 24دٜمٜتِرِيُسْ، تَݠّٛووٛ شَرْدِ، طٛنّٛ وَطَ عِرِنْ شُورٛنْ نَنْدُکٛنْ بٜى سُودُ لَوْرُ وِعٜتٜىٰندُ عَرْتٜمِسْ؞ عٛحٜࢡَنِ وَطٛوࢡٜ سَنَاعَ کٜࢡَلْ طُوطْنغَلْ؞ 25عٛعٜوْنِ ࢡٜ ڢُو، کَمْࢡٜ عٜ تَݠّٛوࢡٜ شَرْدِ وٛطْࢡٜ؞ عٛوِعِ ࢡٜ: «عٛنٛنْ وٛرْࢡٜ، عٛنْ عَنْدِ رِسْکُ مٜنْ ڢُو عِوِ دِغَ کُوغَلْ مٜىٰطٜنْ نغَعَلْ؞ 26عٛنٛنْ بٜى کٛعٜ مٛنْ عٛنْ طٛنْ نغِعَ، عٛنْ طٛنْ نَنَ کٛ ݠٛلْ عٛو وَطَتَ؞ عٛطٛنْ وِعَ طٛوَنْتٜىٰࢡٜ ࢡٜ يِمْࢡٜ مبَطَتَ لَاتَاکِ طٛوَنْتٜىٰࢡٜ سَمْ، حَا طُوطْࢡٜ ندٜرْ عٜڢٜسُسْ طٛ عٜ ࢡُرْنَ لٜسْدِ عَسِيَ ڢُو نجَࢡِ طُمْ، تٛکِّ لَاوٛلْ مَاکٛ؞ 27تٛ طُمْ تٛکِّ بَنَ نِي، نَا سَنَاعَ مٜىٰطٜنْ تَنْ يِمْࢡٜ کَلِّنْتَ، عَمَّا ࢡٜلَسْبِنَنْ سُودُ عَرْتٜمِسْ، طٛوَنْتٜىٰطٛ مٜىٰطٜنْ مَوْطٛ، ࢡٜعَشَّنْ بٛو سَمْطِنْغٛ طٛوَنْتٜىٰطٛ مٜىٰطٜنْ مٛ يِمْࢡٜ لٜسْدِ عَسِيَ عٜ دُنِيَارُ ڢُو ندٜوَتَ!»
28ندٜ يِمْࢡٜ نَنِ بٛلّٜ طٜعٜ، ࢡٜࢡٜرْنِ مَسِنْ، ࢡٜݠُطِّ حٛولُغٛ، ࢡٜمبِعِ: «عَرْتٜمِسْ مٛ عٜڢٜسُسْ، عٛ مَوْطٛ! عَرْتٜمِسْ مٛ عٜڢٜسُسْ، عٛ مَوْطٛ!» 29حَالَ کَعَ نَسْتِنِ بٜرْنِوٛلْ ندٜرْ جِيࢡٛتِرَلْ مَنغَلْ؞ ࢡٜنَنغِ وٛنْدِطِّرَاࢡٜ ݠٛلْ طِطٛ، غَيُسْ عٜ عَرِسْتَرْکُسْ عِوْࢡٜ مَکٜدٛنِيَ، لَوْ ࢡٜ ڢُو ࢡٜنجَحْرِ ࢡٜ حَا بَبَلْ ڢِجِرْدٜ؞ 30ݠٛلْ بٛو يِطِنٛ يَحُغٛ حَا مٛوࢡْرٜ مَنْ، عَمَّا نُطِّنْࢡٜ کَطِمٛ؞ 31مَوْࢡٜ لٜسْدِ عَسِيَ، لَاتِيࢡٜ سٛوبِرَاࢡٜ مَاکٛ، نٜلِ حَا مَاکٛ، تٛرِمٛ تَا عٛيَحَ حَا بَبَلْ ڢِجِرْدٜ؞ 32جِيࢡٛتِرَلْ عُمِّ شَکَ مٛوࢡْتٛرْدٜ؞ کٛو مٛيْ طٛنْ وٛوکَ، طٛنْ وٛلْوَ کٛ عٛيِطِ، نغَمْ ࢡُرْنَ يِمْࢡٜ عَنْدَا دَلِيلَ کَيٜ حَوْتِ ࢡٜ؞ 33يَحُودُعٜنْ نجَحْرِ عَلٜکْسَنْدِرٜ يٜىٰسٛ؞ وٛطْࢡٜ مَࢡّٜ مَاتِنِمٛ؞ ندٜنْ عٛࢡَنغْتِ جُنغٛ نغَمْ وَنغِنْغٛ حُجَّ مَاکٛ يٜىٰسٛ مٛوࢡْرٜ؞ 34عَمَّا ندٜ ࢡٜعَنْدِتِ عٛ يَحُودُوجٛ، ࢡٜتٛکِّ حٛولُغٛ حَوْتَادٜ دٛوْ حَالَ نغٛوتَ بَاکِنْ سَاعِيجِ طِطِ: «عَرْتٜمِسْ مٛ عٜڢٜسُسْ، عٛ مَوْطٛ! عَرْتٜمِسْ مٛ عٜڢٜسُسْ، عٛ مَوْطٛ!»
35بٜى دَکٜرْ بِنْدٛووٛ مَوْطٛ مٛ بٜرْنِوٛلْ دٜعِّتِنِ مٛوࢡْرٜ، عٛوِعِ: «يَا عٜڢٜسُعٜنْ! کٛو مٛيْ عَنْدِ بٜرْنِوٛلْ عٜڢٜسُسْ طٛنْ عَيْنَ سُودُ عَرْتٜمِسْ مَوْطٛ عٜ سُورَ مَارُ دٛعِّيندُ دِغَ عَسَمَ؞ 36وَلَا بَاوَنْطٛ يٜدُّغٛ طُمْ؞ نغَمْ مَاجُمْ سٜيْ عٛنْ ندٜعِّتَ، تَا نجَاوَنٜ کٛو طُمٜ؞ 37يِمْࢡٜ ࢡٜ عٛنْ نغَدِّ حَا طٛ نغُجَّايْ کُوجٜ سُودُ سٜنِيندُ، ࢡٜمبٛلْوَايْ بٛو کَلُّکَ دٛوْ طٛوَنْتٜىٰطٛ مٜنْ؞ 38تٛ دٜمٜتِرِيُسْ عٜ وَطٛوࢡٜ سَنَاعَ وٛنْدُࢡٜ بٜى مُوطُمْ نغٛودِ وُلَّاندُ دٛوْ غٛطّٛ، ندِکَّ ࢡٜنجَحَ نٛکُّورٜ کِيتَ، يٜىٰسٛ حِيتٛوࢡٜ، ࢡٜنغُلّٛتِرَ؞ 39عَمَّا تٛ وٛودِ کٛ عٛنْ تٜڢَتَ ڢٜىٰرٜ، مٛوࢡْتٛرْدٜ دَغِيندٜ لَارَنْ حَالَ مَنْ، 40نغَمْ ࢡٜݠٛتِ عَيْبِنْغٛ عٜنْ دٛوْ کٛ وَطِ حَنْدٜ بٜى وِعْغٛ عٜنْ مبَطِ تُورْتٛلْ، نغَمْ عٜنْ نغَلَا دَلِيلَ مٛوࢡْتُغٛ بَنَ نِي؞ ندٜ عٛتِمِّنِ وٛلْوَنْغٛ ࢡٜ، عٛسَنغْکِتِ ࢡٜ؞»
Currently Selected:
کُوطٜ نٜلَابٜٔ 19: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
