Salmow 39
39
SALM 39.
Dixi, custodiam.
1Yn-medhav, ‘My a with ow fordhow : rag na begghiv gans ow thaves.
2My a with ow ganow gans fronn : hedre vo an tebelwas y'm gwel.’
3Avlavar en vy, ow tewel : kosel en vy, heb hebaska.
4Ow galar a wethhas, toemm o ow holonn ynnov vy : ha my ow prederi, an tan a dhewis, ha my a gewsis gans ow thaves;
5Arloedh, gwra dhymm godhvos ow diwedh, ha pyth yw musur ow dydhyow : may hwodhviv hirder ow bewnans.
6Otta, ty re wrug ow dydhyow avel nebes dornvedhi : ha'm oes yw avel travyth a-dheragos; yn hwir, pub den a sev avel anall.
7Rag den a gerdh avel skeus; yn hwir ev yw troblys yn euver : ev a wra bern a rychys ha ny woer piw a'n kuntell.
8Ha lemmyn, A Arloedh, pyth yw ow govenek : ynnos jy yma ow fydhyans.
9Gwra ow delivra dhiworth ow hammwriansow oll : na wra dhymm bos skorn an den fol.
10Avlavar en vy, ny igeris vy ow ganow : rag ty yw neb a wrug hemma.
11Kemmer dha strekys dhiworthiv : dre voemmenn dha leuv yth av vy dhe goll.
12Pan geredhydh den, ow kessydhya kammweyth, ty a wra dh'y dekter teudhi dhe-ves kepar dell wra an goedhan : yn hwir, anall yw pub den.
13Klew ow fysadow, A Arloedh, ha ro skovarn dhe'm kri : na vydh tawesek orth ow dagrow.
14Rag alyon ov vy genes : godriger, avel ow thasow oll.
15Mir dhe-ves dhiworthiv, may fiv kennerthys : kyns my dhe dhiberth, heb bos namoy.
Currently Selected:
Salmow 39: ASK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
