Sirach (Ecclesiasticus) 32
32
CAB. XXXII.
1My t’ou jeant mainshtyr ny cuirraghyn, ny gow rouyr stayd ort, agh ymmyrk oo hene myr fer jeh’n cheshaght: jeeagh nagh bee laccal erbee orroo, as eisht soie sheese mâroo.
2As erreish dhyt v’er n’yannoo ooilley dty churrym, gow kione y vuird, as jean gien mie mâroo, dy vod oo moylley y gheddyn son rere jesh ny cuirraghyn.
3Loayr uss ta by-hinney, son te cheet jesh dhyt, agh loayr dy keeayllagh, as ny jean y kiaulleeaght y lhiettal.
4Ny gow lane taggloo ort raad ta’n kiaulleyder, as ny soilshee dty cheeayll ayns traa neu-chooie.
5Ta kiaulleeaght vingys ec gien-feeyney, myr seal carbuncle soit ayns airh.
6Myr seal emerald ta soit ayns obbyr airh, lheid cheddin ta kiaull vingys lesh gien-feeyney.
7Loayr, ghooinney aeg, my vees feme ort: agh loayr dy twoaiagh imlee.
8Abbyr ny t’ayd dy ghra ayns beggan goan lesh lane bree: bee myr fer ta toiggal, agh ny-yeih ta smaghtaghey e hengey.
9My t’ou ayns sheshaght deiney mooarey, ny jean oo hene corrym roo; as tra t’ou fenish y chenndeeaght, bee sparailagh jeh dty ghoan.
10Ta’n tendreil goll roish y taarnagh, as foayr er-eiyrts y dooinney naaragh.
11Trog ort ayns traa mie, as ny bee yn er s’jerree, agh fow thie fegooish lhiggey shaghey.
12Ayns shen smooinee ort hene, as jean myr s’jesh dhyt: agh ny jean peccah liorish goan mooaralagh.
13As son ny reddyn shoh bannee dty er-croo, t’er lhieeney oo lesh e vannaghtyn.
14Nee quoi-erbee, ta goaill aggle roish y Chiarn, jannoo soiagh jeh’n ynsagh echey, as nee adsyn ta shirrey eh dy leah foayr y gheddyn.
15Bee eshyn ta shirrey leigh Yee er ny lhieeney lesh, agh bee eh oyr peccah da’n chrauee-oalsey.
16Nee adsyn ta goaill aggle roish y Chiarn briwnys y gheddyn, as nee ad cairys y oaddey myr soilshey.
17Cha gow drogh-ghooinney rish e oiljyn; agh yiow eh leshtal rere e aigney hene.
18Nee dooinney keeayllagh smooinaghtyn er hene; agh cha bee yn dooinney quaagh mooaralagh dauntit lesh aggle, eer tra t’eh er n’yannoo er e yoïn hene.
19Ny jean nhee erbee fegooish coyrle vie, as tra t’ou er n’yannoo shen, cha bee oyr arrys ort.
20Ny immee er raad dangeragh tuittym, er-aggle dhyt snapperal er ny claghyn.
21Jeeagh royd, eer ayns raad rea:
22As bee er dty hwoaie jeh dty chloan hene.
23Ayns dy chooilley obbyr vie treisht gys Jee veih dty annym; son myr shoh t’ou freayll ny annaghyn.
24Eshyn ta credjal ayns y Chiarn t’eh beasagh gys yn anney, as cha jean eshyn farrail veg smessey ta coyrt e varrant er.
Currently Selected:
Sirach (Ecclesiasticus) 32: YNAP
Highlight
Share
Compare
Copy
Want to have your highlights saved across all your devices? Sign up or sign in
Published by the Society for Promoting Christian Knowledge (SPCK) in 1773.