Sirach (Ecclesiasticus) 21
21
CAB. XXI.
1My vac, vel oo er n’yannoo peccah? ny jean y lheid arragh, agh shir leih son ny peccaghyn t’ou er n’yannoo.
2Chea veih peccah, myr veih eddin yn ard-nieu: son my hig oo ro aggys da, lhottee eh oo: ta ny feeacklyn echey myr feeacklyn lion, stroie anmeenyn deiney.
3Ta dy chooilley pheccah goll-rish cliwe dy ghaa-foyr, cha vod ny lhottyn echey v’er ny lheihys.
4Dy vaggyrt, as dy yannoo aggair, nee stroie berchys: myr shoh vees thie deiney mooaralagh jeant ny hraartys.
5Ta padjer ass beeal dooinney boght roshtyn gys cleayshyn Yee, as ta e vriwnys cheet dy tappee.
6Eshyn nagh gow rish oghsan v’er ny choyrt da, t’eh ayns raad drogh leih; agh eshyn ta goaill aggle roish y Chiarn, ghoys arrys veih e chree.
7Ta dooinney tagglooagh as eh cronnit foddey as gerrit, agh ta dooinney tastagh toiggal tra t’eh skirraghtyn.
8Eshyn ta troggal e hie lesh argid eeasit, ta goll-rish fer ta chaglym claghyn da hene, son e lhiaght-oanluckee.
9Ta co-chruinnaght ny mee-chrauee myr kionnan dy lieen-barree: dy ve stroit fy-yerrey ayns blaze dy aile.
10Ta raad peccee jeant rea lesh claghyn, agh te goaill jerrey ayns ooig niurin.
11T’eshyn ta freayll leigh yn Chiarn geddyn tushtey jeh: as ta aggle y Chiarn bun creenaght.
12Eshyn nagh vel creeney, cha gow eh ynsagh: agh ta creenaght ayn ta bishaghey sneih-aigney.
13Nee tushtey dooinney creeney bishaghey myr thooilley: as ta’n choyrle echey goll-rish farrane glen dy vea.
14Ta cree yn ommydan myr saagh brisht, as cha gum eh tushtey choud as t’eh bio.
15My chlinnys dooinney tushtagh raa-creeney, ver eh moylley da, as goaill huggey hene eh; agh tra chlinnys yn ommydan y lheid, te jannoo corree jeh, as t’eh cur cooyl rish.
16Ta taggloo yn ommydan myr errey-lhiettal ’sy raad; agh bee grayse ry-gheddyn ayns meillyn y dooinney creeney.
17T’ad goaill coyrle ec beeal y dooinney creeney ayns y whaiyl, as nee ad smooinaghtyn er e ghoan ayns nyn gree.
18Ta creenaght yn ommydan goll naardey myr tholtan; as ta tushtey yn vee-cheeayllagh goll-rish glare branlaadee.
19Ta ynsagh da ommydanyn myr lankeid er e chassyn, as geulaghyn er e laue yesh.
20Ta’n ommydan troggal seose e choraa lesh ard-gharraghtee, agh son y dooinney creeney s’coan t’eh er ny chlashtyn.
21Ta ynsagh myr jewel airh da dooinney creeney, as myr bracelet costal er e roih yesh.
22Ta cass yn ommydan ro-vennick taaghey thie e naboo: agh raad ta dooinney mie-ynsit bee nearey er jannoo y lheid.
23Nee ommydan peeikearagh stiagh er dorrys; agh nee eshyn ta mie-ynsit shaghney shen.
24Te drogh-ynsagh ayns dooinney dy eaishtagh ec y dorrys: agh nee dooinney creeney shaghney lheid yn oltooan.
25Bee meillyn ny beealeree loayrt jeh cooishyn nagh vel bentyn daue: agh ta goan deiney tushtagh er nyn dhowse ayns ny meihaghyn.
26Ta cree ny mee-hushtee ayns nyn meeal, agh ta beeal y vooinjer chreeney ayns nyn gree.
27Tra ta’n vee-chrauee gwee mollaght da Satan, t’eh gwee mollaght da’n annym echey hene.
28Ta tutler tayrn loght er e annym hene, as t’eh dwoaiagh cre theihll t’eh cummal.
Currently Selected:
Sirach (Ecclesiasticus) 21: YNAP
Highlight
Share
Compare
Copy
Want to have your highlights saved across all your devices? Sign up or sign in
Published by the Society for Promoting Christian Knowledge (SPCK) in 1773.