PANURIRANG SEPANIA Bindu 2
Bindu 2
Sosososo tu hamubaon ni roha 1-3.
Lumbalumba ni torutoru dompak angka bangso ni Kanaan 4-11.
Dompak Kus dohot Ninive, huta sabungan ni Assur 12-15.
I. 1Tungki ma hamu jala mardangoldangol; ho ale bangso na so umboto na maila! 2Tagan so songgop dope uhumi, * songon hurangkam do laho salpu ari, tagan so songgop dope tu hamu parpiar ni rimas ni Jahowa, tagan so songgop dope tu hamu ari pangarimasan ni Jahowa. #Job 21:18; * Ps 1:4, 35:5 3Lulu i ma Jahowa, sude hamu, ale angka na unduk roha di tano on, hamu angka na mangaradoti uhumna; lulu i hamu ma hatigoran, lulu i haserepon, anggiat tung diondingi hamu di ari pangarimasan ni Jahowa. #Joel 2:14; Am 5:15; Jona 3:9
II. 4Ai ingkon tarulang do Gasa sogot, jala Askelon gabe halongonan; ingkon tarlele di hos ni ari ianggo Asdod, jala ingkon pabalihonna ia Ekron. #Jer 47:4 5Marjea ma hamu angka isi ni luat martopihon laut, bangso ni halak * Heret i! Manginona ma hata ni Jahowa tu ho, ale Kanaan, + tano ni halak Palistim, jala agoonku ma ho, asa unang be marpangisi nanggo sada. #* 1Sam 30:14; + Jer 47:1-7 6Jala gabe jampalan do luat martopihon laut, jala panjampalan ni angka birubiru. 7Jadi pasipasi ni bangso Juda nampuna luat i, nasida marmahan disi, di bagasan angka jabu sian Askelon nasida mangulon bodarina i; ai marpangulahi roha ni Jahowa, Debatanasida mida nasida, jala * mulak boanonna sogot angka na tarbuang sian nasida. #* Sep 3:20 8Nunga hubege panginsahion ni * Moab dohot reherehe ni + halak Amon, angka na mangarehei bangsongki, jala manenganenga nasida taringot tu parbalohannasida i. #* Jer 48:1-47; Hes 25:6, 8; + Jer 49:1 9Dibahen i songon sintongna mangolu ahu, ninna Jahowa Zebaot, Debata ni Israel: Ingkon tudoshon * Sodom do Moab sogot, jala tudoshon Gumora angka anak ni Amon, hatubuan ni latong, jala panombangan sira, jala halongonan ro di salelenglelengna. Ingkon pasipasi ni bangsongki martaban nasida sogot, jala ebaeba ni bangsongki tumean nasida. #* 1Mus 19:24; Ps 107:34; Jer 17:6 10I ma songgop tu nasida, balos ni hajungkatonnasida, ala mangarehei nasida, jala manenganenga dompak bangso ni Jahowa Zebaot. 11Songkal ma Jahowa idaon nasida, ai rasiponna ma nasa debata sileban di tano on, gabe marsomba tu ibana ganup sian ingananna, sude angka pulo ni bangso parbegu. #Jes 60:9
III. 12Nang hamu ale * halak Kus, ingkon bunuon ni podangku do hamu. #* Hes 30:9 13Dipatoltol ibana huhut tanganna dompak utara, jala agoonna ma Assur, jala bahenonna Ninive gabe halongonan, hasang songon parhorsihan. #Nah 1:1, 14 14Jadi * mangulon ma di tongatongana, angka parduan, sude angka binatang harangan, + nang sipauk, nang tanggiling marborngini di angka galapangnasida. Tarbege do suara parendeon di bagasan pandiloan, pangulangan di lobulobu; ai nunga diloha ibana parhau ares. #* Jes 13:21; + Jes 34:11 15I ma huta na riburan, na nalom maringanan, na mandok di bagasan rohana: * Ahu do bongkai dungkon ni ahu ndang adong! Songon dia do pangulangna disi, gabe pangulonan ni angka binatang panoro! Ganup na mamolus sian i bursikanna do, topaponna tanganna. #* Jes 47:8
Batak Toba Bible Revised Edition © Indonesian Bible Society, 1998.