ENDE NI ANGKA ENDE SIAN SI SALOMO Bindu 7
Bindu 7
Udut ni pujipujian di oroan ni rajai 1-14.
1Mulak ma ho, ale Sulam, mulak ma, mulak ma, mulak ma ho tutu, asa huida hami ho! Tung aha ma idaonmuna di Sulam. Tudos do ibana tu parsaroan * Mahanaim. #* 1Mus 31:1-2 2Denggan ni pangealmi mangalangka di bagasan sipatum, ho ale boru ni raja na sangap! Pangibul ni gontingmu, songon simata godang, hira jadijadian ni tangan ni halak na pande. 3Ampuanmu hira panginuman na hibul do, ndang jadi hurangan di siinumon na pang. Butuham hira eme di bolagan na hinaliangan ni bunga pansur. 4Ia adopmu na dua i, hira anak ni ursa dua, hira anak ni hije na linduat. #Ende 4:5 5Rungkungmu hira tungkup sian gading; matam hira tobat angka na di Hesbon, mardonokkon harbangan ni huta na rame, igungmu hira tungkup panatapan ni Libanon, manatap dingkan Damaskus. #Ende 4:4 6Ia ulum di atasmu hira Karmel do, jala obukmu na janggejangge hira paspasan baliga hodong do, pola tarpulut roha ni rajai dibahen pandandanan ni obukmu. 7Tung na uliutus do ho, jala na lambok do, ho ale boru hasian binahen ni hinaulim! #Ende 1:15, 2:14 8Partubum on hira harambir do, jala adopmu hira saraungan parbue ni anggur. 9Jadi ninna rohangku ma: Hupanaek na ma harambir on, asa huhaol dangkadangkana; jala adopmu na dua i, ingkon hira saraungan parbue ni anggur di ahu, jala parhosa ni igungmu, hira uap ni unte manis. 10Ia tolonanmu hira anggur na denggan, lambok tahe mabaor diinum hasudungan ni rohangku, jala pagirgir mangkatai bibir ni halak na mondokondok. 11Ahu do nampuna * hasudungan ni rohangku, jala tu ahu do laho sihol ni rohana. #* Ende 2:16, 6:2 12Antong ho ale hasudungan ni rohangku, beta hita ruar tu ladang, asa marborngin hita di angka sosor. #Ende 2:10-13 13Sogot pe hita hehe manogot laho manogot angka porlak anggur, maningkir * manang naung martumbur hau anggur i, jala mangerbang angka bungana, marbunga dohot hau dalimo; disi do patuduhononku tu ho holong ni rohangku! #* Ende 6:11 14Disi ma maruap angka * parbue dudaim, jala di atas pintu ni jabunta parbue marragamragam, angka na arga, angka nambura dope, dohot naung leleng, angka na hupajop di ho, ale hasudungan ni rohangku. #* 1Mus 30:14
Currently Selected:
ENDE NI ANGKA ENDE SIAN SI SALOMO Bindu 7: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.