ROM Bindu 12
Bindu 12
Sipaingot mangulahon haserepon dohot haholongon ni roha.
1Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha. #Rom 6:13; 1Ptr 2:5 2Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan. #Eps 4:23, 5:10, 17 3Ai marhite sian asi ni roha na nilehonna tu ahu, hupaingot ma ganup hamu: Unang ma torbang rajumi hamu dirimu, lobi sian na patut; alai intap ni na tama ma parrohaonmuna: Ganup marguru tu godang ni haporseaon na tinurpukkon ni Debata tu ibana. #1Kor 12:11; Eps 4:7 4Umpamana: Torop do ruas di dagingta, alai ndada saulaon ruas i sude: #1Kor 12:12 5Songon i do hita: Torop sadaging di bagasan Kristus, alai ruas bé do hita sama hita. #1Kor 12:27; Eps 4:25 6Ganup manjalo silehonlehon marguru tu ragam ni asi ni roha na tinurpukkonna tu hita: Ia panurirangon, naeng ma mardomu tu haporseaon. #1Kor 12:4 7Ia ulaon marhobas, ba ulaon marhobas ma; ia haguruon, i ma! #1Ptr 4:10-11 8Ia pangapoion, i ma; ia na mangasii, sian bulus ni roha ma; ia na manguluhon, marringgas ni roha ma; ia na marbasabasa, sian las ni rohana ma! #Mat 6:3; 2Kor 8:2, 9:7 9Unang ma marpangansi holong ni roha i! Hagigihon hamu ma na jat; pareak hamu ma na denggan! #Am 5:15; 1Tim 1:5 10Ingot hamu ma holong ni roha sama dongan Kristen! Masijolojoloanan ma hamu masipasangapan! #Plp 2:3; 2Ptr 1:7 11Unang sumurut ringgas ni rohamuna! Partondi na girgir ma hamu! Oloi hamu ma Tuhan i! #Pgk 3:15 12Marlas ni roha ma hamu mangkirim! Marbenget ni roha ma di haporsuhon! Jugulhon hamu ma tangiang! #1Tes 5:17 13Antoi hamu ma na hasea di angka na badia! Haringkothon hamu ma partamueon! #Heb 13:2 14Pasupasu hamu ma angka na paburuburu hamu; pasupasu ma antong, unang bura i! #Mat 5:44; Ul 7:60; 1Kor 4:12 15Marlas ni roha ma hamu rap dohot angka na marlas ni roha, jala tangis ma hamu rap dohot angka na tangis! #Ps 35:13 16Sada ma rohamu sama hamu: Unang hatimboon pingkiri hamu, alai patutoru hamu ma rohamu tu haserepon; unang parbisuk hamu di rohamu! #Jes 5:21; Rom 15:5 17Unang baloshon hamu na jat alo ni na jat; ringkoti hamu ma na denggan di jolo ni halak saluhutna! #1Tes 5:15 18Molo tarbahen, intap na tarpatupa hamu, tiop hamu ma dame maradophon halak saluhutna! #Mrk 9:50; Heb 12:14 19Hamu, angka na hinaholongan, unang hamu marlulu; pasahat hamu ma rimas i (tu Debata), ai tarsurat do: “Di Ahu do pamaloson, Ahu pe mamaloshon, ninna Tuhan i.” #3Mus 19:18; 5Mus 32:35; Mat 5:39 20Onpe, jumpa male musum, lehon ibana mangan; jumpa mauas ibana, painum! Ai songon na pagukgukkon gara do ho tu atas uluna, anggo dibahen ho songon i. #Poda 25:21-22; Mat 5:44 21Unang ma talu ho dibahen hajahaton; alai taluhon ma hajahaton i marhitehite na denggan!
Currently Selected:
ROM Bindu 12: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.