PANGUNGKAPON Bindu 9
Bindu 9
Sarune na palimahon dohot 1-12.
Na paonomhon 13-21.
I. 1Dung i dipalu surusuruan na palimahon ma sarunena. Gabe huida ma bintang sada madabu sian langit tu tano i, jadi dilehon ma tu ibana anak hinsu ni ruang parbanua toru. #Pgk 8:10, 20:1 2Gabe diungkap ma ruang parbanua toru i, jadi manaek ma timus sian ruang i songon timus ni pamurunan na balga, gabe mangkolom ma mata ni ari ro di parlangitan, dibahen timus na sian ruang i. #Joel 2:2, 10 3Jadi marruaran ma angka sihapor sian timus i tu tano i, dung i dilehon ma tu nasida huaso songon huaso ni hala di tano on. #2Mus 10:12 4Jadi dipaksa ma nasida, unang disegai duhutduhut ni tano i, manang angka na rata, manang agia sada hau, ia so holan jolma, angka na so marsahap di pardompahanna sian Debata. #Pgk 7:2-3 5Dipaksa do nasida, unang mamusa; sipaporsukporsuhonna do jolma i lima bulan lelengna. Ia porsukna suman tu pangonai ni hala, jumpa didoit jolma. 6Luluan ni jolma ma hamatean di angka ari i, alai ndang jumpangsa; mangido do rohanasida, naeng mate nian, alai maporus do hamatean i sian nasida. #Luk 23:30 7Ia rupa ni angka sihapor i suman do tu hoda, naung hobas tu parmusuon; ia di ulunasida dijujung do tumpal songon sere. Ia bohinasida songon bohi ni jolma do idaon; #Joel 2:4 8ia obuknasida songon obuk ni boruboru, jala iponnasida songon ipon ni singa. #Joel 1:6 9Marbajubaju do nasida suman tu bajubaju bosi; ia pangkuling ni habonghabongnasida songon soara ni torop hureta na tinait ni hoda, na marlojong tu tongtangan. #Joel 2:5 10Marihur nasida songon ihur ni hala na marsorop; laos di bagasan ihurnasida do huasonasida, i ma na mangago angka jolma, leleng ni lima bulan. 11Ia raja na manggomgom nasida, surusuruan sada sian banua toru, na margoar Abdon di hata Heber; ia di hata Junani Apollion do goarna. 12Nunga salpu jea na parjolo; ida ma, na ro ma jea dua nari, dung salpu on! #Pgk 11:14
II. 13Dung i dipalu surusuruan na paonomhon na sarunena. Jadi hubege ma sada soara sian na opat suhi ni langgatan sere na di jolo ni Debata. #2Mus 30:2, 10 14On do hatana tu surusuruan paonomhon na marsarune i: Harhari ma surusuruan na opat na tambat di topi ni batang aek Euprat na balga i! #Pgk 16:12 15Jadi malua ma surusuruan na opat i, angka naung pinarade, asa hobas di ombasna, di arina, di bulanna, di taonna, laho mambunu sapartolu ni hajolmaon. #Pgk 8:7 16Ia torop ni angka parporang na mangkunduli hoda, dua loksa hali loksa do; hubege do bilangannasida. 17Songon on do huida di bagasan tondingku angka hoda nang angka na mangkundulisa: Dialithon do angka bajubaju partahanan na songon api deba, na deba angka na rara, na deba angka na gorsing songon barerang. Ia ulu ni angka hodanasida songon ulu ni singa; na puas do sian babanasida api mardongan timus dohot barerang. #Job 41:10; Joel 2:3 18Hinorhon ni haporsuhon na tolu i tarbunu do sapartolu ni hajolmaon, i ma hinorhon ni api dohot timus dohot barerang, angka na puas sian babanasida. 19Ai di bagasan angka babanasida dohot ihurnasida do gogo ni angka hoda i, ai suman tu ulok do angka ihurnasida, angka na marulu; marhitehite i do nasida mangago. 20Anggo angka jolma na tading, na so binunu ni angka haporsuhon i, laos so dipauba do rohanasida, tumadingkon niula ni tangannasida, asa unang be nian marsomba nasida tu sibolis manang tu ajiajian, angka na sian sere, sian perak, tombaga, hau dohot batu, angka na so tarbahen marnida manang marbinege manang mardalan pe. #Ps 115:4, 135:15; 1Kor 10:20; Pgk 16:11, 21 21Ndang dipauba nasida rohanasida tumadingkon pamunuon nang na pauli rasun nang parmainanon ro di panangkoon.
Currently Selected:
PANGUNGKAPON Bindu 9: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.