PANGUNGKAPON Bindu 5
Bindu 5
Dijalo Birubiru i buku na marsahap i 1-14.
1Dung i huida ma di tangan siamun ni na hundul di habangsa i sada buku, naung sinuratan sian bagasan nang sian duru, naung sinahap dohot pitu sahap. #Hes 2:9-10 2Jadi huida ma sada surusuruan na marsahala, na marsoara na gogo mamaritahon: Ise do na tau mangungkap buku i jala mangkarhari angka sahapna i? 3Alai ndang adong manang ise di banua ginjang nang di tano nang di toru ni tano, na tarbahen mangungkap buku i manang marnida tubagasan. 4Gabe tangis situtu do ahu, ala so adong jumpang agia ise, na tau mangungkap buku i nang marnida tubagasan. 5Dung i didok sada sian angka sintua i ma mandok ahu: Unang ho tangis; nunga monang Singa i, na sian marga Juda, urat ni si Daud, laho mangungkap buku i dohot sahapna na pitu i. #1Mus 49:9-10; Jes 11:1, 10; Pgk 22:16 6Jadi di parsitongaan ni habangsa i, di tongatonga ni na opat parngolu dohot angka sintua i, huida jongjong sada Birubiru, songon naung tarbunu, pitu do tandukna jala pitu matana, i ma na pitu Tondi ni Debata, na sinuruna tu liat tano on. #Jes 53:7; Sak 4:10; Joh 1:29, 36 7Dung i ro ma Ibana, dijalo ma buku i sian tangan siamun ni na hundul di habangsa i. 8Asa dung dijalo buku i, manungkap ma na opat parngolu i dohot na duapulu opat sintua i di jolo ni Birubiru i; ganup nasida maniop sada hasapi dohot sada saoan sere gok angka na hushus, i ma tangiang ni angka na badia. #Ps 141:2; Pgk 14:2, 15:2 9Diendehon nasida ende na imbaru, ninna ma: Na tama do Ho manjalo buku i jala mangungkap angka sahapna, ai naung tarbunu do Ho jala marhitehite mudarmu ditobus Ho do tu Debata jolma sian saluhut marga, hata, houm dohot bangso. #Ps 144:9; Pgk 14:3 10Jala dijadihon Ho do nasida gabe harajaon hamalimon di Debatanta, asa manggomgomi nasida di atas tano i! #2Mus 19:6; Jes 61:6; Pgk 1:6 11Dung i mamereng ma ma ahu, gabe hubege ma songon soara ni torop surusuruan humaliang habangsa i, nang soara ni angka parngolu i dohot angka sintua i; ia toropnasida marloksaloksa jala marriburibu. #Dan 7:10 12Marsoara na gogo nasida mandok: Na tama do Birubiru naung tarbunu i manjalo hagogoon dohot hamoraon dohot hapistaran dohot sahala dohot hamuliaon dohot hasangapon dohot pujipujian! #Jes 53:7; Pgk 4:11 13Gabe hubege ma soara ni nasa na tinompa, angka na di banua ginjang, di tano, ditoru ni tano ro di na di laut, tung saluhutna na di bagasan angka i mandok: Pujipujian dohot hamuliaon dohot hasangapon dohot hagogoon ro di salelenglelengna ma di Ibana, na hundul di habangsa i dohot di Birubiru i! 14Jadi didok na opat parngolu i ma: Amen! Laos manungkap ma angka sintua i huhut marsomba. #Pgk 19:4
Currently Selected:
PANGUNGKAPON Bindu 5: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.