PANGUNGKAPON Bindu 19
Bindu 19
Ende pujipujian di tigor ni uhum ni Debata 1-4.
Ari raya hasampuran ni Birubiru i 5-10.
Hataridaan dohot hamonangan ni Kristus 11-21.
I. 1Dung salpu i, hubege ma di banua ginjang soara na gogo songon sian torop halak, na mandok: Halleluya! Rimpun di Debatanta do haluaon dohot hasangapon dohot hagogoon! #Ps 104:35; Pgk 11:15 2Ai na sintong jala na tigor do angka uhumna, ai nunga diuhumi Ibana boruboru na jahat, na balga i, naung mangago tano on binahen ni parmainanonna, jala diluluhon Ibana do mudar ni naposona sian tanganna. #5Mus 32:43; Pgk 16:7 3Dung i didok nasida ma paduahalihon: Halleluya! Na manaek do timusna ro di salelenglelengna! #Jes 34:10 4Jala manungkap ma sintua na duapulu opat i ro di parngolu na opat i laho sumomba Debata, na hundul di habangsa i, angka ninna ma: Amen! Halleluya! #Ps 106:48; Pgk 5:14
II. 5Jadi ruar ma sada soara sian habangsa i na mandok: Puji hamu ma Debatanta, hamu saluhut naposona, na mangkabiari Ibana, angka na metmet nang angka na balga! #Ps 22:24, 115:13 6Dung i hubege ma songon soara ni natorop situtu, songon soara ni aek godang, songon soara ni angka ronggur na gogo, na mandok: Halleluya! Ai nunga mangarajai Tuhan Debatanta, Sigomgom saluhutna! #Ps 93:1; Hes 1:24 7Marlas ni roha ma hita jala mariaia, jala talehon ma tu Ibana hasangapon, ai nunga jumpang hasampuran raya ni Birubiru i; nunga hobas soripadana. #Ps 118:24; Pgk 21:2, 9 8Nunga dilehon tu ibana abit na saksak jala na ias sialithononna. Ia abit na saksak i, i ma hapintoron ni angka na badia. #Ps 45:14-15; Jes 61:10 9Laos didok ma tu ahu: Surathon ma: Martua do angka na jinou tu panganon ujuan ni Birubiru i! Jala didok do tu ahu: On do angka hata na sintong na sian Debata! #Luk 14:15 10Jadi manungkap ma ahu tujolo ni patna, sumomba ibana, gabe didok ma tu ahu: Unang ma songon i! Donganmu naposo do ahu jala dongan ni angka hahaanggim, angka naung manjalo panindangion sian Jesus. Debata do sisombaonmu! Ai panindangion taringot tu Jesus i do tondi panurirangon. #Ul 10:25-26; Pgk 12:17, 22:8
III. 11Dung i huida ma mungkap banua ginjang, tarida ma disi sada hoda sihapaspili; ia na hundul di ginjangna margoar Haposan jala Parsintong. Marhatigoran do Ibana manguhum jala marporang. #Jes 11:4-5; Pgk 6:2 12Alai songon nala ni api do anggo matana, torop do tumpal harajaon di uluna; adong do Goarna tarsurat, na so binoto ni manang ise, ia so holan Ibana. #Pgk 1:14, 2:18 13Diuloshon do abit na tinubar tu mudar, didok do Goarna: Hata ni Debata. #Jes 63:1-2; Joh 1:1 14Mangihut do tu Ibana angka parangan na di banua ginjang, angka na mangkunduli hoda sihapaspili; haen na saksak jala na ias do abitnasida. 15Na ruar do podang na tajom sian pamanganna, asa i tampulhononna tu angka bangso. Parmahanonna ma nasida dohot tungkot bosi, jala Ibana do mandege pangilangan ni anggur pangarimasan ni muruk ni Debata, Sigomgom saluhutna. #Ps 2:9; Jes 63:3 16Na tarsurat do Goarna di ulosna nang di gontingna: Raja ni angka raja jala Tuhan ni angka tuan. #1Tim 6:15; Pgk 17:14 17Dung i huida ma sada surusuruan jongjong di bagasan mata ni ari, na manjoujou marsoara na gogo, didok ma tu saluhut pidong angka na habang martongatonga langit: Ro ma hamu, marpungu ma hamu tu panganon na balga, na pinarade ni Debata! #Hes 39:4, 17-20 18Naeng ma allangonmu sibuk ni angka raja dohot sibuk ni angka induk dohot sibuk ni angka pargogo dohot sibuk ni angka hoda ro di na hundul di ginjangna, sibuk ni angka anak mata dohot hatoban, nang na metmet nang na balga! #Pgk 6:15 19Jadi huida ma binatang i dohot angka raja ni tano on ro di angka parangannasida, nunga marluhut laho marmusu dompak na hundul di atas hoda i nang dompak angka paranganna. #Ps 2:2; Pgk 16:14, 16, 17:12-14 20Gabe tartangkup ma binatang i rap dohot panurirang pargapgap i, naung mambahen angka tanda di jolona, parhiteanna paotootohon angka na manjalo partinandaan ni binatang i ro di angka na sumomba gombaranna. Mangolu do na dua i didabu tu laut api na marsigorgor mardongan barerang. #Dan 7:11, 26; Pgk 13:11-17, 20:10 21Ia angka na tading i dipusa do dohot podang na ruar sian pamangan ni na mangkunduli hoda i, gabe butong ma saluhut pidong dibahen sibuknasida.
Currently Selected:
PANGUNGKAPON Bindu 19: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.