PSALMEN Bindu 78
Bindu 78
Ende sipodaon bahen parningotan di angka panoguon ni Debata tu halak Israel 1-72.
Ende sipodaon sian si Asap. 1Hamu ale bangsongku, sai tangihon hamu ma podangkon! Paeleng hamu ma pinggolmuna tu angka hata ni pamangankon. 2Bungkaonku ma pamanganku mandok umpama, manurasihon hulingkulingan sian na robi. #Ps 49:4-5; Hes 17:2; Mat 13:35 3Angka naung tabege jala na itaboto dohot * na pinajojor ni angka ompunta tu hita. #* 2Mus 13:14; 5Mus 4:9-10; Ps 41:2; Joel 1:3 4Ndang porsoonta tu anaknasida, tu sundut na singkat sogot; baritahononta do angka pujipujian ni Jahowa ro di hagogoonna dohot halongangan, angka na binahenna i. 5Ai nunga dipatindang Ibana sada panindangion di Jakkob, jala dibahen do sada patik di Israel, na tinonahonna tu angka ompunta, asa * dipabotohon nasida tu anaknasida i. #* 2Mus 10:2, 13:14; 5Mus 4:9, 23, 6:6-25 6Asa diboto sundut na singkat sogot, anak angka situbuhononhon dope; ia dung magodang nasida, asa dipaboa muse tu anaknasida. 7Asa dibahen nasida Debata haposannasida i, jala unang dihalupahon angka pambahenan ni Debata, jala dijujur angka patikna i. 8Asa unang nasida doshon ompunasida, * sundut na marbalik dohot panggunturi, sundut na so patoguhon rohana, jala ndang marsihohot tondina tu Debata. #* 5Mus 32:5-6, 28 9Anak ni si Epraim, angka parsinjata sior, angka na mundar di ari hatongtangan i. 10Ndang diingot nasida padan binahen ni Debata, jala dijua nasida do mangihuthon tu patikna i. 11Jala dihalupahon do angka pambahenanna i dohot halongangan angka na pinataridahonna i tu nasida. 12Dibahen Ibana do halongangan di adopan ni ompunasida i, di tano Misir, di adaran * Zoan. #* 4Mus 13:23; Jes 19:11 13Dibola do laut i patariparhon nasida, jala diunsong do aek i doshon timbunan. #2Mus 14:21-23, 15:8 14Jala ditogihon nasida marhitehite ombun ia arian, jala marhitehite sondang ni api manipat borngin. #2Mus 13:21 15Dibola do angka dolok batu di halongonan jala dipainum nasida doshon aek na marbuhalbuhal godangna. #2Mus 17:1-6; 4Mus 20:7-11 16Jadi ruar ma angka sunge sian dolok batu i jala mabaor songon batang aek. 17Alai sai didatdati nasida dope mardosa dompak Ibana, mangalo Natumimbul i di tano bangkalbangkal. #5Mus 9:7 18Jala sai diunjuni nasida do Debata di bagasan rohanasida laho martungguhon sipanganon guru roharohanasida. #2Mus 16:3; 4Mus 11:4-6, 21:5; 1Kor 10:9 19Jala marmungutmungut dompak Debata, angka ninna ma: Tung tagamon tarpatupa Debata ma padirihon sada meja di halongonan on? 20Ida ma, nunga dilombut Ibana dolok batu i, jadi martihaltihal ma aek, jala gas andalu angka batang aek; tarpatupasa do huhut ulaning mangalehon sagusagu, manang manjadihon juhut di bangsona i? 21Dibahen i dung dibege Jahowa, muruk ma Ibana, gabe marjimburjimbur ma api di Jakkob, marpiarpiar ma huhut rimas dompak Israel. #4Mus 11:1 22Ai ndang dihaporseai nasida Debata jala ndang diparhanalom hatuaonna i. #1Mus 15:6; 4Mus 14:11; 2Kron 20:20; Ps 78:32; Jes 7:9 23Hape lam didokkon Ibana do angka ombun di ginjang, jala diungkap angka pintu ni langit. 24Jala diudanhon tu nasida Manna bahen sipanganon, jala dahanon sian banua ginjang dilehon tu nasida. #2Mus 16:4, 14; Ps 105:40 25Sagusagu ni surusuruan do dipangan nasida be, maradu mahapan di bohal tinongosna i tu nasida. 26Dipahehe do di langit alogo habinsaran, jala ditogutogu do alogo dangsina marhitehite gogona i. #2Mus 10:13 27Dung i diudanhon tu nasida juhut songon orbuk, jala pidong na marhabong songon horsik di laut. #2Mus 16:13-14; 4Mus 11:31 28Jala didekdekkon angka i tu tongatonga ni parsaroanna i, humaliang inganannasida i. 29Jadi mangan ma nasida jala mahapan situtu; jala diparo tu nasida pinangidonasida i. #Ps 106:15 30Ndang dope muli nasida sian pinangido ni rohanasida, ongom dope sipanganonnasida i di pamangannasida: #4Mus 11:33 31Nunga marpiarpiar rimas ni Debata mida nasida, jadi dibunu ma angka na mokmok sian nasida, jala diragehon angka dolidoli ni Israel. 32Luhutna pe songon i, sai didatdati nasida dope mardosa, jala ndang dihaporseai halongangan angka na binahenna i. #4Mus 14:11 33Dibahen i dipasalpu ma ariarinasida maralimos jala manungka do taonnasida i. #4Mus 14:23; Ps 90:1-17 34Molo Ibana mambunu nasida, jadi usouso ma nasida di Ibana, jala mulak nasida pasogothon mangalului Debata. #4Mus 16:32-34, 21:6-9; Jes 26:16 35Jala diingot nasida, Debata do hape * partanobatoannasida i, jala Debata na tumimbul i sipaluanasida. #* 5Mus 32:15, 18, 37 36Dilesemlesem ma Ibana marhitehite pamangannasida, jala dilanasida i manggabusi Ibana. 37Alai ndang marsihohot rohanasida tu Ibana, jala ndang dipasintong nasida padanna i. #Ps 78:8 38Alai anggo Ibana, asi do rohana disesa do dosa, jala ndang disiaphon, jala jotjot do mulak rimasna i dibahen, jala ndang disunggul rimasna apala saluhut. 39Sai diingot rohana do, sibuk do nasida, alogo na laho salpu, jala na so mulak. #Job 7:7; Ps 103:14-16 40Na sai jotjot Ibana dialo nasida di halongonan, jala diarsahi nasida Ibana di tangkaltangkal. #Ps 78:17 41Dung i diulahi nasida muse mangunjuni Debata, jala disarita Nabadia ni Israel. 42Ndang diingot nasida tanganna i, nang ari, na pinaluana i nasida sian sipangarupa. 43Uju pinatindangna i angka tandana di Misir, jala halongangan binahenna i di adaran Zoan. #Ps 78:12 44Jala dipauba angka batang aeknasida i gabe mudar, ro di angka sungenasida, gabe ndang tarinum nasida be. #2Mus 7:14-25 45Ditongoshon tu tongatonganasida lanok angka na manganhon nasida, dohot tohuk angka na mangago nasida. #2Mus 8:6, 24 46Tu tamponok do dilehon suansuanannasida i, jala na niulanasida i tu sihapor. #2Mus 10:4 47Mate do angka hau anggurnasida dibahen ambolas, ro di angka hau antajau. #2Mus 9:25 48Rage do dorbianasida dibahen ambolas, jala disoro porhas do parduaannasida i. #2Mus 9:19-24 49Dipalua do dompak nasida parpiarpiar ni rimasna i, piripiri, rimas dohot hagogotan, saparduan surusuruan ni angka parsorion. 50Dipahornop do dalan ni rimasna i, ndang diolani hosanasida sian hamatean, jala dipasahat do ngolunasida i tu begu antuk. 51Jala diantuk do sude buhabaju di tano Misir, buhabaju ni * haroro ni gogonasida di angka undungundung ni si + Ham. #2Mus 12:29; * 1Mus 49:3; 5Mus 21:17; + Ps 105:23, 27, 106:22 52Dung i dipaborhat ma bangsona songon birubiru, jala diadu nasida songon parduaan di halongonan. #Ps 77:21; Jes 63:11 53Jala tangkas do nasida diiringiring asa unang tarsonggot nasida, alai anggo musunasida i dihungkupi laut do. #2Mus 14:19, 22, 27 54Dung i dipatolhas ma nasida tu parbolatan ni habadiaonna i, tu * dolok on, na nionjar ni siamunna i. #2Mus 15:17; 5Mus 3:25; * Ps 78:68 55Jala dipabali sian jolonasida angka parbegu i, jala didabu tu partaliannasida, jala angka marga ni Israel mangingani undungundungnasida i. #Jos 17:5, 14; Ps 44:3 56Hape diunjuni nasida do muse Debata na tumimbul i, jala dialo, jala ndang diingot nasida angka panindangionna i. #5Mus 6:16-17 57Jala * manginsurut nasida huhut manoisi, suang songon ompunasida i, marbalik ma nasida + songon sior sipaotooto. #* Ps 78:9; + Hos 7:16 58Jala digitihi Ibana marhitehite tambaknasida i, jala dipinggil Ibana marhitehite ganaganaannasida i. #5Mus 32:16, 21 59Jadi dung dibege Debata, tarrimas ma Ibana, gabe gialan situtu ma rohana mida Israel. #Ps 78:21 60Dung i diulang ma ingananna di Silo, undungundung na niingananna di tongatonga ni jolma. #1Sam 1:3, 4:11 61Jala dipasahat * hagogoonna i tu habuangan, jala hamuliaonna poti parpadanan i tu tangan ni sipangarupa. #* 1Sam 4:11, 21-22; 2Kron 6:41; Ps 132:8 62Jala dipasahat bangsona i tu podang, ala tarrimas Ibana mida bangso na niainna i. 63Dipangan api ma angka dolidolina i, jala ndang tarpuji be angka namarbajuna i. #1Sam 22:17 64Marragean do * angka malimna i dibahen podang, jala + ndang mananangisi angka na mabaluna i. #* 1Sam 4:17, 20; + Job 27:15 65Jadi tarsunggul ma Tuhan i songon halak na modom songon ulubalang na marolopolop dibahen anggur. 66Jala dipaundar angka musuna i, haurahon saleleng ni lelengna do dilehon tu nasida. #1Sam 5:6, 9 67Jala dibolongkon undungundung ni si Josep, jala ndang be dipillit marga Epraim. #Ps 78:60 68Marga Juda nama dipillit, dolok Sion na hinaholonganna i. #2Kron 6:6; Ps 87:2 69Jala dipabuntul habadiaonna i sobokkon langit, songon tano on na pinaojakna i * salelenglelengna. #* Ps 102:27; Jes 65:17 70Jala dipillit si Daud, naposona i, jala dibuat do ibana sian parmahanan birubiru. #1Sam 16:11-12 71Sian na mangadu birubiru panusuan ibana dialapi, asa parmahanonna Jakkob, bangsona i dohot Israel bangso na niainna i. #1Sam 17:34; 2Sam 7:8 72Jadi diparmahan ma nasida hombar tu habonaron ni rohana i, jala ditogihon nasida marhitehite hapistaron ni angka tanganna. #2Sam 8:15; Hes 34:23
Batak Toba Bible Revised Edition © Indonesian Bible Society, 1998.