PSALMEN Bindu 139
Bindu 139
Parbinoto na sun jala sigomgom liat portibi on do Debata 1-16.
Tangiang maralohon angka musu ni Debata 17-24.
Ende sian si Daud.
I. 1Ale Jahowa, disulingkit jala ditanda Ho do ahu! #Ps 7:10, 139:23 2Sai diboto Ho do manang na hundul manang na jongjong ahu, gari sian na dao * diantusi Ho do pingkiranku. #Job 42:2; * Jer 17:10 3Manang mardalandalan manang modom ahu, disege Ho do ahu, jala tangkas do diboto Ho angka dalanku sudena. #Job 31:4 4Ai ndang adong nanggo sada hata di atas dilangku, tongon do ale Jahowa, diboto Ho do sudena i. 5Tole sian pudi tole sian jolo dihaliangi Ho do ahu, jala dilinggom tanganmu do ahu. 6Tung masurungku do parbinotoan sisongon i di ahu, matimbohu do, ndang hadongdongan ahu. 7Tung tudia ma tarbahen ahu laho maradophon tondim, jala tung tudia ma tarbahen ahu maporus maradophon bohim? 8Tung sura * manaek ahu tu banua ginjang, disi do Ho, jala tung sura hubahen banua toru podomanku, ida ma disi do Ho. #* Job 26:6; Am 9:2 9Tung sura manginjam ahu di angka habong ni buha siang ari, laho * songgop nian tu bariba ni laut. #* Jona 1:3 10Nang disi sai toguon ni tanganmu do ahu, jala tiopon ni siamunmu ahu. 11Jala tung sura hudok: * Haholomon sambing ma manghungkupi ahu, jadi hatiuron do borngin i humaliang ahu. #* Job 34:22 12Haholomoni pe, ndang mangkolom ianggo di jolom, jala marsinondang do borngin songon arian, songon hatiuron i suang songon i haholomon marimpotimpot. #Jak 1:17 13Ai Ho do na manompa angka piangku, ditonun Ho do ahu di bagasan bortian ni dainang. 14Mandok mauliate ma ahu tu Ho ala ni * surung ni pambahenmu di ahu, na sumurung do angka jadijadianmu, jala tangkas situtu do i ditanda rohangku. #* Job 10:8-9 15Nda tung buni holiholingku di jolom, uju na tarjadi ahu di * sihabunian, uju na tarsirat ahu di dalam laut. #* Pjm 11:5 16Di hurungan manuk ahu, nunga diida angka matam, jala nunga tarsurat tu pustaham sasudena i, nunga binuhul hian * angka ariaringku, uju so adong dope nanggo sada. #* Job 14:5
II. 17Dibahen i mansai arga situtu do angka * pingkiranmu di ahu, ale Debata, jala mansai torop do bilanganna. #* Jes 55:9 18Tung sura naeng rajumanku, * tumorop do nasida sian horsik; molo + ngot ahu, tong dope ahu di lambungmi. #* Ps 40:6; + Ps 63:7 19Aut dibunu Ho ma nian parjahat i, ale Debata, jala hamu ale angka baoa sisopsop mudar, pasurut hamu ma sian ahu! 20Nasida angka na manaringoti Ho mambahen sireheon, marsineang do angka alom mandok goarmu. #2Mus 20:7 21Tung so hagigihononku ma, ale Jahowa, angka na mangkagigihon Ho, tung so marbiasbias ahu mida angka na hehe mangalo Ho? #Ps 101:3 22Tung na sun do gigi ni rohangku di nasida, jadi musungku do nasida. 23Sulingkit ma ahu, ale Debata, jala tanda rohangki, uji ma ahu jala tanda angka pingkiranki. #Ps 26:2, 139:1 24Jala ida, manang tung adong lapang haporsuhon di bagasan ahu, jala togu ahu di dalan salelenglelengna. #Ps 25:4-5, 27:11, 86:11
Currently Selected:
PSALMEN Bindu 139: BBC
Highlight
Share
Compare
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.