PODA SIAN RAJA SALOMO Bindu 4
Bindu 4
B. Hata sipaingot paduahon (Poda 4:1—6:19).
Sipaingot mangapoi patibuhon mangalului hapistaran 1-9.
Tau tiruon dalan ni partigor, tau lumbalumba dalan ni parjahat 10-19.
Dalan hapistaran manogu tu hangoluan 20-27.
B. I. 1Sai tangihon ma, hamu ale angka anaha, pangajaran ni sada ama, jala ringkoti hamu ma gumuruhon pangantusion. 2Ai poda na denggan do na hulehon tu hamu, unang tung tadingkon hamu patikku. 3Ai ahu pe, siminik ni damang do ahu, hasudungan jala anak sasada ni dainang. #1Kron 29:1 4Jadi dipodai ibana ahu, jala didok do mandok ahu: Sai parateatehon ma angka hatangki, jala * radoti angka tonangku, asa mangolu ho! #* 3Mus 18:5; 1Kron 28:9 5Sai eahi hapistaran, eahi ma tutu pangantusion; * unang tung halupahon, jala unang tundali angka hata ni pamanganku. #* Poda 3:1 6Unang tung tadingkon angka i, asa diramoti ho; sai haholongi ma angka i, asa dijaga nasida ho. 7Parmulaan ni hapistaran, on do: Tuhori hapistaran i, jala tuhorhon sandok na niomom tumuhor pangantusion! #Poda 23:23 8Sai parhamaol ma i, asa dipatimbul ho, marmulia do ho bahenonna, molo marparsigantungan tusi ho. 9Lehononna do tu ulum bulangbulang hasoloan, tumpal na jagar situtu basabasahononna tu ho. #Poda 1:9
II. 10Sai tangihon, ale anaha, jala jangkon ma angka hatangki, asa * tamba di ho angka taon ni ngolum. #* Poda 3:2 11Di bagasan dalan hapistaran ahu mangajari ho, huiringiring ho mardalan di angka lapang hatigoran. #Ps 27:11, 32:8 12Molo mardalan ho disi, ndang tagamon hagogotan langkalangkam, jala molo marlojong ho, ndang tagamon tartuktuk. 13Marsitiopan tu pangajaran ma ho, unang parsitading i; sai tiopi ma i, ai i do hangoluanmu. 14Unang paihut dalan ni angka parjahat, jala unang mardalani ho di dalan ni parjahat. #Ps 1:1; Poda 1:10 15Tung palua dirim sian i, unang bolus sian i, paholang dirim sian i jala pasiding. 16Ai ndang tarpodom nasida, nda jolo manjahati, ndang tarnono matanasida, nda jolo targasip dibahen manang ise. #Ps 36:5 17Ai roti hajahaton do dipangan nasida, jala anggur pangarupaon diinum nasida. 18Alai anggo lapang ni halak partigor tudos tu buha siang ari, lam tu tiurna do, sahat ro di hos ni ari. #Job 11:17 19Ia dalan ni halak parjahat tudos tu na holom marimpotimpot, ndang diboto nasida partuktuhannasida i. #Poda 13:9, 24:20
III. 20Ale anaha, sai parateatehon ma angka hatangki, tarehon ma pinggolmu tumangihon angka hatangki. 21Unang tung sirpang angka i sian matam, sai momosi ma di tongatonga ni roham. #5Mus 11:18; Poda 3:3 22Ai hangoluan do i di angka na jumpangan disi, jala gabe hahisaron di sandok dagingna. #Poda 3:8, 13-16 23Sian saluhut sijagaon i, gumodang ma jaga roham, ai sian i do ruar angka mual hangoluan. 24Paholang ma sian ho ansiansi ni pamangan, jala padao sian ho bibir sijubajabi. 25Sai manulus tu jolo ma matami mamereng, jala langkop ni matam manuju tigor tu jolom. 26Sai timbangi ma pangalangka ni patmu, asa tung marsihohot saluhut dalanmu. #Heb 12:13 27Unang manimbil ho tu siamun manang tu hambirang, sai paholang ma patmu sian hajahaton. #5Mus 5:29
Currently Selected:
PODA SIAN RAJA SALOMO Bindu 4: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.