PODA SIAN RAJA SALOMO Bindu 24
Bindu 24
Ujungna:
Taringot tu roha habengeton dohot panganjuanjuon 1-22.
Sipaingot ni halak na pistar, angka na asing 23-34.
I. 1Unang mangiburu roham mida halak parjahat, jala unang mangapian roham naeng maralealehon nasida. #Poda 3:31, 23:17 2Ai hamagoan do dipatahitahi rohanasida, jala jea sambing dihatahon bibirnasida. #Ps 10:7 3Marhitehite hapistaran pinajongjong sada bagas, jala dipahot do i marhitehite roha hapantason. 4Jala marhitehite * parbinotoan, gok angka bilutna dohot ugasan marragamragam angka na arga jala na uli. #* Poda 31:10-31 5Holan halak na pistar do ompu ni gogo, jala baoa na marparbinotoan, i ma na so taralo. 6Ai ingkon pantas panguluhonmu tu hamusuon, haantuon pe marguru tu hinadeak ni panuturi do. #Poda 11:14, 20:18 7Mamaolhu do hapistaran di halak na oto, dibahen i ndang hum ibana mangungkap pamanganna di partungkoan. 8Halak na marsangkap naeng manjahati, i ma na patut goaron induk ni getegete. 9Pingkiran haotoon do ia dosa, jala marbiasbias do jolma mida halak sipangarehe. 10Molo godoron roham di ari hagogotan, lam moru ma gogom. 11Sai palua ma halak angka na tarboan laho bunuon, ro di angka na tartogu tu pamotongan, molo tung haambatan ho nasida. #Job 29:12; Ps 82:4 12Tung sura dohononmu: Ida ma, ndang huboto hami hata i! Tung so mananda disi Tuhan i, * Sidodo angka roha? Tung so mamoto disi Ibana na mangaramoti tondimu? Ibana do tahe + mamaloshon tu jolma hombar tu pambahenanna be. #* 1Sam 16:7; Job 7:20; Poda 16:2; + Job 34:11; Rom 2:6 13Mangan situak ni loba ma ho, ale anaha, ai na denggan do i dohot aek ni sarang ni loba, ai na tonggi do i di tolonanmu. #Ps 19:11 14Suang songon i ma dai ni parbinotoan di hapistaran tu tondimu; molo dung dapot ho, * jumpang pe ajalmu, ndang pesan ianggo sihirimon ni roham. #* Poda 23:18 15Unang mangonggop ho ale parjahat di inganan ni halak partigor, unang segai hapeahanna. 16Ai tung sura pe tinggang * halak partigor i pola pitu hali, sai hehe do ibana muse, alai anggo halak parjahat i ompas do binahen ni hinamago. #* Job 5:19; Ps 37:24 17Unang martilla ni roha ho, molo tinggang musum, jala unang marolopolop roham molo ompas ibana. #Job 31:29 18Asa unang tung diida Jahowa, gabe sogo rohana disi, jala marsibalik rimasna maon sian ibana tu ho. 19Unang pola mohop ateatem mida halak paruhur, unang pola mangiburu ho mida halak parjahat. #Ps 37:1, 73:3; Poda 3:31 20Ai ndang adong sihirimon di halak parjahat i sogot, tung mintop do palito ni halak parjahat. #Poda 13:9, 20:20 21Ale anaha, sai habiari ma Jahowa, nang raja, unang rosu ho tu halak panggunturi. #Poda 17:11; 1Ptr 2:17 22Ai tompu do hehe hamagoannasida, jala tung ise na umboto tingki partubolon sian nasida na dua i. #Rom 13:2
II. 23Nang angka poda siingoton sian halak na pistar do i: Ndang denggan marnida bohi di paruhuman. #3Mus 19:15; 5Mus 1:17; Poda 18:5 24Manang ise na mandok tu halak parjahat i: Parpintor do ho! Pulasan ni halak situan na torop do ibana, jala buraan ni angka bangso. #Poda 17:15 25Alai marsonangsonang do angka na umpinsang ibana, jala songgop do tu nasida pasupasu hatuaon. 26Mangumma bibir do manang ise na maralushon hata angka na sintong. #Poda 15:23 27Jolo sarihon ulaonmu di balian, jala pature ladangmu, dung i pe asa pauli bagasmu. 28Unang olo ho gabe sitindangi dompak donganmu, soada paralaan; tung tama ma ho marjehejehe marhitehite bibirmu. #Poda 19:5 29Unang dok: Suang songon na binahenna tu ahu, bahenonku tu ibana; ahu ma mamaloshon tu baoa i, hombar tu pambahenanna. #Poda 20:22; Mat 5:39, 7:12 30Mamolus do ahu sian lambung ladang ni sigurbak ulu, dohot sian lambung porlak anggur ni jolma na hurang roha. 31Jadi ida ma, tubuan siarum horsik do luhutna, jala ditutup sihupi sisikna, jala maloha do parikna batu. 32Dung huida i laos huparateatehon ma; dung huida i laos hubuat ma sipaingot sian i. 33Otiknari modom, otiknari mondokondok, otiknari muse mangunsimpu tangan peak modom nimmu. #Poda 6:9-11 34Jadi ro ma hapogosonmu songon halak panamun, jala haraparonmu songon halak na marsinjata. #Poda 10:4
Currently Selected:
PODA SIAN RAJA SALOMO Bindu 24: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.