PODA SIAN RAJA SALOMO Bindu 16
Bindu 16
Taringot tu roha panatapon ni Debata dohot siingoton ni jolma 1-33.
1Lan do sangkap ni roha ni jolma, alai sian Jahowa do anggo paraluson ni pamangan. #Poda 16:9, 19:21; Jer 10:23 2Saluhut dalan ni baoa pita do di rohana, alai Jahowa do mangantan angka tondi. #Poda 21:2 3Tu Jahowa ma giling angka pambahenanmu, asa tulus angka sangkap ni roham. #Ps 37:5 4Luhut do dijadihon Jahowa hombar tu na tinembak ni rohana, nang halak parjahat tu ari hamagoan. #Rom 9:22 5* Marbiasbias do roha ni Jahowa mida sude jolma na ginjang marroha; + sian sundut tu sundut: Ndang tagamon lias ibana. #* Poda 6:16-17; + Poda 11:21 6Marhite sian asi ni roha dohot habonaron salese hajahaton, jala marhite sian biar mida Jahowa mandao iba sian hajahaton. 7Molo lomo roha ni Jahowa mida dalan ni baoa, padameonna tu ibana nang angka musuna. #1Mus 31:24, 33:4, 9 8Tagonan do na otik marhitehite hatigoran, asa parsaulian godang sian dalan na so turut. #Poda 15:16 9Roha ni jolma marsangkap dalanna, alai Jahowa do patontu langkana. #Poda 19:21 10Ulpuhan sian Debata di bagasan pamangan ni raja, jadi ndang manjahati pamanganna di paruhuman. 11Jahowa do nampuna hatian dohot bulung ni dasing hasintongan, jadijadianna do saluhut batu timbangan di bagasan hadanghadangan. #Poda 11:1 12Marbiasbias do tama roha ni angka raja mangulahon hajahaton, ai * marhite sian hatigoran do hot habangsana. #* Poda 20:28, 25:5, 29:14 13Bibir hatigoran i do lomo ni angka raja, jala dihaholongi rohana do halak sidok hata sintong. 14Rimas ni raja do hira angka suruan hamatean, alai anggo halak na pistar paombun rohana. #Poda 19:12, 20:2 15Di bagasan sihar ni panaili ni raja do hangoluan, jala tudoshon ombun di partaonan logo ni ari habasaon ni rohana. #Poda 19:12 16Andul do dumenggan mangomo hapistaran asa sere, jala tagonan do mangomo roha hapantason asa perak. #Poda 3:14, 8:10-11, 19 17Dalan ni halak partigor mandao do sian hajahaton, marhamaol hosana sandiri do manang ise na mangaramoti dalanna. 18Matua ginjang ni roha do patujolo ni hajepolon, jala hatimboon diri patujolo ni hatinggangon. #Poda 11:2, 17:19, 18:12 19Tagonan do serep martondi rap dohot halak na dangol, asa marbagi tabantaban rap dohot na jungkat. 20Manang ise na marateatehon hata ni Debata, jumpangan na denggan, jala halak na marhaposan tu Jahowa maruli tua. #Ps 125:1 21Halak na pistar marroha targoar na pantas, jala halambohon ni bibir manambai poda. #Luk 4:22 22Mual hangoluan do * roha hapantason di nampunasa, alai anggo pangajaran ni halak na oto haotoon sambing do. #* Poda 13:14, 14:27 23Roha ni na pistar papantas pamanganna, jala ditambai poda di atas dilana. 24Tudoshon situak ni loba do pangkataion halambohon, tonggi tu roha, jala hahisaron tu holiholi. #Poda 12:25 25Adong do sada dalan, tigor di roha ni baoa, hape marhapatean tu hamatean do ujungna. #Poda 14:12 26Roha ni halak na ngalutan manambai hangalutan tu ibana, ai pamanganna patungki ibana. #Poda 18:7 27Baoa parjahat sahali mambungbungi hajahaton, jala songon api na marsigorgor do di atas ni bibirna. 28Baoa panggetegete patubi parbadaan, jala parhusiphusip pabolabola halak na maraleale. #Poda 6:14, 19, 26:21 29Baoa pangarupa mangela alealena, jala ditogihon ibana tu dalan hamagoan. #Poda 1:10-14 30Mangkidophidopi ia matana laho umpingkir getegete, dipahuntamhuntam bibirna naeng mangulahon hajahaton. #Poda 6:13 31Tumpal hamuliaon do uban na jumpang marhite sian dalan hatigoran. #Poda 20:29 32Tagonan do halak na lambat tarrimas sian ulubalang, jala halak na mangarajai dirina, umbalga do i sian na papatu huta. #Poda 14:29 33Tu bagasan ampuan tardanggur rujiruji, alai saguru di Jahowa do haputusanna.
Currently Selected:
PODA SIAN RAJA SALOMO Bindu 16: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.