PODA SIAN RAJA SALOMO Bindu 12
Bindu 12
Angka poda hapistaran dohot hapantason marpangkataion 1-28.
1Manang ise na holong roha di pangajaran, holong ma rohana di parbinotoan; alai anggo halak na mangkagigihon pinsangpinsang, na dodongon do i. #Poda 13:1, 18 2Halak na denggan roha maruli halomoan sian Jahowa; alai anggo baoa panggetegete ditorui Ibana do. 3Ndang marsihohot roha ni jolma binahen ni hajahaton; alai anggo urat ni halak partigor, ndang tarhutik. #Poda 10:25, 12:12 4Parompuan na marhuaso do tumpal ni harajaanna, alai songon bisa na manggagat tu holiholina do anggo parompuan sibahen haurahon. #Poda 31:10-31; 1Kor 11:7 5Hasintongan do pingkiran ni halak partigor, alai aturan ni halak parjahat sipaotooto do. #1Raj 12:6-19 6Pangkataion ni halak parjahat * mangonggop naeng mandurushon mudar; alai anggo pamangan ni halak partigor paluahon halak. #* Poda 1:11 7Humosinghosing do roha ni halak parjahat, gabe pidom nasida; alai hot do ianggo bagas ni halak partigor. #Job 8:13-19; Ps 37:36; Poda 10:25 8Marguru tu hapantasonna marroha tarpuji baoa, alai anggo halak na sungkalit marroha hagigian do. 9Dengganan marlea iba, laos iba naposoniba, sian patimbotimbo diriniba, hape hurangan sipanganon do. 10Diparhamaol halak partigor i do hosa ni pinahanna; alai anggo asiasi ni halak parjahat hagarangon do. #2Mus 23:5 11Manang ise na mangula tanona, bosuran ma di sipanganon; alai anggo halak na mangolooloi marlanggelangge, hurangan roha do. #Poda 28:19 12Marsiilailaan do halak parjahat i manaon jorgong hamagoan, alai hot do ianggo urat ni halak partigor. #Poda 12:3 13Jorgong na rahat do oseose ni pangkataion, alai malua sian hagogotan do halak partigor i. #Poda 18:7 14* Marhite sian parbue ni pamangan butongan baoa i di na denggan, jala + sumuang tu ibana do pambahenan ni tanganna sandiri. #* Poda 13:2; Mat 12:37; + Rom 2:6 15Tigor do dalan ni na oto di rohana, alai anggo halak na pistar i, olo do tumangihon sipaingot. 16Hamurhingon ni na oto botoon do satongkinnari; alai manang ise na mangkuphupi haurahon, i ma na bisuk. 17Manang ise na patajom hasintongan, i ma na papatarhon hatigoran; alai halak sitindangkon gabus papatarhon sipaotooto. #Poda 11:5 18Halak na neang marpangkuling tudoshon horis na maniham do tajomna, alai anggo dila ni halak na pistar hahisaron do. #Ps 55:22, 57:5, 59:8, 64:4; Poda 13:3, 16:27 19Hot do pangkataion hasintongan ro di salelenglelengna, alai sangkidop mata sambing do anggo dila sipaotooto. 20Sipaotooto do di bagasan roha ni halak na patubutubu hajahaton; alai las ni roha do di halak angka na marsangkap hadameon. 21Ndang mangonai hamagoan agia aha tu partigor; alai gok hajahaton do anggo halak parjahat i. 22Marbiasbias do roha ni Jahowa mida * angka bibir sipaotooto; alai lomo ni rohana do anggo halak siulahon hasintongan. #* Poda 6:17 23Jolma na bisuk mangkahohomhon parbinotoan; alai anggo roha ni halak na oto maningtingkon habodoon. #Poda 13:16, 15:2, 29:11 24Manggomgomi do sogot tangan ni halak na padot; alai anggo halak sigurbak ulu, ingkon marrodi do. #Poda 10:4 25Holsoholso di bagasan roha ni baoa patungki ibana, alai anggo * hata na denggan pahinsahon rohana muse. #* Poda 16:24 26Dipatongon halak na tigor do donganna tu dalan hasintongan; alai anggo dalan ni halak parjahat mangaliluhon nasida sandiri do. 27Ndang dapotan na binuru anggo halak sigurbak ulu, alai dapotan arta apala na arga do anggo jolma na padot. #Poda 12:24 28Di bagasan lapang hatigoran do hangoluan, alai anggo dalan panirpangan pate tu hamatean do.
Currently Selected:
PODA SIAN RAJA SALOMO Bindu 12: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.