PILIPPI Bindu 3
Bindu 3
Parungkilon ni apostel i, maniop hatigoran 1-16.
Siparangehononhon do na hinirim! 17-21.
I. 1Angkup ni i, ale angka donganku, las ma rohamuna di bagasan Tuhan i! Ndang dokdok rohangku, manurathon jumotjot i tu hamu; jala patoguhon rohamuna do i. #Plp 2:18, 4:4 2Bereng hamu angka biang; bereng hamu angka pangula na jahat; bereng hamu parsunaton na torbang! #Pgk 22:15 3Ai hita do targoar parsunaton, angka parsomba di bagasan Tondi ni Debata, angka siasahon Kristus Jesus, angka na so marpos ni roha di daging i. #Rom 2:29 4Adong do nian nang di ahu sipangasahononhon di daging. Ai molo dirimpu deba, adong sipangasahononna di pardagingon, nda lam ahu ma nian! #2Kor 11:18, 22 5Tarsunat di ari paualuhon do ahu, na sian bangso Israel marga Benjamin, halak Heber, tubu ni halak Heber, halak Parise mangihuthon patik i. #Ul 26:5 6Garang do rohangku mangalele huria i, so hasurahan di hatigoran na sian patik. 7Alai naung paruntungan hian di ahu, harugian do i hujujur ala ni Kristus i. #Mat 13:44, 46 8Saluhutna do tahe huetong harugian tumimbangkon hamuliaon ni panandaon di Kristus Jesus, Tuhanki. Ala Ibana huseangkon saluhutna i, jala orbuhorbuk do i huetong, asa huomo Kristus, 9asa di bagasan Ibana ahu didapot, unang ma marhatigoran sian patik, tung sian haporseaon di Kristus do, i ma hatigoran na sian Debata, na marojahan di haporseaon, #Rom 3:21-22 10asa hutanda Ibana dohot hagogoon ni haheheonna i, ro di hasasaor tu angka haporsuhonna, di na gabe sapangalaho ahu dohot Ibana di hamamatena i; #Rom 6:3-5, 8:17; Gal 6:17 11anggiat sahat ahu tu haheheon na sian angka na mate! 12Apala naung sanga hutangkup i manang naung gabe sun denggan; alai sai hueaki do, anggiat tartangkup ahu i, songon naung tinangkup ni Kristus Jesus i ahu. #Ul 9:6; 1Tim 6:12 13Ale angka dongan, ndang hurajumi diringku, naung sun hutangkup i. 14On do tahe: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i. #1Kor 9:24 15Manang piga hita naung rimpas, i ma taparrohahon! Jala molo asing pingkiranmuna taringot tu manang aha, nang i pe, papataron ni Debata do tu hamu. #1Kor 2:6 16Asal ma tatiop, intap naung sahat tu hita!
II. 17Rap sitiru ahu ma hamu, ale angka dongan; jala pamanat hamu ma angka na marparange songon hami, sitiruonmuna! #1Kor 11:1 18Ai songon naung jotjot hudok tu hamu, jala anggo nuaeng mardongan ilu do hudok: Torop do marpangalaho, gabe musu ni silang ni Kristus. #1Kor 1:23; Gal 6:12 19Hamagoan do ujungnasida, butuhanasida do dipardebata, sihailahononna dihasangaphon, angka na di tano on diparrohahon. #Rom 16:18 20Ai di banua ginjang do sambulonta; sian i do tapaimaima Sipangolu hita, Tuhan Jesus Kristus i. #Eps 2:6; Kol 3:1; Heb 12:22 21Paubaonna do dagingta na lea on, gabe doshon dagingna na sangap i, hombar tu hagogoonna i, ai tarpatunduksa do saluhutna tu Ibana. #1Kor 15:43, 49, 53
Currently Selected:
PILIPPI Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.