PANURIRANG NAHUM Bindu 2
Bindu 2
Sahat tu Jerusalem do barita las ni roha naung tartaban duduk do Ninive 1-11.
Sun do nuaeng hadoboonna nasailaon 12-14.
I. 1Ida ma, * di atas angka dolok pat ni siboan barita na uli, na maningtingkon: Hademakan! Pestahon angka pestami, ale Juda, garari ma angka bagabagam! Ai ndang be solaon ni + na so marniula ho, nunga tung sun siap ibana. #* Jes 52:7; Rom 10:15; + Nah 1:11 2Nunga nangkok ibana na paserak ho. Jamoti ma partanobatoan i! Taropangi ma dalan! Hohos i ma gontingmu! Pangke ma nasa gogom. 3Ai pasuangon ni Jahowa ma hatimbulon ni Jakkob, songon hatimbulon ni Israel, ai nunga dipupusi angka pamupusi nasida, jala disegai angka ranting ni hau anggurnasida. #Jes 10:12 4Nunga marrara lombulombu ni angka ulubalangna, marpangkean na tinubar angka baoa sialo musu, marsillam songon api do angka sasabi ni huretana porang di ari parhontasanna, jala angka hujur disamarahon. 5Dienjak do angka huretai di alaman, mardorom di angka onan, rupana songon huathuat, songon hilap parsiksaknasida. 6Diingot roha ni rajai angka ulubalangna, hape martinggangan nasida di angka lapangnasida; humalaput nasida manahopi parikna, hape nunga sonson salosap. 7Dipatalak nasida nian angka bahal ni angka batang aek, jadi malala ma bagas bolon ni rajai. 8Alai nunga putus uhumi ingkon pasalangon ibana laho tu habuangan, jadi songon parturtu ni anduhur pangandung ni borunasida, angka ditompuhi be do andorana. 9Alai anggo Ninive, songon ambar pardengkean sian na robi do i, hape maporus do nasida: So hamu, so hamu! Alai ndang adong na olo humusor nanggo sahalak. 10Gomaki hamu ma perak, gomaki hamu ma sere! Ai ndang marlilit angka arta na arga situtu dohot sude angka ulaula hasudungan ni roha. 11Siap situtu jala pansing dipupusi luhutna * pola malala ateate ni jolma, jala angka hitir ulu ni tot jala dibobok gonting ni saluhut isina jala + marlangan bohinasida saluhutna. #* Jes 13:7-8; + Joel 2:6
II. 12Didia do nuaeng liang ni angka singa, jala didia panjampalan ni angka singa panoro? Parmeammeaman ni singa tunggal dohot boruboru ro di anak ni singa, jala ndang adong na hum manonggoti. 13Singa na manoro sisoroon singkop di angka anakna, jala na manansani di singa boruboru angkupna, jala digohi liangna dohot soroan, jala ingananna dohot na ginotilna. 14Ida ma, ro ma ahu marlulu dompak ho, ninna Jahowa Zebaot, martimpul ma timus ni angka huretam tutungonku, jala suda panganon ni podang angka singami, jala siaphononku soroanmi sian tano on, asa unang be tarbege soara ni angka suruanmi.
Batak Toba Bible Revised Edition © Indonesian Bible Society, 1998.