MARKUS Bindu 3
Bindu 3
Dipahisar Tuhan Jesus partangan na mate sambariba dohot torop na ginosagosa ni sibolis 1-12.
Dipillit sampuludua halak bahen siseanna 13-21.
Taringot tu dosa dompak Tondi Parbadia 22-30.
Ise do sisolhot ni Tuhan Jesus? 31-35.
(Ay. 3:1-6; patud. Mat 12:9-14; Luk 6:6-11)
I. 1Dung i dibongoti muse ma parguruan i. Jadi adong ma disi sada halak naung mate tanganna sambariba. #Mrk 1:21 2Jadi mangonggop ma rohanasida di Ibana, manang na olo Ibana pamalumhonsa di ari Sabbat, asa anggiat taraluhon nasida Ibana. #Luk 13:14 3Alai didok ma mandok halak partangan na mate i: Hehe ma ho tu tongatonga on! 4Laos didok ma tu nasida: Dia do na patut ulaon di ari Sabbat, mambahen na denggan manang mambahen na jahat, pangoluhon hosa manang mambunusa? Alai mangkohom do anggo nasida. #Luk 14:3 5Jadi rimas ma rohana manganolnol nasida huhut marsak ala ni tangkang ni rohanasida. Jala didok ma tu jolma i: Patoltol ma tanganmi! Jadi dipatoltol ma tutu, gabe sumuang hisar ma tanganna i. #Joh 11:33 6Alai laho tu balian angka Parise i, pintor martuptup ma nasida rap dohot angka na mangihuthon si Herodes dompak Ibana, manang beha bahenonnasida mamusa Ibana. #Mat 22:16; Mrk 8:15
(Ay. 3:7-12; patud. Mat 12:15-16; Luk 6:17-19)
7Dung i sumurut ma Jesus rap dohot angka siseanna tungkan tao i, jadi mansai torop halak sian luat Galilea dohot Judea mangihuthon Ibana. 8Songon i sian Jerusalem, nang sian luat Idumea dohot sian ipar ni Jordan ro di angka na humaliang Tirus dohot Sidon; mansai torop angka naung umbege godang ni na binahenna i, ro mandapothon Ibana. #Mat 15:21 9Jadi didokkon ma angka siseanna, asa diparade parau sada di Ibana ala ni natorop i, asa unang disosak nasida Ibana. 10Ai mansai torop do nasida dipamalum, gabe ro sude na porsuk parniahapanna tahop manjama Ibana. #Mat 14:36 11Jadi marsomba be do tu Ibana angka tondi na hodar, disi diida nasida Ibana, huhut manjoujou: Anak ni Debata do Ho! #Jak 2:19 12Alai gogo do nasida dipopai, asa unang dipapatar Ibana. #Mat 12:16; Mrk 1:34; Luk 4:41
II. 13Dung i nangkok ma Ibana tu sada dolok, jadi dijou ma tu jolona angka silomo ni rohana, gabe ro be ma nasida. #Mat 5:1; Joh 15:16; Ul 1:2 14Jadi dipillit ma nasida sampuludua, na naeng gabe donganna, jala na naeng suruonna marjamita, #Ul 1:21 15huhut marhuaso pabalihon angka sibolis. 16Asa dipilliti ma na sampuludua i: Ia si Simon digoari do huhut si Petrus. #Joh 1:42 17Dungkon ni i si Jakobus, anak ni si Sebedeus i, dohot si Johannes, dongan saama ni si Jakobus i; laos digoar do nasida Boanerges, na mandok: Anak ni ronggur. #Luk 9:54-56 18Tole muse si Andreas, Pilippus, Bartolomeus, Mateus, Tomas, Jakobus, anak ni si Alpeus, si Tadeus, si Simon, na sian huta Kana, #Joh 1:45, 11:16; Ul 1:13 19dohot si Judas Iskariot, parjehe i. #Joh 6:70-71 20Dung i muli ma Ibana, gabe rongom muse ro natorop i, pola sundat nasida mangan. #Mrk 6:31 21Jadi umbege i angka sisolhotna, ro ma nasida mangalap Ibana, ai ninna nasida do: Na rintik do Ibana. #Mrk 3:31
(Ay. 3:22-30; patud. Mat 12:24-32; Luk 11:15-22, 12:10)
III. 22Ia angka sibotosurat, naung tuat sian huta Jerusalem, didok do: Na sibolison do Ibana, jala induk ni angka sibolis i do dipangasahon, laho pabalihon angka sibolis. #Mat 9:34, 11:18; Joh 8:48 23Jadi dijou ma nasida tu jolona, marumpama ma Ibana mandok tu nasida: Tagamon ma pabalion ni sibolis i donganna sibolis? 24Ai molo marsalisi sada harajaon sama dirina, ndang na hot harajaon i. 25Jala molo marsalisi dongan sabagas sama nasida, ndang na hot na sabagas i. 26Asa molo hehe sibolis i mangalo dirina jala marsalisi sama ibana, ndang tarbahen hot be ibana, na laho suda nama. 27Ndang habongotan halak jabu ni ulubalang, laho mangarampas ugasanna, anggo so jumolo diihoti ulubalang i; dung pe i, asa tarbuatsa ugasanna. 28Situtu do hatangkon: Tarsesa pe nasa dosa ni angka jolma ro di nasa ragam ni panginsahionnasida na dompak Debata; 29anggo na mangaleai Tondi Parbadia i, ndang dapotsa hasesaan ni i nang di tingki sogot; parutang dosa sisalelenglelengna nama ibana. 30Ala didok nasida: Partondi na hodar do Ibana. #Joh 10:20
(Ay. 3:31-35; patud. Mat 12:46-50; Luk 8:19-21)
IV. 31Dung i ro ma inana dohot angka anggina, jadi di ruar nama nasida jongjong, gabe disuru ma na manjou Ibana. 32Na hundul do natorop i humaliang Ibana, gabe didok ma: Di alaman an do inangmu dohot angka anggim ro di angka ibotom; diusoi do Ho! #Mat 13:55 33Alai ninna ma mangalusi nasida: Ise do goaron dainang, jala ise do dohonon angka anggingku? 34Jala dibereng ma angka na hundul humaliang Ibana, ninna ma: Angka on do dainang dohot angka anggingku! 35Ai na mangulahon lomo ni roha ni Debata, i do anggingku, i do ibotongku, i do dainang!
Currently Selected:
MARKUS Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.