MATEUS Bindu 11
Bindu 11
Disuru si Johannes pandidi siseanna manungkun Tuhan Jesus; dihatindangkon Tuhanta do ibana 1-19.
Dipajeajea do angka huta parmiananna nasailaon 20-24.
Diarahon angka na loja jala na sorat 25-30.
I. 1Jadi dung sun dipatihi Jesus siseanna na sampuludua i, hehe ma Ibana sian i, laho mangajari dohot marjamita di angka hutanasida.
(Ay. 11:2-19; patud. Luk 7:18-35)
2Alai dibege si Johannes na tarhurung i do barita ni angka na binahen ni Kristus i, jadi disuru ma siseanna manungkun Ibana: #Mat 14:3 3Ho do na naeng ro i, manang na asing dope sipaimaonnami? #Mal 3:1 4Dung i didok Jesus ma mangalusi nasida: Mulak ma hamu, baritahon hamu ma tu si Johannes i angka na binege dohot na niidamuna on: 5Na gabe marnida do angka na mapitung, na mardalani do angka na lumpuon, na gabe ias do angka na huliton, na marbinege do angka na nengel na mulak mangolu do angka na mate; tu angka na pogos do binoan barita na uli. #Jes 35:5, 61:1 6Jala martua do na so targasip di Ahu! #Mat 13:57, 26:31 7Jadi dung laho nasida, ditaringoti Jesus ma si Johannes tu natorop i: Aha do na naeng idaonmuna, umbahen na laho hamu tu halongonan? Arung na meoleol na niullus ni alogo do? #Mat 3:1, 5 8Manang na naeng idaonmuna do sahalak parabit na lamot? Di jabu ni angka na raja do anggo parabit na lamot. 9Manang na naeng idaonmuna do tahe panurirang? Olo, hudok ma tu hamu: Sumurung do ibana sian panurirang. #Luk 1:76 10Ibana do na nidok ni hata on: “Ahu ma marsuru suruanki patujolom, sipature dalanmu di jolomi.” #Mal 3:1 11Na tutu do na hudok on tu hamu: Ndang adong na hehe sian jolma, na tinubuhon ni parompuan, na umbalga sian si Johannes pandidi; alai halak na ummetmet pe, naung di bagasan harajaon banua ginjang i, umbalga do i sian ibana. #Mat 13:17 12Alai olat ni angka ari ni si Johannes pandidi tu jolo on sigogoan do harajaon banua ginjang i, jala angka sibahen gogo do mangaithonsa. #Luk 13:24, 16:16 13Ai intap si Johannes nama panurirangon ni sude angka panurirang dohot patik i. 14Jadi molo tartangkup rohamuna i: Ibana do si Elia, na naeng ro i! #Mal 3:23; Mat 17:10-13 15Hamu angka na marpinggol, pinggol hamu ma i! 16Alai tu ise ma tahe patudosonku bangso on? Tudos ma nasida tu dakdanak na hundul di paronanan, angka na manjoujou di angka donganna dakdanak, mandok: 17Hupalui hami suling di jolomu, so haru manortor hamu; andung hupatubegehon hami tu hamu, so saut hamu tangis! #Poda 29:9 18Ai na ro do si Johannes, ndang parpapangan, ndang parminum, gabe dipandok: Sibolis do di ibana. 19Ia ro Anak ni jolma i, na olo mangan jala minum, gabe didok: Ndi, Halak on, sipapangan mago jala sisobur tuak anggur, aleale ni sijalobeo dohot, pardosa! Gabe pintor do Hapistaran i dipintori angka pambahenanna i. #Mat 9:14-15
(Ay. 11:20-24; patud. Luk 10:12-15)
II. 20Dung i ditorui Jesus ma huta, angka naung gumodang marnida hagogoonna i, ala so muba rohanasida, ninna do: 21Marjea ma ho, Korasin! Marjea ma ho, Betsaida! Ai aut di huta Tirus dohot Sidon dipamasa hagogoon angka na masa di hamu, ndang tarbahen so paubaonna rohana uju i, marabithon goni, hundul di orbuk! #Jona 3:6 22Angkup ni i, hudok ma di hamu: Neang do sitaonon ni pangisi ni huta Tirus dohot Sidon di ari uhum i, martimbangkon sitaononmuna. 23Ia ho Kapernaum! Nda na pinatimbo ho ro di langit an? Sidabuhononhon do ho sahat tu api na roko! Ai aut di huta Sodom dipamasa hagogoon angka na masa di bagasan ho, ndang tarbahen so hot dope huta i rasirasa sadari on! #Mat 4:13, 8:5, 9:1 24Angkup ni i, hudok ma di hamu: Neang do sitaonon ni pangisi ni huta Sodom di ari uhum i, martimbangkon sitaononmuna! #Mat 10:15
(Ay. 11:25-27; patud. Luk 10:21-22)
III. 25Uju i ma didok Jesus hatana songon on: Hupuji Ho, Amang, Tuhan na manggomgomi banua ginjang dohot tano on, ala ditamondingkon Ho hata i sian jolo ni angka na pistar dohot na marroha, gabe dipapatar Ho i tu angka siondihononhon. #Mat 5:3; 1Kor 1:27 26Olo, Amang, ai i do dihalomohon roham hian. 27Saluhutna i, nunga dipasahat Damang tu Ahu; asa ndang adong na tumanda Anak i dungkon ni Ama i; Ama i pe, ndang adong na tumanda i, ia so holan Anak i, angkup ni na pinodaan ni Anak i, mangihuthon lomo ni rohana. #Mat 28:18; Joh 3:35, 17:2; Plp 2:9 28Ro ma hamu tu Ahu, hamu angka na loja jala na sorat, asa hupasonang hamu! #Mat 12:20; Jer 31:25 29Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. 30Ai lambok do augangku jala neang do dohot na hupaporsanhon. #1Joh 5:3
Currently Selected:
MATEUS Bindu 11: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.