LUKAS Bindu 17
Bindu 17
Taringot tu angka pargasipan; na masisesaan dosa; haporseaon dohot pangulaon 1-10.
Dipamalum Tuhan Jesus sampulu halak na huliton 11-19.
Taringot tu ajal ni hasiangan on 20-37.
I. 1Alai didok Ibana ma tu siseanna i: Ndang tarbahen so ro angka gasip; alai marjea ma na parohonsa! 2Dengganan do di ibana ginantungkon losung batu tu rungkungna jala nilonongkon ibana tu laut, unang digasipi sahalak sian angka na metmet on! #Mat 18:6-7 3Jamoti hamu ma dirimuna! Anggo dung mardosa donganmu, podai ibana; jadi molo dipauba rohana, sesa ma dosana i! #Mat 18:15 4Jala molo tung pitu hali di na sada ari mardosa ibana dompak ho, jala pitu hali ibana mulahulak tu jolom mandok: Jora ma ahu, sesaonmu do! #Mat 18:21-22 5Dung i ninna angka apostel i ma mandok Tuhan i: Tambai ma haporseaonnami! #Mrk 9:24 6Alai ninna Tuhan i ma: Molo adong di hamu haporseaon na sabatu ni siarum, tardok hamu do tu hau galagala an: Maborgat ma ho suanhon ma ho tu laut!, gabe oloanna do hamu! #Mat 17:20, 21:21 7Alai ise sian hamu paranak somang na maninggala manang marmahan, tagamon ma dohononmuna tu ibana, jumpa muli sian hauma: Haru tu on ma ho hundul mangan? 8Nda dohononmuna ma mandok ibana: Pature ma sipanganonki, marhohop ma ho, mangkobasi di ahu, asa mangan minum ahu; dung pe i, asa mangan dohot minum ho! 9Tung dohononmu ma mauliate tu anak somangmu, ala dipasaut na niaturhonmu? 10Songon i do nang hamu; molo dung diula hamu saluhut na nidokkonna i tu hamu, dok hamu ma: Naposo na so hasea do hami; intap ulaon na patut do huula hami.
II. 11Uju mardalan Ibana dompak Jerusalem, dibolus ma sian tongatonga ni luat Samaria dohot Galilea. #Luk 9:51, 13:22 12Laho bongot tu sada huta, pajumpang ma Ibana dohot sampulu halak na huliton, na jongjong mandaodao. #3Mus 13:45-46 13Dipagogo nasida ma soaranasida, angka ninna ma: Jesus, Guru! Asi ma roham di hami. 14Jadi ninna Ibana ma marnidasa: Laho ma hamu patuduhon dirimuna tu angka malim! Jala di na laho i nasida, gabe ias ma nasida. #3Mus 14:2-3; Luk 5:14 15Alai mulak do sahalak sian nasida, dung diida, naung gabe malum ibana; dipagogo ma soarana mamuji Debata. 16Dipatungkap do dirina tu jolo ni Jesus mandok mauliate. Jala halak Samaria do i. 17Alai ninna Jesus ma mangalusi: Nda sampulu nasida naung gabe ias? Didia do na sia nari? 18Ndang adong jumpang hape, na olo mulak pasangaphon Debata, dungkon ni halak dagang on? 19Laos ninna ma mandok ibana: Hehe ma ho, laho ma! Haporseaonmi do paluahon ho! #Luk 7:50
III. 20Alai disungkun angka Parise do Ibana: Andigan ma songgop harajaon ni Debata? Gabe dialusi ma nasida, ninna ma: Apala gumortap idaon harajaon ni Debata di harorona i. #Joh 18:36 21Jala ndang tardok: Ndi on do! Manang: Ndi an! Ai tung di tongatongamuna do harajaon ni Debata. #Mat 24:23 22Dung i ninna ma mandok siseanna: Na ro ma angka ari, malungun ma rohamuna disi, naeng idaonmuna sada ari ni Anak ni jolma i; alai ndang idaonmuna i. 23Jala dohononna ma tu hamu: Dison! Disan do i! Unang topot hamu tusi, unang ihuthon hamu! #Luk 21:8 24Ai songon hilap na sumiksak, laho manorangi sian desa na sada ro di tondongkonna i, suman tusi do pangalho ni Anak ni jolma i di arina i. #Mat 24:26-27 25Alai ingkon jumolo lan taononna; bolongkonon ni na sansundut on do Ibana. #Luk 9:22 26Songon na masa uju di tingki ni si Noak i, suman tusi do sogot di angka ari ni Anak ni jolma i: #Mat 24:37-39 27Na mangan minum do nasida, mangoli jala pabolihonsa sahat ro di ari habobongot ni si Noak i tubagasan parau i; jadi ro ma aek na sumar i mangagohon nasida saluhutna. #1Mus 7:7-23 28Songon na masa di angka ari ni si Lot: Mangan minum nasida, manuhor manggadis, manuan jala pauli bagas. 29Alai di ari halalaho ni si Lot sian huta Sodom turun ma udan api dohot barerang sian ginjang, mangagohon nasida saluhutna. #1Mus 19:15, 24-25 30Songon i ma masa di na sadari i, di na gabe patar Anak ni jolma i. 31Ia halak na di bilut parginjang ni jabuna di na sadari i, jala di jabu i ugasanna, unang ma dialap i, di na mijur ibana; jala halak na di ladang, laos songon i: Unang pola muli ibana! #Mat 24:17-18 32Ingot hamu ma nioli ni si Lot i! #1Mus 19:26 33Agoan hosa ma na naeng paluahon hosana; alai na agoan hosa, i do na pangoluhonsa. #Luk 9:24 34Hudok ma di hamu: Di na saborngin i dua halak ma sapodoman; na sada do jangkononna, na sada nari tulahonna. 35Rap manduda ma dua parompuan; na sada do jangkononna, na sada nari tulahonna. #Mat 24:41 36Rap mangula hauma ma dua halak; na sada do jangkononna, na sada nari tulahonna. 37Jadi ninna nasida ma mangalusi Ibana: Didia ma i, Tuhan? Gabe didok ma tu nasida: Ia disi bangke, laos tusi do marumbal angka lali! #Mat 24:28
Currently Selected:
LUKAS Bindu 17: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.