3 MUSA Bindu 19
Bindu 19
Ingkon parbadiaan ni Israel dirina di Jahowa 1-8.
Partorang ni roha haholongan tu dongan 9-32.
Patik siingoton taringot tu tano i, angka adat ni parbegu, angka na tuatua, halak dagang, parsuhatan dohot timbangan 33-37.
I. 1Dung i ro muse ma hata ni Jahowa tu si Musa songon on: 2Hatahon ma tu sandok luhutan ni halak Israel hata on: Ingkon badia hamu, ai na badia do Ahu, Jahowa, Debatamuna i! #3Mus 11:44-45; Mat 5:48; 1Ptr 1:15-16 3Ingkon ganup jolma pasangaphon inana dohot amana, jala ingkon radotanmuna angka ari Sabbathu, ai Ahu do Jahowa, Debatamuna i! #2Mus 20:8, 12 4Jala ndang jadi hamu mandompakkon angka ajiajian, jala ndang jadi hamu mambahen angka debata tuangan di hamu, ai Ahu do Jahowa, Debatamuna i! #2Mus 20:3, 34:17 5Jala tung sura hamu mamelehon sada pelean hamauliateon tu Jahowa, ingkon sian lomo ni rohamuna hamu mamelehon i. #3Mus 22:18-20 6Alai ingkon laos di ari pamelehonmuna dohot marsogotna i hamu manganhon pelean i, alai anggo na tinggal i ro di ari patoluhon, ingkon tutungonmuna do i tu bagasan api. #3Mus 7:15-18 7Tung sura adong na manganhon sian i di ari patoluhon, hagigian do i, ndang tarhalomohon. 8Jala manang ise na manganhon sian i, ingkon manginona tu ibana hajahatonna, ala na niramunanna habadiaon ni Jahowa, jala ingkon siaphononhon hosana sian tongatonga ni bangsona.
II. 9Molo digotil hamu parbue ni tanomuna, ndang jadi suda gotilonmu duru ni haumamu jala ndang jadi jomputonmuna na marpisikpisik di panabianmuna. #3Mus 23:22; 5Mus 24:19; Rut 2:2, 15-16 10Parbue ni hau anggurmu pe ndang suda gotilonmu, jala unang pola papungupungu parbue na marpisikpisik di porlak anggurmu; ingkon pasombuonmu do i di halak na pogos dohot di halak dagang, ai Ahu do Jahowa, Debatamuna i! 11Ndang jadi hamu manangko, jala ndang jadi hamu margabus, jala ndang jadi hamu masipaotootoan. #2Mus 20:15-16; 1Tes 4:6 12Jala ndang jadi hamu manolon na tutu marhitehite Goarhu, asa unang marlea bahenonmu Goar ni Debatam, ai Ahu do Jahowa. #2Mus 20:7; Mat 5:33 13Ndang jadi rupaonmu donganmu manang doboonmu ugasanna, jala ndang jadi pogoonmu upa ni halak pangula, pola sahat ro di manogot. #5Mus 24:14-15; Jer 22:13; Jak 5:4 14Ndang jadi buraanmu halak na nengel jala ndang jadi bahenonmu partuktuhan di jolo ni halak na mapitung, ingkon habiaranmu do Debatamu, ai Ahu do Jahowa. #5Mus 27:18 15Ndang jadi papeolonmu uhum di paruhuman, ndang jadi hamu marnidanida bohi, palea halak na pogos, pasangap halak na sangap, ingkon marhite sian hatigoran uhumonmu donganmu. #2Mus 23:6; 5Mus 16:19-20 16Ndang jadi ho mangalap manaruhon hata mangkata donganmu sabangso, jala ndang jadi ho hehe manindangi dompak mudar ni donganmu, ai Ahu do Jahowa. 17Ndang jadi hosomonmu donganmu di bagasan roham, alai ingkon marsipaingot ho tu donganmu, asa unang manean dosa ho ala ibana. #Ps 141:5; Mat 18:15 18Ndang jadi baloshononmu na jahat, jala ndang jadi marsunisunian roham tu anak ni bangsom, ingkon haholonganmu donganmu jolma songon dirim, ai Ahu do Jahowa. #Mat 5:43-48, 22:39; Luk 10:25, 37; Joh 13:34; Rom 13:9; Gal 5:11; Jak 2:8 19Ingkon radotanmuna do angka uhumhu; ndang jadi loasonmu pinahanmu tu na pulik mansam marbaringin, jala ndang jadi mardua ragam boni saburhononmu tu haumam jala ndang jadi pangkeonmu ulos na mardua mansam bonangna. #5Mus 22:9-11 20Tung sura sampur sada baoa tu sada parompuan sonduhan naung oroan nian, alai ndang haru ditobus dope, manang ndang haru malua dope sian parhatobanan, ingkon rap linsingan do, alai ndang jadi mate nasida bunuon, ala so haru malua dope nasida. 21Alai ingkon boanon ni baoa i sada birubiru tunggal di Jahowa tu jolo pintu ni undungundung parluhutan i, bahen pelean parsalaanna urasna. 22Jala ingkon malim i mambahen pardenggananna marhite sian birubiru tunggal pelean parsalaan i di adopan ni Jahowa, ala dosa na binahenna i, jadi marpamuati ma roha ni Jahowa mida dosa na binahenna i. #3Mus 5:17-18
III. 23Ia dung masuk hamu tu bagasan tano i jala disuan hamu angka hau marragamragam tau sipanganon parbuena, ingkon hira na marhulup parbuena etongon ni rohamuna; ingkon tolu taon lelengna marhulup etongon ni rohamuna, ndang jadi panganonmuna. 24Alai anggo paopattaonhon ingkon badia saluhut parbuena i tau pujipujian tu Jahowa. 25Tole muse palimataonhon jadi ma panganonmuna parbuena i, asa lam tamba parbuena i di hamu; ai Ahu do Jahowa, Debatamuna i! 26Ndang jadi panganonmuna manang aha na marsaor mudar. Ndang jadi ulahononmuna partondungon manang parsibalikmataon. #3Mus 3:17 27Ndang jadi marjambulan obuk ni ulum gorbangonmu, jala ndang jadi gansipanmu ujung ni janggutmu. #3Mus 21:5-6; 5Mus 14:1 28Ndang jadi garianganmu dagingmu ala na mate ho, jala ndang jadi marsurat dagingmu marhite sian bosi na ginarahon, ai Ahu do Jahowa. 29Ndang jadi ramunanmu borum mangapoi mangulahon parmainanon, asa unang marmainan isi ni tano i, gabe gok hajahaton tano i. 30Ingkon radotanmuna do ari Sabbathu, jala pasangap hamu ingananku na badia i; ai Ahu do Jahowa. 31Ndang jadi hamu marbalik tu halak pangarunding manang tu halak partondung, ndang jadi hamu marsungkun tu nasida, asa unang ramun hamu bahenonnasida; ai Ahu do Jahowa, Debatamuna i. #3Mus 20:6; 5Mus 18:10-11; 1Sam 28:7 32Ingkon hehe ho laos jongjong maradophon halak na ubanon, jala ingkon pasangaponmu do halak na tuatua, jala ingkon marhabiaran ho maradophon Debatam; ai Ahu do Jahowa. 33Tung sura maisolat sahalak dagang di lambungmu di tanomuna i, ndang jadi rupaonmu ibana. #2Mus 22:20 34Songon sahalak sian hamu na tubu di tano i, ingkon songon i do nang halak dagang di tongatongamuna, ingkon haholonganmu do ibana songon dirim, ai halak dagang do nang hamu na jolo di tano Misir; ai Ahu do Jahowa Debatamuna i! 35Ndang jadi dabuonmuna uhum na geduk di paruhuman i, manang marhite sian asta, manang marhite sian timbangan, manang marhite sian solup. #5Mus 25:13-16; Poda 11:1, 16:11, 20:10 36Ingkon hatian na sintong dohot batu timbangan na sintong dohot solup na sintong dohot bale na sintong masa di hamu; ai Ahu do Jahowa, Debatamuna i, na manogihon hamu ruar sian tano Misir. 37Dibahen i radoti hamu ma saluhut parentangku dohot uhumhu, jala ulahon hamu angka i; ai Ahu do Jahowa. #3Mus 18:30
Currently Selected:
3 MUSA Bindu 19: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.