JOB Bindu 8
Bindu 8
Hata ni si Bildad parjolo:
Ndang tarbahen so tigor uhum ni Debata 1-7.
Hata ni na tuatua taringot tu habonaron ni Debata moradophon jolma na daulat dohot parjahat 8-22.
I. 1Dung i ninna si Bildad sian Sua ma mangalusi: 2Sadia leleng on datdatanmu songon i hatahatam, jala tudoshon habahaba na doras pangkataion ni pamanganmu? 3Tung olo ma Debata papeol uhum? Manang tung olo ma Nasunhinagogo papeol habonaron? #Job 34:10-12 4Atik tung naung mardosa angka anakmu dompak Ibana, jadi Ibana manginonahon tu nasida hajahatonnasida i. #Job 1:18-19 5Molo burju anggo ho mangalului Debata dohot mangido asi ni roha sian Nasunhinagogo. #Job 22:23 6Molo pita jala bonar anggo ho, sai * tarsunggul do Ibana manatap ho, jala patipakonna muse + inganan ni hatigoranmu. #* Ps 35:23; + Jer 31:23 7Marmetmet pe parmulaanmu, ganda situtu do hadoharonmu di ujung. #Job 42:10
II. 8Ua marsungkun nian ho tu sundut na robi, jala parateatehon poda na dapot angka ompu na jolo. #5Mus 4:32, 32:7 9Ai na tubu nantoari do anggo hita, jala ndang agia aha na itaboto, ai * halinu sambing do ariarinta di atas tano on. #* Job 14:2; Ps 102:12 10Nda nasida mangajari ho, nasida paboahon tu ho, jala nasida paruarhon angka hata poda * sian rohanasida? #* Job 34:10, 34 11Tung tagamon tubu ma ansising, anggo so di gambo? Tung tagamon ma simbur tubu arung, anggo so di berneberne? #1Mus 41:2 12Molo martumbur dope, ndang dirambas, hape ingkon malos do i jumolo sian nasa duhutduhut sileban. #Job 5:3; Ps 129:6; Mat 6:30 13Suang songon i do pangalaho ni sude jolma na mangkalupahon Debata, ingkon pesan do pangkirimon ni halak parjahat. #Job 11:20, 18:14; Poda 10:28 14Ingkon mago do pangatauan ni rohana, jala tudoshon rambangrambang ni babibabi na hinaposan ni rohana. #Jes 59:6 15Mangunsande ibana tu jabuna, hape ndang manahan jongjong marsitiopan ibana tusi, hape ndang hot. 16Margota do nian ibana nang di las ni ari, jala marjurambak uratna manutup sandok porlakna. 17Manjirir huhut angka andorna tu timbunan batu, pola dijangkit tu bagasan bagas batu. 18Alai molo dung niruntun ibana sian ingananna, soadahonon ni do ibana, dohononna do: Ndang dung huida ho. #Job 7:10 19Ida ma, i ma halomoan ni dalanna, gabe martumbur na asing sian orbukna. 20Ida ma, ndang tagamon bolongkonon ni Debata jolma na daulat marroha, jala ndang tagamon tumpahanna tangan ni parjahat. 21Alai anggo pamanganmu gok parengkelon sogot bahenonna, jala bibirmu gok parolopolopon. #Ps 126:2 22Angka na mangkosom ho, ingkon * maruloshon haurahon, jala undungundung ni parjahat ingkon siap do. #* Ps 35:26, 109:29, 132:18
Currently Selected:
JOB Bindu 8: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.