JOB Bindu 40
Bindu 40
Si Job paunduk rohana maradophon Debata 1-5.
Udut ni pangkataion ni Jahowa: Nasunhinagogo do Debata, alai huhut Nasum bonar 6-14.
Pangalaho ni hoda aek 15-24.
Pangalaho ni buea 25-32.
I 1Angkup ni didok Jahowa ma tu si Job songon on: 2Antong beha ma pamadai ni jolma na manarita di Ibana Nasunhinagogo i? Jolma na naeng mangajari Debata, i ma nian mangalusi angka sungkunsungkunna i? #Jes 45:9 3Dung i ninna si Job ma mangalusi Jahowa: 4Ida ma, mametmethu do ahu, tung aha ma dohononku balosna tu Ho? * Huampehon na ma tagonan tanganku tu pamanganku. #* Job 21:5, 29:9; Ps 39:10; Poda 30:32 5Nunga sahali tarsor hatangku, ndang be ulahanku, manang dua hali pe, na so tupa be datdatanku. #Job 34:32
II 6Dung i ro ma alus ni Jahowa tu si Job marhite sian habahaba ninna ma. #Job 38:1 7Ua hohos i ma gontingmu songon baoa, adong do naeng sungkunhononku tu ho, asa ho nian mangajari Ahu! #Job 38:3; Jer 1:17 8Tung naeng do segaanmu uhumhu? Tung naeng salahononmu Ahu, asa mamintori dirim ho? #Ps 51:6; Hes 18:25; Rom 3:4 9Manang tung dos ma gogo ni botohonmu songon * botohon ni Debata? Tung tarbahen ho ma + marsuara ronggur songon Ibana! #* Job 22:8; + Job 37:5 10Ua pajagar ma dirim marhite sian habalgaon dohot hatimbulon, jala bahen ma hatongamon dohot hamuliaon pangkeanmu! #Ps 21:6, 104:1-2 11Tingting i ma parpiarpiar ni rimasmu, jala ranapi ma saluhut halak na ginjang marroha, angka i ma jolo paserep. #Job 21:30; Jes 2:12-22 12Tailihon ma saluhut halak na jungkat marroha, angka i ma jolo patunduk, jala dugudugu ma halak parjahat i di ingananna. 13Rap panguspangus ma nasida tu bagasan orbuk, tambathon ma bohinasida i tu bagasan haholomon. 14Jadi dohot ma Ahu mamuji ho, ala * tanganmu siamun sandiri manolongi ho. #* Ps 44:4; Jes 59:16, 63:5
III 15Ua ida ma binatang hoda aek naung hujadihon rap dohot ho, duhutduhut do digagat suang songon lombu. 16Ua ida ma, di bagasan gontingna do hagogoonna, jala di bagasan angka urat ni butuhana do hapuragaonna. 17Dipaegolegol do ihurna songon hau Ares, jala masidandanan do angka urat ni haehaena. 18Holiholina do songon ponot tombaga, ia angka ruasna songon tiang bosi. 19Ibana do situan ni jadijadian ni Debata, Sitompasa huhut mangalehon tangkena. 20Angka dolok gabe panjampalanna; laos disi do marmeammeam saluhut binatang di harangan. 21Lomo rohana marlinggomlinggom tu toru ni hau ampolu, jala modom tu arung dohot ansising. 22Di linggom ni hau ampolu i ibana marlinggomlinggom, jala angka bulung ni ansising manghungkupi ibana. 23Munsat pe batang aek i ndang pola humordit ibana, ndang pola tahuton ibana nang pe nasa balga ni Jordan masuk tu babana. 24Tung tagamon ma dapot jolma jailonna dohot jorat songon i mangolu manang mangkarihiri igungna?
IV 25Tung dapot ho ma tagamon toguonmu buea marhite sian hail, manang mangampot dilana dohot tali? #Jes 27:1 26Tung dapot ho ma tagamon harihiranmu igungna dohot hotang manang turaonmu hurumna dohot hail bosi? 27Tung tagamon ma pagodangonna elehelekna tu ho, manang manomba huasi tu ho? 28Tung tagamon ma olo ibana marpadanpadan dohot ho, mangido jaloonmu ibana bahen naposom salelenglelengna? 29Tung tagamon dapot ho ma ibana parmeammeamonmu songon pidong? Manang tambatonmu bahen meammeam ni angka borum? 30Tung tagamon olo ma angka pardengke marboniagahon ibana? Manang olo halak partigatiga marbagi disi? #Luk 5:7, 10 31Tung dapot ho ma tagamon gohanmu sisikna dohot tampuning, manang uluna dohot turatura? 32Tole ampehon ma tanganmu tu ibana, ndang tagamon sangkaponmu marporang dohot ibana paduahalihon.
Currently Selected:
JOB Bindu 40: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.