JOB Bindu 22
Bindu 22
Hata ni si Elipas patoluhalihon:
Dituhashon angka dosa godang tu si Job 1-11.
Diasuphon rimas ni Debata tu ibana 12-20.
Diapoi ibana paubahon rohana, asa marhasonangan muse hilalaonna 21-30.
I. 1Dung i ninna si Elipas sian Teman ma mangalusi: 2Tung tarbahen baoa ma manumpak Debata? Ndada manumpak tu dirina sambing do halak na marroha i. #Job 35:7; Luk 17:10 3Tung adong ma tagamon gunana di Debata Nasunhinagogo, molo dipintori ho dirim? Manang tung adong ma untungna sian i molo dipadaulat ho pangalahom? #Job 21:21 4Tung tagamon ma pinsangonna ho anggo ala ni hadaulatonmu, laos Ibana mamboan ho tu paruhuman? 5Nda ala ni godang ni hajahatonmu do i dohot ala ni dosam angka na so marpansadian? 6Ai nunga dibuat ho singkoram sian donganmu soada alana, jala disoro ho do ulos ni halak na marsangkot bulung hian. #2Mus 22:25-26; 5Mus 24:6, 10-13; Job 24:9-10; Jes 58:7 7Ndang dilehon ho aek inumon ni halak na mandate, jala dihomolhomol ho indahan paidaida halak na rapar. #Job 31:16; Mat 25:42-43 8Jala halak sigostang botohon nampuna tano i, jala na sangap maringan disi ditumpak ho. 9Rumar boti angka na mabalu dipalaho ho, jala botohon ni halak na tading di lampin diropuhi ho do. #Job 29:12 10Alani umbahen ditaon angka jorgong tuk humaliang ho, jala ro songgotsonggot tu ho so pangkirimanmu. #Job 18:8-11 11Manang tung so tama hian ma holom parnidaanmu, jala so hungkupan ni aek na sumar i ho? #Job 27:20; Ps 32:6
II. 12Nda maringan do Debata di langit apala parginjang sahali? Jala tailihon ma angka bintang, timbona i tu ginjang! 13Hape dohononmu dope: Aha ma dipabotoboto Debata? Tung tagamon ma manguhum Ibana sian pudi ni haholomon? #Ps 10:11 14Angka ombun do partabunianna, umbahen so marnida Ibana, jala diliati Ibana do langit ni langitan! #Ps 73:11, 94:7; Jes 29:15; Hes 8:12 15Naeng do huroha jujuronmu dalan ni halak sian na robi, dalan na nidalanan ni halak parjahat! #1Mus 6:3, 5; Eps 2:2; 2Ptr 2:5 16Angka na redep so panagaman ni rohana, aek na sumar i mangumbang ojahannasida sandiri. #1Mus 6:13, 7:21; Job 15:32-33 17Angka na mandok tu Debata: Paholang ma sian hami! Tung aha ma bahenon ni Nasunhinagogo i tu nasida! #Job 21:14-15; Jud 1:15 18Hape nian, nunga Ibana manggohi bagasnasida dohot denggan basa. Sai mandao ma sian ahu pingkiran ni halak parjahat! #Job 21:16 19Idaon ni halak partigor ma i, huhut marlas ni roha, jala halak na so marpipot mangarehe nasida songon on: #Ps 107:42 20Nunga ripur hapengani angka alonta, jala nunga suda hamuliaonna dipangan api! #Ps 139:21; Rom 11:28
III. 21Ua mardenggan ma ho dohot Ibana, asa mardame ho, asa marhite sian i ro hatuaon tu ho. 22Sai jalo ma pangajaran sian pamanganna, jala parateatehon ma angka hatana! #Poda 2:6 23Molo mulak roham tu Ibana Nasunhinagogo i, mangulahi mardohar do ho bahenonna, molo dipaholang ho hageduhon sian undungundungmu. #Job 8:5-7, 11:14-19 24Reongkon ma sere i tu orbuk, jala * sere sian Opir tu tongatonga ni batu rese di sunge. #* 1Raj 9:28 25Jadi Ibana Nasunhinagogo i ma gabe seremi, dohot perak margugungugun di ho. #Mat 6:33 26Jadi disi ma ho * marlas ni roha mida Nasunhinagogo i, jala padirgahonmu bohim tu Debata. #* Ps 37:4 27Martangiang ho tu Ibana, jadi tangihononna ma ho, jala gararonmu angka bagabagam. #Ps 50:14-15 28Molo disangkap roham manang aha, sai na saut do i tumpahanna, jala * marhatiuron angka dalanmu sondanganna. #* Job 18:5-6, 19:8, 29:8 29Molo * dipajepol halak ho, jadi dohononmu ma: Hatimbulon do i! Jala manang ise na + serep marpanaili, martua do bahenonna. #* Poda 29:23; Mat 23:12; Jak 4:6; 1Ptr 5:5; + Luk 18:13 30Paluaonna ma sian salana nang halak na so lias hian, paluaonna ma tutu marhite sian habontoron ni tanganmu. #1Mus 18:23-24; Ps 18:21, 25; Hes 14:14-20; Luk 22:32
Currently Selected:
JOB Bindu 22: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.