JOHANNES Bindu 14
Bindu 14
Martinading hata Tuhan Jesus tu siseanna (14:1—16:33).
Tuhan Jesus do dalan tu hangoluan 1-15.
Diparbagabaga do Tondi Parbadia 16-24.
Diapul Tuhan Jesus siseanna 25-31.
I. 1Unang ma bonsa rohamuna! Porsea ma hamu di Debata, jala porsea ma hamu di Ahu! 2Torop do inganan di bagas ni Damang. Aut so i, dohononku ma tu hamu: Na laho do Ahu mangarade inganan di hamu? 3Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu! #Joh 12:26, 17:24 4Jala diboto hamu do dalan tu inganan sitopotonki. 5Dung i ninna si Tomas ma mandok Ibana: Ndang huboto hami, manang tudia Ho laho, Tuhan: Jala sian dia ma botoonnami dalan i? 6Gabe didok Jesus ma tu ibana: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu. #Mat 11:27; Joh 11:25; Rom 5:1-2; Heb 10:19-20 7Anggo ditanda hamu Ahu, tandaonmuna do nang Damang i. Olat ni on ma ditanda hamu Ibana jala diida hamu Ibana. 8Gabe didok si Pilippus ma tu Ibana: Patuduhon tu hami Ama i, ale Tuhan, asa sombu rohanami! 9Jadi didok Jesus ma: Nunga pola na sai leleng Ahu rap dohot hamu, laos so ditanda ho dope Ahu, ale Pilippus. Na marnida Ahu, marnida Ama i do; boasa ma dohononmu: Patuduhon tu hami Ama i? #Joh 12:45; Heb 1:3 10Ndang porsea ho, Ahu di bagasan Ama i jala Ama i di bagasan Ahu? Apala sian roharohangku huhatahon hata angka na hudok tu hamu. Ama i na maringanan di bagasan Ahu, i do patulus angka ulaonna i. #Joh 12:49 11Porsea ma hamu di Ahu: Di bagasan Ama i do Ahu jala di bagasan Ahu do Ama i; molo so i, ala ni angka ulaon i ma hamu porsea! #Joh 10:25, 38, 14:20 12Na tutu situtu do na hudok on tu hamu; Patupaon ni na porsea di Ahu do songon angka ulaon na huula i; na sumurung sian i dope patupaonna tahe, ai na laho ma Ahu tu Damang. #Mrk 16:19-20 13Asa manang aha pangidoanmuna marhitehite Goarhu, patupaonku do, asa marsangap Ama i di bagasan Anak i! #Mrk 11:24; Joh 15:7 14Molo dipangido hamu manang aha sian Ahu marhitehite Goarhu, patupaonku ma i! #Joh 16:23-24 15Molo na holong rohamuna di Ahu, radotanmuna do angka patikku. #Joh 15:10; 1Joh 5:3
II. 16Jala pangidoonku ma tu Ama i, asa dilehon tu hamu sada Pangondian na asing, asa I mandongani hamu salelengna i. #Joh 14:26, 15:26, 16:7 17I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana. #Joh 7:39, 16:13 18Ndang tadingkononku hamu so marama; na ro ma Ahu mandapothon hamu. 19Saotik nari nama, jadi ndang be idaon ni portibi on Ahu, alai idaonmuna do Ahu; ai na mangolu do Ahu, hamu pe mangolu do! #Joh 16:19 20Di na sadari i ma botoonmuna, Ahu di bagasan Damang jala hamu di bagasan Ahu jala Ahu di bagasan hamu. #Joh 17:21, 23 21Manang ise na maniop angka patikki jala diradoti, i do na holong roha di Ahu. Alai dihaholongi Damang i do na holong roha di Ahu; Ahu pe, holong do rohangku di ibana jala papataronku ma Ahu tu ibana. #2Kor 3:18 22Jadi didok si Judas ma (ndada si Iskariot i): Dia do alana, Tuhan, umbahen na holan tu hami papataronmu dirim, ndada tu portibi on? 23Dung i ninna Jesus ma mangalusi ibana: Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana. #Poda 8:17; Joh 14:21; Eps 3:17 24Na so holong roha di Ahu, ndang radotan ni i hatangku. Ndang Ahu nampuna hata na binegemuna i, Ama i na marsuru Ahu do! #Joh 7:16
III. 25I ma huhatahon tu hamu, tagan rap dope Ahu dohot hamu. 26Alai anggo Pangondian i, i ma Tondi Parbadia, sisuruon ni Ama i marhitehite Goarhu, ajarhonon jala paingothonon ni I do tu hamu nasa na huhatahon i tu hamu! #Joh 14:16, 15:26 27Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna! #Joh 16:33; Plp 4:7 28Nunga dibege hamu hatangku: Na laho ma Ahu, jala na ro do Ahu muse manopot hamu. Aut na holong rohamuna mida Ahu, las ma rohamuna, ala laho Ahu manopot Ama i; ai umbalga do Damang asa Ahu. #Joh 14:3, 18 29Asa nunga hupaboa i hian tu hamu, andorang so jumpang dope, asa porsea hamu, dung songgop. 30Ndang haru godang be hatahononku tu hamu, ai na ro ma raja ni portibi on; ndang adong dihana i nian di Ahu. #Joh 12:31; Eps 2:2 31Alai naeng ma botoon ni portibi on, na holong do rohangku di Ama i jala sipasaut pandok ni Ama i do Ahu. Onpe, hehe ma hamu, laho ma hita sian on! #Joh 10:18
Currently Selected:
JOHANNES Bindu 14: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.