PANURIRANG JEREMIA Bindu 9
Bindu 9
Andung ni si Jeremia ala sange ni roha mago ni bangso i 1-5.
Turut do uhum na madabu tu Jerusalem 6-21.
Parbinotoan di Debata lapang mamolin dapotan barita na sintong; alai sobokkon angka bangso parbegu do Israel 22-25.
I. 1Aut ni adong nian di ahu di halongonan sada bagas parmalaman ni pangallung, asa hutadingkon bangsongku, asa bungkas ahu tumadingkon nasida, ai saluhut nasida angka pangalangkup do, luhutan ni angka pangoseose. #Jer 5:7 2Tangging do dila nasida songon sior maniorhon sipaotooto, jala ndang dihajongjongkon nasida hasintongan di tano i, ai mardapotdapot hajahaton diula nasida, alai anggo ahu, ndang ditanda nasida, ninna Jahowa. #Jer 6:7 3Sai diramoti be ma dirina maradophon donganna, jala unang marhaposan tu dongan manang ise pe, ganup dongan marbisukbisuk, jala ganup pedan mangkata tundal. #1Mus 27:36; Jer 12:6; Mik 7:5-6 4Tung masipaotootoan do na marpedan jala ndang di hatahon hasintongan; nunga dipasomal dila nasida mandok sipaotooto, jala marngalutan dihilala nasida manjahati. 5Di tongatonga ni sipaotooto do ingananmu, jala ala ni sipaotooto i manjua do nasida mananda ahu, ninna Jahowa.
II. 6Dibahen i songon on do hata ni Jahowa Zebaot: Ida ma: Lalaonku ma nasida, jala ujionku, ai tung aha dope ulaning bahenonku maradophon boru ni bangsongku? 7Sumbia na ginarahon do dilanasida mangkatahon sipaotooto; hata dame dipaboa ianggo dilana tu donganna, hape mangonggop ianggo rohana di bagasan. #Ps 12:3, 28:3, 120:4 8Tung so marlulu ahu dompak nasida alani? Ninna Jahowa; tung so marsudolsudol rohangku mida bangso sisongon i? #Jer 5:9, 29 9Di atas ni angka dolok ma bahenonku partatangison dohot angguhangguk, jala di angka jampalan di halongonan sada ende andung, ala naung siap, so adong pamolus nanggo sahalak, jala ndang be tarbege soara ni pinahan. * Pidong na martongatonga langit pe ro di pinahan, tung purpur do saluhutna. #* Jer 4:25, 12:4 10Bahenonku do huhut Jerusalem gabe pantilpantil batu, paronggopan ni angka antuasu, jala angka huta ni Juda bahenonku gabe halongonan so adong pangisina. #Jes 34:13; Jer 10:22, 26:18 11Tung ise ulaning baoa * na pistar, jala na mangantusi hata on? Jala ise ibana na pinangkulingan ni Jahowa, asa baritahononna? Boasa tung siap tano on, doshon halongonan raharna, so adong pamolus. #* 5Mus 32:29 12Dung i ninna Jahowa ma: Ala na tinadingkon nasida i patikki, na hulehon tu jolonasida, jala na so tinangihon nasida soarangku, jala ndang marparange hombar tusi. 13Tung tagonan * hatangkangon ni rohanasida paihutihutonna mangihuthon tu Baal, angka na niajarhon ni ompunasida i. #* Jer 7:24 14Dibahen i songon on do hata ni Jahowa Zebaot, Debata ni Israel: Ida ma, ahu papanganhon tu bangso i pogu jala ahu painumhon aek rasun tu nasida. #Jer 8:14, 23:15 15Jala ahu paserakkon nasida tu tongatonga ni bangso angka na so tinandanasida, manang ompunasida pe, jala ahu manongos podang sian pudinasida, paima sun siap nasida hubahen. #3Mus 26:33; 5Mus 28:64 16Songon on do hata ni Jahowa Zebaot: Tangihon jala jou hamu angka sibaso pangandung, asa ro nasida, jala suru hamu mangalapi angka boruboru pangarunding. 17Asa dihalaputi nasida mambahen sada andung di hita, asa mabakbak iluilu sian matanta, jala mabaor aek sian imbulu ni matanta. 18Ai tarbege do soara andung sian Sion: Nunga mago hita, nunga tarurak situtu hita, ai nunga bungkas hita sian tanonta, ai nunga di pangarumpakkon nasida angka bagasta! 19Antong hamu inaina, tangihon hamu ma hata ni Jahowa, jala ditangkup pinggolmuna ma hata na ruar sian pamanganna, jala ajarhon hamu ma andung tu borumuna, jala ganup mangajarhon andung tu pedanna. 20Ai nunga manjangkit hamatean sian pandiloannami, nunga pola dibongoti angka bagasnami, asa diragehon angka dakdanak sian alaman, angka dolidoli sian onan. 21Dok ma, songon on do hata ni Jahowa: Marragean ma * bangke ni jolma, songon napa di ladang, jala songon tibalan di pudi ni panabi, jala ndang adong na papunguhon. #* Jer 7:33
III. 22Songon on do hata ni Jahowa: Sai unang ma ditengahon na bisuk habisukonna, sai unang ma ditengahon na gogo hagogoonna, sai unang ma ditengahon na mora hamoraonna. 23Manang ise na naeng mamuji dirina, * on ma dipujihon: Na marroha i ibana, jala na tinandana i ahu, ai ahu do Jahowa, parasi roha na mangkajongjongkon uhum dohot hatigoran di tano on, ai angka ido lomo ni rohangku, ninna Jahowa. #* 1Kor 1:31; 2Kor 10:17 24Ida ma, na ro do angka ari sogot, ninna Jahowa, marlulu ma ahu dompak nasa parsunaton mardongan sibursibur. 25Dompak halak Misir, dompak halak Jahudi, dompak halak Edom, dompak halak Amon, dompak halak Moab dohot dompak saluhut * na marulu na ginorbang, angka na maringan di halongonan. Ai saluhut angka parbegu ndang marsunat, alai anggo sandok pinompar ni Israel + marroha na so sinunat do. #* 3Mus 19:27; + 5Mus 30:6; Jer 4:4
Currently Selected:
PANURIRANG JEREMIA Bindu 9: BBC
Highlight
Share
Compare
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.