PANURIRANG JEREMIA Bindu 17
Bindu 17
Ingkon toruan Juda ala ni pardebataonna sileban 1-4.
Marjea ma manang ise na marhaposan tu jolma, alai martua ma na marhaposan tu Jahowa 5-11.
Tangiang ni panurirang i 12-18.
Lumbalumba unang diramuni ari Sabbat 19-27.
I. 1Ia dosa ni Juda nunga tarsurat marpanurat bosi, marujung mata intan taruhir tu batu panuratan ni rohanasida dohot tu saluhut tanduk ni langgatannasida. #Job 19:24 2Songon parningot ni angka anaknasida di angka langgatanna dohot di angka sombaonnasida, di toru ni hau na rata, di punsu ni dolok angka na timbo. 3Ia dolokku rap dohot tanona, sinamotmu ro di saluhut artamu lehononku ma i gabe tabantaban, nang angka panggungmu ala ni dosa angka na masa di saluhut parbalohanmu. #Jer 15:13 4Jadi pabalionna ma ho sian partalianmu na hulehon tu ho, bahenonku ma ho gabe hatoban ni musum di tano na so tinandam, ai nunga * dipagalak hamu sada api di bagasan murukku, marnalanala ma i ro di saleleng ni lelengna. #* Jer 15:14
II. 5Songon on do hata ni Jahowa: Marjea ma baoa na marhaposan tu jolma, manang tu bolon ni botohonna, gabe dipasurut rohana sian Jahowa. #2Kron 32:8; Ps 118:8, 146:3 6Songon halak * parbahudung di tano na mahiang do ibana, ndang tagamon idaonna ro na denggan i, jala maringan ibana di + tano bangkalbangkal di halongonan, di tano na ansim na so hinundulan ni halak. #* Jer 48:6; + Ps 107:34 7Alai martua ma baoa na marhaposan tu Jahowa, jala Jahowa haporusanna dibahen. #Ps 146:5; Jes 30:18 8Tudos do ibana tu hau na sinuan di topi ni batang aek, jala manjarar uratna di lambung batang aek, jala ndang mabiar ibana molo ro hamohopon, jala tongtong rata bulungna, jala ndang holsoan ibana di taon haraharon, jala ndang mansohot marparbue. #Ps 1:3 9Tung na angkal situtu do roha ni jolma, jala na ganggu, tung ise ma na tuk mandodoisa? 10Ahu Jahowa do * Sidodo roha, siuji piapia jala + mangalehon tu ganup jolma hombar tu dalanna, hombar tu parbue ni pambahenanna. #* 1Sam 16:7; Ps 7:10; + Job 34:11; Poda 1:31; Rom 2:6 11Songon manuk harangan na mamodomhon pira angka na so pinirahonna, songon i do halak na papunguhon arta sian dalan na so turut. Di parsitongaan ni angka arina, tadingkononna ma i jala di ujungna gabe halak na oto ibana. #1Sam 25:25; Ps 39:7; Luk 12:20
III. 12Oe habangsa ni hamuliaon, hatimboon sian mulamula, hajongjongan ni habadiaonnami! 13Ale Jahowa, ho do pangkirimon ni Israel! Saluhut angka na tumadingkon ho gabe tarurak; angka na marbalik sian ahu, ingkon tarsurat goarna tu tano, ala * tinadingkonnasida mual ni aek hangoluan, i ma Jahowa. #* Jes 1:28; Jer 2:13 14Sai ho ma pamalum ahu, ale Jahowa, asa tung malum huhilala; sai ho ma mangurupi ahu, asa tung dapotan pangurupion ahu, ai ho do pujipujionku. #Ps 6:3 15Ida ma, angka nasida mandok tu ahu: Didia do hata ni Jahowa i? Uaro ma nian nuaeng! #Jes 5:19; 2Ptr 3:4 16Alai anggo ahu, ndang husonsonhon gabe parmahan ahu mangihuthon ho, jala ndang huhalomohon ari na marjea i, ho do umbotosa; hata na ruar sian bibirhu pe patar do i di jolo ni bohim. #Jer 1:6 17Unang tung gabe hasonggoton ho di ahu, ho do haporusanku di ari hasusaan. 18Ingkon tarurak nian angka na mangalele ahu, alai unang tarurak anggo ahu; ingkon tarsonggot nasida, alai unang tarsonggot anggu ahu, paro ma tu atasnasida ari hinamago, jala silompit dua hapipidomnasida i. #Ps 35:4, 40:15
IV. 19Songon on do hata ni Jahowa tu ahu: Laho ma ho, tindang ma ho di bagasan bahal ni angka anak ni bangso i, marmeang muli sian i angka raja ni Juda, tongon tahe di bagasan saluhut angka bahal ni Jerusalem. 20Dung i dohononmu ma tu nasida: Tangihon ma hata ni Jahowa, hamu angka raja ni Juda, dohot sandok Juda ro di sude isi ni Jerusalem, angka na masuk sian angka bahal on. 21Songon on do hata ni Jahowa: Sai jamoti hamu ma tondimuna i, unang usung hamu siusungon di ari Sabbat, jala unang boan hamu sian angka bahal ni Jerusalem. #Neh 13:19 22Jala unang paruar hamu siusungon sian bagasmuna di * ari Sabbat, jala unang bahen nanggo sada ulaon, sai parbadiai hamu ma ari Sabbat i, songon na hutonahon tu ompumuna. #* 2Mus 20:8-11; Jes 56:2, 58:13 23Alai ndang ditangihon nasida jala ndang dipaeleng pinggolna, lam dipajogal tahe tangkuhukna, unang marbinege, jala ndang dijalo pangajaran. #Jer 11:8 24Alai molo tung ditangihon hamu ahu, unang mamboan siusungon sian bahal ni huta on di ari Sabbat laho pabadiahon ari Sabbat i, unang dibahen hamu disi manang aha ulaon. 25Jadi bongot ma sian angka bahal ni huta on angka raja dohot angka induk, angka na hundul di habangsa ni si Daud, marsihundul di hureta dohot di hoda do nasida, dohot induknasida i, angka halak Juda dohot isi ni Jerusalem, jala ingananna huta on ro di saleleng ni lelengna. #Jer 22:4 26Ro do huhut sian angka huta ni Juda dohot sian humaliang Jerusalem dohot sian tano Benjamin dohot sian tano adaran dohot sian dolok dohot sian dangsina angka na mamboan pelean situtungon dohot sipotongon dohot sipanganon dohot daupa dohot pujipujian tu bagasan joro ni Jahowa. 27Alai molo so ditangihon hamu ahu laho pabadiahon ari Sabbat i taringot tu na mangusung siusungon dohot masuk sian angka bahal ni Jerusalem di ari Sabbat, pagalahonku ma sada api di bahalmuna gabe suda panganonna angka bagas bolon ni Jerusalem, jala ndang haintopan.
Currently Selected:
PANURIRANG JEREMIA Bindu 17: BBC
Highlight
Share
Compare
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.