PANURIRANG JEREMIA Bindu 14
Bindu 14
Pangalaho ni logo ni ari ranggapuri 1-6.
Pangondihon ni panurirang di bangso i 7-12.
Alualu taringot tu angka panurirang pangansi; tu hamagoan do nasida sogot rap dohot bangso i 13-18.
Diulahi panurirang i mangondihon 19-22.
I. 1On do hata ni Jahowa na ro tu si Jeremia taringot tu logo ni ari. 2Marsak do ia Juda, angka harbanganna pe jomba do margudompong tu tano, maungaung tu ginjang do angguhangguk ni Jerusalem. 3Disuru angka na sangap sian nasida angka situan na torop mangalului aek. Tolhas nasida tu angka sumur, ndang adong jumpangsa aek disi, mulak boti nasida, ndang marisi hudonna, maila nasida jala tarurak, pola dihungkupi ulu nasida. 4Ala angka rigat tanona, ai ndang adong ro udan tu tano i, murak do angka parumauma, pola di hungkupi do ulu nasida. #Joel 1:11 5Ai ursa tini pe di ladang, naung maranak poso, gabe ditadingkon do i, ala so adong duhut na martumbur. 6Halode harangan pe angka na jongjong di atas ni robean na palpal, marhosahosa songon naga, homur do mata nasida, ala so adong duhut na martumbur.
II. 7Molo hajahatonnami manindangi dompak hami, ale Jahowa bahen ma hombar tu goarmu, ai torop do panundalionnami, dompak ho do hami mardosa. #Dan 9:4-14 8Ho ale haposan ni Israel sipalua ibana di tingki hagogotan, boasa tung gabe doshon halak na buro ho di tano on, jala songon halak pardalandalan, na mambahen undungundung parmalaman. 9Boasa tung ho gabe doshon halak na tarhatotong, songon ulubalang na so margogo mangurupi? Alai di tongatonganami do ho ale Jahowa, jala * targoar tu goarmu do hami; dibahen i unang tung tadingkon hami! #* Jes 43:7; Jer 15:16 10Songon on do hata ni Jahowa tu bangso on: Madoado boti do di haholongi rohanasida, ndang diontohi ia patnasida i; alai ndang lomo roha ni Jahowa mida nasida ingotonna ma nuaeng hajahaton nasida, jala luluhononna angka dosanasida i. 11Dung i ninna Jahowa ma tu ahu: * Unang be ondihon bangso on tu na denggan! #* 2Mus 32:10; Jer 7:16, 11:14 12Molo marpuasa nasida, ndang tangihononku angguhangguknasida, jala nang pe di pelehon nasida pelean situtungon dohot sipanganon, ndang lomo rohangku di nasida; ingkon ripashononku nasida marhitehite podang, haraparon dohot begu antuk. #Jes 1:15, 58:3; Jer 6:20, 7:21, 11:11
III. 13Dung i ningku ma mangalusi: Iale Tuhan Jahowa! Ida ma, angka panurirang i mandok tu nasida: Ndang tagamon idaonmuna podang, jala tagamon haraparon hamu, ai hasonangan manongtong lehononku tu hamu di inganan on. #Jer 5:31 14Dung i ninna Jahowa ma tu ahu: Sipaotooto do * di surirangkon angka panurirang i marhitehite goarhu, ndada ahu marsuru nasida, ndada ahu martona tu nasida, ndada ahu mandok tu nasida; alatan sipaotooto dohot pangarundingon dohot na so marguna dohot sipaotooto di rohanasida sandiri di surirangkon nasida tu hamu. #* Jer 23:21, 27:14-15, 29:8-9 15Dibahen i songon on do hata ni Jahowa dompak panurirang, angka na manurirangi * marhitehite goarhu, atik pe so ahu marsuru nasida, angka na mandok: Ndang tagamon masa podang manang haraparon di bagasan luaton! Ingkon marhitehite podang dohot haraparon rendep angka panurirang i. #* 5Mus 18:20 16Alai anggo bangso na sinurirangannasida i, ingkon mampar marambolongan do di angka alaman ni Jerusalem, binahen ni haraparon dohot podang, jala ndang adong * na mananom nasida, tole nasida, tole jolmanasida, tole anaknasida dohot borunasida; usehononku ma tu nasida hajahatonnasida i. #* Jer 8:2 17Dibahen i dohononmu ma tu nasida hata on: Ingkon * dumarede iluilu ni matangku borngin dohot arian, ndang marpansadian, ai pasang do bugang ni boru ni bangsongku, tung na bernit situtu do bugangna i diae. #* Jer 8:23; And 1:16, 2:18 18Molo ruar ahu tu ladang, ida ma, angka na rage binahen ni podang; molo mulak ahu tu huta, ida ma, angka na marranggangan binahen ni haleon; ai tole panurirang, tole malim mardalani tu tano na so tinandana.
IV. 19Beha, nunga tung diambolongkon ho situtu Juda? Manang naung gialan roham di Sion? Boasa tung songon i hami pungkulonmu, gabe so adong be di hami hahisaron? Sai * maimaima hami di hatuaon, hape ndang adong na denggan, sai maimaima hami di tingki hamalumon, hape ida ma, holan hasonggotan do. #* Jer 8:15 20Nunga hutanda hami, ale Jahowa, hajahatonnami, hasalaan ni ompunami, ai dompak ho do hami mardosa. #Ps 106:6; Jer 14:7; Dan 9:8 21Unang tung ambolongkon hami ala ni goarmu; unang tung paurak habangsa ni hamuliaonmu; sai paingotingot, unang tung muba padan na binahenmu tu hami. 22Tung adong ma di tongatonga ni debata ni parbegu angka na so hasea tarbahen paro udan? Manang tung tarbahen langit i mangalehon udan sian dirina? Nda ho do, ale Jahowa Debatanami dohot haposan ni rohanami, ai ho do jumadihon saluhutna i. #Ps 135:7; Jer 5:24
Currently Selected:
PANURIRANG JEREMIA Bindu 14: BBC
Highlight
Share
Compare
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.