PANGUHUM Bindu 21
Bindu 21
Habot ni roha ni Israel mida hararage ni Benjamin 1-7.
Paminsangon tu huta Jabes di Gilead, borunasida dilehon tu halak Benjamin 8-15.
Torlaum angka boru ni halak Silo 16-25.
I. 1Alai nunga pola marmangmang hian halak Israel di Mispa songon on: Na so tupa lehonon ni manang ise sian hita on boruna bahen jolma ni halak Benjamin. #Pangh 20:1, 21:7, 18 2Dung i tolhas ma bangso i tu Betel, laos tading disi sahat ro di bodari di adopan ni Debata, jala dipangiar be suarana mangangguk badar. #Pangh 20:18, 23 3Angka ninna nasida ma: Ale Jahowa, Debata ni Israel, boasa tung masa songon i di Israel, pola tung moru sadarion sada marga sian Israel? 4Dung i manogotna i dipasogot bangso i ma hehe, jala dipauli disi sada langgatan, jala dipelehon angka pelean situtungon dohot pelean hamauliateon. #Pangh 20:26 5Dung i ninna halak Israel ma: Nda tung adong manang ise sian saluhut angka marga ni Israel, na so nangkok ro tu luhutan manopot Jahowa? Ai tung marsumpa bolon do nasida, ganup na so nangkok tumopot Jahowa tu Mispa, ingkon marutang hosa ibana didok. #Pangh 20:1 6Dung i tarsolsol bagi ma halak Israel taringot tu Benjamin, angginasida i, angka ninna ma: Tung siap do hape sadarion sada marga sian Israel. #Pangh 21:3 7Beha nama itabahen tu nasida angka na teba i, asa marjolma be? Ai nunga pola marmangmang hita tu Jahowa, na so tupa lehononta tu nasida ianggo borunta bahen jolmanasida. #Pangh 21:1
II. 8Ala ni do umbahen didok nasida: Adong do ulaning sada sian angka marga ni Israel na so nangkok tu Mispa tumopot Jahowa? Jadi ida ma, ndang adong agia ise ro tu parsaroan i sian Jabes di Gilead tumopot luhutan i. #1Sam 11:1 9Ai di na binilangna bangso i, ida ma nanggo sada ndang adong disi baoa sian isi ni Jabes di Gilead. 10Jadi dipaborhat huria i ma tusi sampulu dua ribu halak angka na begu marmusu ditonahon ma tu nasida songon on: Laho ma hamu, jala tampuli hamu isi ni Jabes di Gilead dohot podang, ro di inaina dohot posoposo. #5Mus 13:16 11Songon on do bahenonmuna: Nasa baoa dohot inaina, angka naung niangkupan ni baoa modom, ingkon siaphononhon do. #4Mus 21:2, 31:27 12Jadi jumpang nasida ma sian isi ni Jabes di Gilead opat ratus boruboru na marbaju, angka na so dung niangkupan ni baoa modom, jala diboan nasida tu parsaroan i tu Silo, na di tano Kanaan. 13Dung i disuru sandok huria i ma suruanna mandok hata tu halak Benjamin, angka na di dolok batu Rimmon, maningtingkon pardemahan tu nasida. #Pangh 20:47 14Jadi uju i ma mulak halak Benjamin, gabe tu nasida dilehon boruboru, angka na pinangolu sian angka boruboru isi ni Jabes di Gilead; alai tahe ndang singkop di nasida. 15Jadi asi ma roha ni bangso i mida Benjamin, ala naung binahen ni Jahowa hataluan di angka marga ni Israel. #Pangh 21:3, 6
III. 16Dung i ninna angka sintua ni huria i ma: Beha nama bahenonta, asa marjolma dohot angka na teba i? Ai nunga tung siap parompuan sian Benjamin. 17Angkup ni ninna nasida: Angka na malua i ma nampuna partalian ni Benjamin, asa unang laos pidom sada marga sian Israel. 18Alai anggo hita, ndang tarlehon hita borunta bahen jolmanasida, ai nunga pola marmangmang halak Israel songon on: Hona bura ma manang ise na mangalehon boru tu halak Benjamin. #Pangh 21:1, 7 19Dung i ninna nasida muse: Ida ma; masa do ganup taon ari raya di Jahowa di Silo, na tungkan utara sian Betel, tungkan habinsaran ni dalan na laho nangkok sian Betel tu Sikem, jala tungkan dangsina sian Lebona. 20Dung i ditonahon nasida ma tu halak Benjamin songon on: Laho ma hamu mangonggop di angka porlak anggur. 21Dung i matahon hamu ma, molo ruar angka boruboru sian Silo laho manontor marhoronhoron, jadi ruar ma hamu sian angka porlak anggur i, jala ganup hamu mangaluahon sada be sian angka boru ni Silo bahen jolmana, laos boan hamu tu tano Benjamin. 22Dung i molo ro amanasida manang ibotonasida manonjol hami, gabe dohononnami ma tu nasida: Basabasahon hamu ma nasida tu hami! Ai ndang hubuat hami di ganup jolmana marhite sian porang; hamu pe ndada hamu mangalehon nasida tu nasida; dibahen i sandok na so marsala do hamu disi. 23Jadi dibahen halak Benjamin ma songon i, angka dipambuat be ma boru marguru tu bilangannasida sian panontori, angka na nilaumnasida, laos laho nasida mulak tu partaliannasida, jala dipauli angka hutana, laos maringan disi. #Pangh 20:47, 21:12 24Halak Israel pe mardalan do uju i sian i mulak be tu margana dohot tu bangsona, jala borhat be nasida sian i mulak tu partalianna be. 25Di angka ari uju i ndang adong raja di Israel, ganup mambahen lomo ni rohana be. #Pangh 17:6
Currently Selected:
PANGUHUM Bindu 21: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.