PANGUHUM Bindu 17
Bindu 17
Parsombaon ni si Mika di ganaganaan 1-6.
Dipabangkit sada halak Lepi bahen malim 7-13.
I. 1Dung i adong ma sada baoa sian dolok Epraim, na margoar si Mika. 2Ro ma hatana mandok tu inana: Ia na saribusaratus rupia, naung mago sian ho, pola naung mamburai ho dohot tu pinggolhon hata i didok ho, ida ma, di ahu do hepeng i, ai ahu do mambuatsa. Jadi didok inana ma: Sai dipasupasu Jahowa ma ho, ale anaha! #3Mus 5:1 3Dung i dipaulak ma rupia sisaribu saratus i tu inana, alai ninna inana i ma: Nunga husombasombahon hian hepeng i tu Jahowa marhite sian tanganku di anakku, asa dipauli sian i sada ganaganaan na niuhir dohot na tinuang, on pe mulak ma i tu ho hulehon. #Pangh 8:27, 17:13 4Alai dipaulak ibana muse hepeng i tu inana, gabe dibuat inana i dua ratus rupia, jala dilehon tu panopa, na mambahen sian i sada ganaganaan na niuhir dohot na tinuang; laos di jabu ni si Mika do i musengani. #Jes 40:19 5I ma dalanna umbahen adong sada joro ni debata hapunjungan ni si Mika, dung i dibahen ma sada baju epod dohot terapim, laos diurasi sada sian angka anakna pabangkithon gabe malimna. #Pangh 8:27 6Di angka ari uju i ndang adong raja gumomgom Israel, ganup masibahen lomo ni rohana be. #Pangh 18:1, 19:1, 21:25
II. 7Alai adong ma sada dolidoli sian Betlehem Juda, na hinomit di marga Juda, jala halak Lepi do ibana, jala manompang ibana disi. #Pangh 18:3, 30 8Naung jalang do baoa i sian huta Betlehem Juda, asa manompang manang didia ibana sangkot; jadi dung ro ibana tu dolok Epraim sahat tu bagas ni si Mika, naeng manulus dalanna nian. #2Raj 8:1 9Jadi ro ma hata ni si Mika tu ibana: Sian dia ho ro? Gabe didok ibana ma mangalusi: halak Lepi do ahu sian Betlehem Juda, jala na mardalani do ahu naeng manompang manang didia ahu sangkot. 10Dung i ninna si Mika ma tu ibana: Tading di lambungkon ma ho! Asa gabe ama dohot malim di ahu; lehononku ma tu ho sampulu rupia sataon, jala singkop pangkean dohot bohalmu, gabe dioloi halak Lepi i ma rap dohot ibana. #1Mus 45:8; 2Raj 6:21, 13:14 11Jadi lomo ma roha ni halak Lepi i maringan di lambung ni baoa i, jala doshon sada sian angka anakna sandiri dolidoli i dibahen. 12Dung i dipabangkit si Mika ma halak Lepi i, bahen malimna dolidoli i, laos maringan ibana di jabu ni si Mika. #Pangh 17:5 13Dung i didok si Mika ma: Nuaeng pe tangkas huboto, sai tumpahan ni Jahowa do ahu, ala naung halak Lepi gabe malim di ahu.
Currently Selected:
PANGUHUM Bindu 17: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.