JAKOBUS Bindu 4
Bindu 4
Jea ni roha portibi on; martua do na saor tu Debata 1-12.
Guru di Debata do ngolunta 13-17.
I. 1Sian dia do angka parbadaon dohot parmusuon na di hamu? Nda sian hisaphisap, angka na maralo di bagasan angka ruasmuna! #1Ptr 2:11 2Na marsangkapi do rohamuna, alai ndang dapotan; na mambunu do hamu jala mangiburu, laos so taruli hamu. Na masialoan do hamu jala marmusu, so adong di hamu, ala so martangiang hamu. 3Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna. 4Hamu angka pangalangkup, ndang diboto hamu, hamusuon dompak Debata do paralealeon dohot portibi on? Asa, na naeng aleale ni portibi on, dipajongjong do dirina, gabe alo ni Debata. #Luk 6:26; Rom 8:7; 1Joh 2:15 5Manang ninna rohamuna, gait do na nidok ni Surat i? Pangiburu do Tondi i, naung dipadiri di bagasan hamu. #2Mus 20:3-5; Mat 6:24 6Alai lam gumodang do asi ni roha dilehon; ala ni i do didok: “Dialo Debata do angka na ginjang roha, alai dilehon do asi ni roha tu angka na serep marroha!” #Mat 23:12; 1Ptr 5:5 7Antong, oloi hamu ma Debata; alo hamu ma sibolis i, dung i maporus ma ibana sian hamu. #Eps 6:12; 1Ptr 5:8-9 8Pajonok hamu ma tu Debata, dung i pajonohonna ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha! #Jes 1:16; Sak 1:3 9Arsakkon hamu ma jeamuna; mangangguhi jala tumatangis ma hamu; muba ma parengkelonmuna gabe partangison, nang halalas ni roha gabe arsak ni roha! 10Paserep hamu ma rohamuna maradophon Tuhan i, dung i patimboonna ma hamu. #1Ptr 5:6 11Unang ma hamu masipahatahataan, ale angka dongan; na mangkatahata jala manguhumuhumi donganna, mangkatahata jala manguhumuhumi patik do i. Alai molo diuhumi ho patik i, panguhum do ho, ndada siula na nidok ni patik i. 12Sada do Sipajongjong patik jala Panguhum; i do na tarbahen paluahon dohot mangagohon. Alai ho, ise do ho, umbahen na diuhumi ho donganmu? #Mat 7:1; Rom 2:1, 14:4
II. 13E hamu, didok hamu do: Sadari on manang marsogot laho ma hami tu huta adui, asa disi hami sataon martigatiga jala mangomoomo. #Poda 27:1 14So adong diboto hamu na masa marsogot; ai aha do hosamuna! Suman ma hamu tu timus, na tarida satongkin, dung i gabe so haidaan be. #Luk 12:20 15Singkat ni i ma nian dohononmuna: Molo na lomo roha ni Tuhan i, mangolu ma hami, jala bahenonnami ma on dohot an. #Ul 18:21 16Hape ditengatengahon hamu do hata manggang muna; na jahat do nasa panenganengahon sisongon i. 17Antong, na umboto mambahen na denggan, gabe ndang diulahon, na mardosa ma ibana disi. #Luk 12:47
Currently Selected:
JAKOBUS Bindu 4: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.