JAKOBUS Bindu 2
Bindu 2
Unang ma masa di huria parnidaon di bohi 1-7.
Ruhut masihaholongan, i do patik raja 8-13.
Mardongan ulaon na denggan do haporseaon na mangolu 14-26.
I. 1Ale angka donganku, unang ma siidaida bohi hamu, angka na porsea di Tuhanta Jesus Kristus na marsangap i! #1Kor 2:8 2Ai adong ma ro tu bagasan parguruanmuna sahalak partintin sere jala parulos na arga, ro ma huhut sahalak na pogos, marabit na humurang. 3Jadi dibereng hamu ma na marabit na denggan, didok hamu ma: Denggan ma ho juguk dison; alai tu na pogos i didok hamu: Disan ma ho jongjong, manang hundul ma ho tu na hudege on! 4Nda nunga marbagi dua rohamu disi; nda nunga manguhumi hamu mangihuthon pingkiran na jahat? 5Tangihon hamu ma, ale angka donganku na hinaholongan: Nda dipillit Debata angka na pogos di portibi on, asa mamora nasida marhitehite haporseaon jala panean di harajaon, na pinarbagabagana tu angka na holong roha di Ibana? #Luk 12:21; 1Kor 1:26-28 6Alai dileai hamu do na pogos i. Nda angka na mora i na paporsukporsukkon hamu jala manaratnarat hamu tu paruhuman? 7Nda nasida do na manginsahi Goar na denggan i, naung digoarhon tu hamu?
II. 8Sibahen na denggan do hamu, antong, molo marguru tu Surat i diulahon hamu patik raja on: “Haholongi donganmi songon dirim!” #3Mus 19:18 9Alai molo siida bohi hamu, na mangulahon dosa do hamu disi, gabe diuhumi patik i hamu songon pangalaosi. #5Mus 1:17 10Ai aut sura diradoti jolma saluhut patik i, alai tinggang di na sada, nunga gabe parsala ibana di saluhutna. #Mat 5:19 11Ai Ibana na mandok: “Unang ma ho mangalangkup!,” laos Ibana do mandok: “Unang ho mambunu!” Asa molo so mangalangkup ho, alai mambunu do, tong do ho pangalaosi di patik! #2Mus 20:13-14 12Di nasa hata dohot ulaonmuna ingot hamu ma: Siuhumon do hamu, bahenon ni patik haluaon i! 13Ai uhum na so marasi ni roha ma tu na so mangulahon asi ni roha; na monang do asi ni roha maralohon uhum. #Mat 5:7, 18:30, 34, 25:45-46
III. 14Aha ma gunana, ale angka donganku, molo didok halak, di ibana do haporseaon; alai ndang adong di ibana pangulaon. Tarbahen do haporseaon i paluahon ibana? #Mat 7:21 15Molo adong dongan baoa manang boruboru, na marsaemara jala hurangan di sipanganon siap ari, 16gabe adong na mandok sian tongatongamuna: Laho ma hamu mardamedame, las ma hamu, bosur ma hamu; alai ndang dilehon hamu tu nasida na ringkot di daging, aha ma gunana? #1Joh 3:17 17Haporseaon i pe songon i do: Anggo so adong pangulaonna, naung mate do hadirionna. 18Alai adong ma na mandok: Di ho do haporseaon; di ahu do pangulaon! Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku. #Gal 5:6 19Na porsea do ho, adong Debata sisadasada. Taho ma i; dohot do angka sibolis porsea disi, jala angka dotdot! 20Alai ho, ale jolma na rumar, naeng botoonmu, na so marguna haporseaon, anggo so marulaon? 21Nda gabe tigor si Abraham, amanta i, marhite sian ulaon, di na binoanna i si Isak, anakna i, tu pamelean? #1Mus 22:9-10, 12 22Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i. 23Jadi jumpang ma na nidok ni Surat i: “Dihaporseai si Abraham do Debata, jala i do dirajumi tu ibana gabe hatigoranna” jala targoar do ibana “aleale ni Debata.” #1Mus 15:6; Jes 41:8 24Asa diida hamu do: Sian angka pangulaon i do gabe tigor jolma, ndada holan sian haporseaon. 25Songon i do nang si Rahab boruboru na jahat i; nda sian angka pangulaon do ibana gabe tigor, di na jinangkonna i angka suruan jala dipalua do nasida sian dalan na asing? #Jos 2:4, 15; Heb 11:31 26Ai songon daging i na mate, anggo so martondi; songon i do mate haporseaon na so marulaon. #Jak 2:17
Currently Selected:
JAKOBUS Bindu 2: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.