PANURIRANG JESAYA Bindu 63
Bindu 63
Olopolop hamonangan ni bangso ni Debata mida angka musuna 1-6.
Panaringotion di asi ni roha ni Debata angka na binahenna sian na jolo dope 7-14.
Tangiang mangido asa marpangulahi roha ni Debata mida bangsona i 15-19.
I. 1Ise do ibana na ro sian * Edom, na ro marulos na rara sian Bosra? ** Na marpangkean na marhadohoan, jala na mangalangka di hinagodang ni gogona? Ahu do i + sihatahon hatigoran jala na margogo mangalehon tua. #* Jes 34:6; ** Pgk 19:11, 13; + Jes 42:1, 3 2Boasa tung marrara pangkeanmu, songon abit ni halak na mardege parbue ni anggur di bagasan pangilangan. #Pgk 19:13 3Sasada ahu do dumege pangilangan i, jala sian angka bangso ndang adong manang ise donganku! Jala nunga huluntak nasida di bagasan rimashu, jala nunga hugopui nasida di parpiar ni murukku, pola marbirsak mudarnasida tu angka uloshu, gabe sap saluhut abithu. #Joel 4:13; Pgk 14:18-20, 19:15 4Ai nunga dipingkir rohangku hian ari partubolan, jala nunga jumpang taon haluaon di angka naung huhophop. #Jes 13:9, 34:8, 61:2 5Jadi sai mangaranapi ahu humaliang, hape ndang adong nanggo sahalak na paluahon; jala tarhalomong ahu, hape ndang adong na tau donganku. Jadi tanganku sandiri nama patupahon hamonangan di ahu, jala parpiar ni murukku i ma mandongani ahu. #Jes 59:16 6Dibahen i nunga hugopui angka bangso di bagasan rimashu, jala * mabuk nasida hubahen di bagasan parpiar ni murukku, jala hudurushon tu tano mudarnasida i. #* Jes 51:17
II. 7Sai baritahononku do angka denggan basa ni Jahowa, angka pujipujian ni Jahowa, ai ido na tama marningot sude na binahen ni Jahowa tu hita, dohot ala ni godang ni denggan basana tu pinompar ni Israel, na binahenna tu nasida hombar tu angka asi ni rohana dohot tu godang ni denggan ni basana. 8Ai ninna do: Tongon do, bangsongku do nasida, * anak angka na so olo paotootohon. Jadi dung songon i ibana ma sipalua nasida. #* 5Mus 32:5, 20; Jes 1:2 9Di nasa hagogotannasida, dohot ibana targogot, jala * suruan ni bohina i paluahon nasida; sian holong ni rohana dohot sian pangolanina ibana paluahon nasida, jala dihindat nasida, jala + diompa ganup ari, sian na robi dope. #* 2Mus 23:20, 33:14-15; + Jes 46:3 10Alai manggunturi do anggo nasida, jala diarsahi Tondina na badia i; dibahen i marbalik ibana gabe musunasida, jala ibana sandiri marporang dompak nasida. #4Mus 14:11; Ps 78:56, 95:9; Eps 4:30 11Alai sai tongtong do anggo ibana marningot di bangsona uju di ngolu ni si Musa di angka ari na robi, alai anggo naung didok nasida: Didia do ibana naung mamboan nasida, nangkok sian * laut rap dohot parmahan ni parduaan ni birubiruna? Didia ibana na + marsagihon Tondina na badia i tu tongatonganasida? #* 2Mus 14:29; Ps 77:21; + 4Mus 11:25 12Ise ibana na manogu si Musa marhite sian tangan hamuliaonna naung patolak aek di jolonasida laho mambahen baritana salelenglelengna. 13Ibana na manogu nasida mamolus angka pusat, songon hoda di adaran, ndang dung tartuktuk? 14Songon pinahan na tuat tu rura, ditogihon Tondi ni Jahowa nasida tu hasonangan; songon i pe ditogihon ho bangsom asa mambahen goarmu marmulia.
III. 15Sai * tatap ma sian banuaginjang, jala ida sian ingananmu na badia, jala na marmulia! Didia do nuaeng hamuruhonmu dohot hagogoonmu? Parsigorgor ni holong dohot asi ni roham? Sai mandao sian ahu. #* 5Mus 26:15 16Ai sai ho do * amanami, ai ndang ditanda ianggo si Abraham hami, jala ndang dipabotoboto si Israel hami. Ho do ale Jahowa amanami; sipalua hami do goarmu sian nahinan. #Ps 27:10; * 5Mus 32:6 17Boasa tung diloas ho hami lilu sian angka dalanmu, ale Jahowa? Boasa tung dipatangkang ho rohanami, unang huhabiari hami ho? Sai marpangulahi ma roham ala ni naposom tu angka marga ni parjambaranmu. 18Satongkin sambing bangsom na badia i manean habadiaonmi, anggo nuaeng nunga diluntakluntak alonami. #Ps 74:7, 79:1 19Nunga hami songon halak na so dung ginomgomanmu sian na robi, na so dung marpanggoarhon goarmu.
Currently Selected:
PANURIRANG JESAYA Bindu 63: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.