PANURIRANG JESAYA Bindu 55
Bindu 55
Tingting mandokkon marsaulihon asi ni roha ni Debata 1-7.
Sai na songgop do tinembak ni angka sangkap hatuaon ni Debata 8-13.
I. 1O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor. #Joh 7:37; Pgk 22:17 2Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma ahu, asa panganonmuna na tabo i, jala bosuran rohamuna di tabotabo. 3Tarehon hamu ma pinggolmuna, jala ro ma hamu tu ahu! Tangihon hamu ma, asa mangolu tondimuna i! Jadi bahenonku ma tu hamu * padan salelenglelengna: I ma + padan parasian na sintong i tu si Daud na so tupa muba. #* Jer 31:31-34; + Ps 89:3-5; Ul 13:34 4Ida ma, sitindangi tu angka bangso ibana hulehon, bahen partogi dohot silehon patik tu angka bangso. #Pgk 1:5 5Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni na badia ni Israel, ai nunga marmulia ho dibahen. #Mat 4:16; Rom 10:20 6Sai lulu i hamu ma Jahowa, binsan tarbahen dope jumpang ibana; jou hamu ma ibana, binsan jonok dope ibana. #Jer 29:13; Mat 7:7 7Sai * ditadingkon halak parjahat i ma dalanna, jala jolma pargeduk i, angka sangkapna, sai mulak ma ibana tu Jahowa, asa marpangulahi rohana mida ibana; dohot tu Debatanta, ai + buas do rohana manalesei. #* Hes 18:27, 33:11, 19; + Ps 130:4, 7
II. 8Ai ndada pingkiranku pingkiranmuna i, jala ndada dalanmuna angka dalanku, ninna Jahowa. #Rom 11:33 9Ai songon timbo ni angka langit sian tano on, songon i do tumimbo angka dalanku sian dalanmuna i, jala angka * pingkiranku sian pingkiranmuna i. #* Ps 92:6 10Ai songon hadadabu ni udan dohot ambolas sian langit, jala ndada mulak boti tusi, nda jolo dibornohi tano i jala dipagabe, asa martumburi, jala dilehon boni tu halak panabur dohot roti tu halak na manganhon. 11Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos. #Mat 13:8 12Ai ingkon di bagasan * las ni roha hamu borhat, jala di bagasan hadameon hamu pataruon; pangiaron ni angka * dolok dohot robean soarana marolopolop di jolomuna, jala nasa hau di ladang martopaptopap tangan. #* 1Kron 16:33; Ps 96:12, 98:8; Jes 44:23, 48:20 13Singkat ni tadatada tubu ma sampinur, jala singkat ni latong tubu ma bunga na hushus; i ma bahen barita di goar ni Jahowa, bahen tanda salelenglelengna, na so olo hambar.
Currently Selected:
PANURIRANG JESAYA Bindu 55: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.