PANURIRANG JESAYA Bindu 46
Bindu 46
Tarboan do angka ganaganaan ni Babel 1-2.
Apoapo tu haburjuon maradophon Jahowa dohot lumbalumba maradophon pangoloion tu begu 3-7.
Sai paluaon ni Jahowa do bangsona 8-13.
I. 1Nunga manungki Bel, nunga jomba Nebo; tu binatang dohot tu pinahan dipampe angka ganaganaannasida, pola sorat nasida mangusung maradu magege. #Jer 50:2 2Rap tinggang jala manungki nasida, ndang tarpaluasa na niusungnasida i, gari nasida sandiri ingkon laho do tu habuangan.
II. 3Tangihon ma ahu ho ale pinompar ni si Jakkob dohot nasa pasipasi ni pinompar ni si Israel, angka na huompa sian bortian dope, angka na huabing sian hatutubuna. 4Sahat ro di hatutuamu sai tongtong do ahu, jala ro di * na ubanon sai ahu do mangusung hamu. Ahu do mambahensa na sai laon, ahu do mangompa, ahu do mangabing jala ahu paluahon nuaeng. #* Ps 71:18 5Tung tu ise ma pasumanonmu ahu, manang patudosonmu ahu, manang pasobohonmu ahu, paboa suman ahu tusi? #Jes 40:18, 44:9-20 6Dirunggirhon nasida do sere sia puntalan jala martimbangan nasida mandasing perak i; diupai nasida sada panopa, asa dibahen sian i sada debata, marsinggang tusi nasida bahen panombaannasida. 7Dipampe nasida ibana tu abara, diusung ibana jala dipajongjong tu hajongjonganna, gabe hot jongjong di hajongjonganna, ndang tarbahensa morot; * joujou pe manang ise tu ibana, ndang dialusi, jala ndang tarbahensa paluahon sian hagogotanna. #* 1Raj 18:27
III. 8Sai parateatehon hamu ma i jala pir ma tondimuna! Sai pasuang hamu ma rohamuna tu bagasan, hamu angka pangalaosi! 9Sai parateatehon hamu ma angka na masa na jolo sian mulamula, ai ahu do Debata, jala dungkon ni ahu ndang adong be Debata, manang na tudos tu ahu. #Jes 44:6, 8, 45:5 10Ahu palumbahon hian sian mulamula ujungna sogot, ahu marboaboa sian na robi na so masa dope; laos ahu mandok: Sai hot do sangkaphu jala bahenonku ma nasa lomo ni rohangku. #Ps 33:11; Poda 19:21; Jes 42:9; Heb 6:17 11Nunga hujou sada pidong raja wali sian habinsaran; sian tano na dao sada baoa na pasauthon sangkaphu. Nunga pola hudok, sai na paroonku do; nunga pola hurumang, sai na pasautonku do. #Jes 41:2, 25, 44:28 12Tangihon ma ahu hamu ale angka na tangkang marroha, hamu angka na holang sian hatigoran. 13Nunga pola hupajonok hatigoranku, ndang be mandaodao, jala ndang marbenda hatuaonku, jala lehononku do di Sion hatuaon, jala hamuliaonku di Israel.
Currently Selected:
PANURIRANG JESAYA Bindu 46: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.