PANURIRANG JESAYA Bindu 21
Bindu 21
Hasogiron angka na masa di hatataban ni Babel 1-10.
Panurirangon dompak Duma 11-12.
Dompak Arab 13-17.
I. 1Uhum madabu tu halongonan martopihon laut. Songon pansedai ni habahaba di dangsina, harorona sian halongonan sian luat na sogir. #Jes 13:14 2Sada pangungkapon na dokdok dipapatar tu ahu: Mandobo pandobo i, martaban partaban i! Nangkok ma ho, ale Elam! Manosak ma ho, ale Madai! Pasohotonku ma sude hoihoi. 3Dibahen i gok haberniton do angka gontingku, mangae do ahu, songon pangae ni boruboru na naeng mangintubu; mangirput ahu umbegesa, angka hitir ahu marnidasa. 4Bukbak ateatengku, pola angka hitir ahu sian songgotna, borngin hariburonku gabe jeangku dibahen. 5Pinadiri ma sada meja, marhal ma parhali, mangan minum ma! Hehe ma hamu angka raja, hapuri hamu ma lombulombu. 6Ai songon on didok Tuhan i mandok ahu: Laho ma ho, dokkon ma parhal, asa dipaboa na niidana. 7Jadi diida ma sahoron baoa parsihundul marduadua, sahoron halode, sahoron unto, mansai tangkas situtu ma ibana mananginangi. 8Dung i joujou ibana songon singa: Sai * jongjong di parhalan do ahu ale Tuhan manipat ari, jala sai tindang di gansingku do ahu manipat borngin. #* Hab 2:1 9Jadi ida ma, ro do sahoron baoa, parsihundul marduadua, na mangalusi, mandok: * Nunga tartaban, nunga tartaban Babel; jala nunga diparumpak sude angka ajiajian pinardebatanasida i. #* Jer 52:8; Pgk 14:8, 18:2 10Oe ho na hudegedege, jala anak ni pardegeanku naung hubege sian Jahowa Zebaot, Debata ni Israel, i do na hubaritahon tu hamu.
II. 11Uhum madabu tu * Duma: Joujou do sian + Seir tu Ahu: Ale parjaga, nunga beha borngin i? Ale parjaga, nunga beha borngin i? #* 1Mus 25:11; Jer 49:7; + 5Mus 2:5 12Ninna parjaga i ma: Nunga torang ari, huhut dope borngin. Molo sapala manangkasi hamu, tangkasi hamu ma, dung i mulak ma hamu tuson.
III. 13Uhum madabu tu Arab: Di bagasan tombak ni Arab ma marmalam hamu, ale angka partigatiga pansar sian halak Dedan i. #1Mus 25:3 14Jumpangkon hamu aek tu na mauas, hamu isi ni luat Tema! Tomutomuhon hamu ma roti tu halak na maporus i. #Jer 25:23 15Ai maradophon angka podangnasida maporus, maradophon podang na sinintak, dohot maradophon sior na tinangging, dohot maradophon parmusuon na sobu. 16Ai songon on didok Tuhan i tu ahu: Di bagasan sataon dope, * songon angka taon ni anak gajian, pesan ma sandok hamuliaon ni + Kedar. #* Jes 16:14; + Jer 49:28 17Jala lam tu otikna di bilangan ni pasipasi ni angka pande manior, angka anak na begu sian Kedar, ai Jahowa, Debata ni Israel mandok songon i.
Currently Selected:
PANURIRANG JESAYA Bindu 21: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.