HEBER Bindu 13
Bindu 13
Angka sipaingot 1-21.
Hata parujungan 22-25.
I. 1Manongtong ma holong ni roha di dongan! #Joh 18:34; 2Ptr 1:7 2Unang halanggushon hamu partamueon; ai marhite sian i hea do ditamuei halak angka surusuruan, so pamotoanna. #1Mus 18:3, 19:2-3; Rom 12:13; 1Ptr 4:9 3Ingot hamu ma angka na tarhurung, songon na rap tarhurung; songon i angka na tumaon na porsuk, ai dohot do hamu di bagasan daging. #Mat 25:36 4Sangap ma pardongansaripeon di na saluhut, jala unang ramun parsaoran pardongansaripeon; ai uhumon ni Debata do angka parmainan dohot pangalangkup. #Gal 5:19, 21; Eps 5:5 5Unang ma marholong ni roha di hepeng pangalahomuna; hasabamhon hamu ma na adong! Ibana sandiri do mandok: “Sandok na so tadingkononku do ho; sandok na so pasombuonku do ho!” #Jes 1:5; 1Tim 6:6 6Asa tung pos rohanta mandok: Tuhan i do pangurupi di ahu, ndang mabiar ahu; aha ma bahenon ni jolma tu ahu? #Ps 118:6 7Ingot hamu ma angka na manguluhon hamu, na paboahon hata ni Debata tu hamu; ujung ni pardalanannasida ma bereng hamu, jala tiru hamu ma haporseaonnasida! #1Kor 4:16; Heb 13:17 8Ia Jesus Kristus, songon i nantoari, songon i sadari on, laos i do ro di salelenglelengna! #1Kor 3:11; Pgk 1:17 9Unang ma olo hamu elaelaon ni poda na ragam jala na lain! Ai patut do marhitehite asi ni roha gabe togu roha, ndada marhitehite parpanganon, na so marguna di angka na mangaradotisa. #Rom 14:17; 2Kor 1:21; Eps 4:14 10Adong do di hita langgatan; ndang marhuaso manganhon sian i angka na marhalado di undungundung i. #Heb 8:4-5 11Ai dibalian ni parsaroan i do ditutung sibuk ni angka dorbia, dung diboan sintua ni malim mudar i tu bagasan bilut na badia, ala ni dosa. #3Mus 16:27 12Songon i do nang Jesus: Dibalian ni harbangan i do Ibana marsitaonon, asa diparbadiai bangso i marhitehite mudarna sandiri. #Mat 21:39; Joh 9:22 13Dibahen i, tadapothon ma Ibana tu balian ni parsaroan i, mamorsan haleaonna i! #Heb 11:26, 12:2 14Ai ndang adong di hita dison huta na hot; alai dilului rohanta do na ro sogot. #Heb 11:10, 12:22 15Marhitehite Ibana ma tapelehon tongtong tu Debata pelean pujipujian, i ma parbue ni bibir, angka na marhatopothon Goarna. #Ps 50:14, 23; Hos 14:3 16Alai unang ma lupa hamu, mambahen na denggan dohot mangulahon asi ni roha; ai dihalomohon Debata do angka pelean na songon i. #Plp 4:18 17Tangihon hamu ma angka na manguluhon hamu jala oloi hamu ma nasida! Ai nasida do manjagai tondimuna, laos nasida do maralus sogot; naeng ma marlas ni roha nasida disi, unang mardongan hoihoi, ai ndang ulimuna i. #Hes 3:18; 1Tes 5:12 18Tangiangkon hamu ma hami! Ai pos do rohanami, na so pola solsolan ni panggora ni roha i hami, ala huringkoti hami marparange na denggan di na saluhut. #2Kor 1:12 19Alai lam huapoi ma hamu mangulahon i, asa anggiat tumibu ahu dipatongon muse tu hamu. 20Alai Debata Sipardame i, na manogihon sian angka na mate Siparmahan bolon ni angka birubiru i, marhitehite mudar ni padan sisalelenglelengna i, i ma Tuhanta Jesus; #Joh 10:12; 1Ptr 2:25 21Ibana ma patauhon hamu di nasa ulaon na denggan, mangulahon lomo ni rohana, ai dipatupa do di bagasan hamu na tau lomo ni rohana marhitehite Jesus Kristus! Di Ibana ma hasangapon i ro di salelenglelengna! Amen.
II. 22Alai huapoi ma hamu, angka dongan, jangkon hamu ma si paingot i; ai jempek do husurathon tu hamu. 23Boto hamu ma, naung malua donganta, si Timoteus. Anggo tibu ibana ro, naeng rap hami marnida hamu. 24Dok hamu ma tabi tu saluhut gurumuna, nang tu angka na badia saluhutna! Manongos tabi do tu hamu angka dongan na sian Italia. 25Didongani asi ni roha i ma hamu saluhutna!
Currently Selected:
HEBER Bindu 13: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.