ESRA Bindu 1
Bindu 1
Si Sirus raja sian Persia mangaloas halak Juda mulak sian Babel dohot paulihon bagas joro 1-4.
Hamumulak ni deba halak Juda. Si Sirus paulakkon angka ulaula na badia i 5-11.
I. 1Di taon parjolo hinarajahon ni si Sirus, raja sian Persia, asa pasintongkon hata ni Jahowa marhite sian pamangan ni si Jeremia, disunggul Jahowa ma tondi ni si Sirus, raja sian Persia, asa disuru martingting tu sandok gomgomanna, pola mardongan surat mandok: #2Kron 36:22-23; Jer 25:11, 29:10 2Songon on do hata ni si Sirus, raja sian Persia: Nunga sahat tu ahu saluhut harajaon di tano on, dilehon Jahowa, Debata di surgo, jala Ibana marsuru ahu pajongjong di Ibana sada joro di Jerusalem, na di tano Juda. #Jes 41:25, 44:28, 45:1 3Manang ise sian hamu, sian sandok bangsona i, sai didongani Debatana ma ibana, asa nangkok tu Jerusalem, na di tano Juda, asa dipajongjong joro ni Jahowa, Debata ni Israel, Ibana do Debata na mian di Jerusalem. #Jos 1:17; Dan 6:26 4Jala manang ise na tinggal dope di saluhut inganan paisolatanna i, songon halak dagang, ingkon tolongon ni angka baoa donganna sahuta ibana marhite sian perak, sere, sinamot dohot pinahan, angkup ni silehonlehon sian lomo ni rohana tu joro ni Debata, na di Jerusalem. #2Mus 35:21, 29; Esr 8:28; Neh 1:2-3; Hag 2:3
II. 5Jadi hehe ma angka induk sian Juda dohot Benjamin marompuompu, ro di angka malim dohot halak Lepi, sude tahe angka na sinunggul ni Debata tondina i laho nangkok, asa pajongjong joro ni Jahowa, na di Jerusalem. #2Kron 11:12, 36:22; Hag 1:14 6Dung i luhut jolma angka na humaliang nasida margogoihon tangannasida marhite sian angka ulaula perak dohot sere, tole sinamot dohot pinahan dohot arta angka na arga, so padohot saluhut silehonlehon tu joro sian lomo ni rohana. #Esr 1:4; Neh 2:18 7Diparuar raja Sirus huhut ulaula ni joro ni Jahowa, angka naung binoan ni si Nebukadnesar sian Jerusalem, jala naung binahenna tu bagasan joro ni debatana. #2Raj 25:14-17; 2Kron 36:7, 18; Jer 52:18-19; Dan 1:2, 5:2 8Jadi didokkon si Sirus, raja sian Persia, paruaron ni si Mistredat, siramoti arta angka i, jala bilanganna angka i tu si Sesbasar, induk ni halak Juda. #Esr 2:2, 63, 3:8, 5:14, 16 9Jala on do bilanganna: Angka saoan sere tolupulu, angka saoan perak saribu, angka raut duapulu sia. 10Angka panginuman sere tolupulu angka panginuman perak paidua opat ratus sampulu, ulaula angka na asing saribu. #1Kron 28:17; Esr 8:27 11Luhut angka ulaula sere dohot perak lima ribu opat ratus do. Luhutna i diboan si Sesbasar nangkok manguluhon angka na tarbuang sian Babel tu Jerusalem. #Jer 27:21-22
Currently Selected:
ESRA Bindu 1: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.