2 MUSA Bindu 24
Bindu 24
Parpadanan ni Jahowa tu Israel 1-8.
Diida angka sintua ni Israel do Debata 9-11.
Diulahi si Musa nangkok tu dolok i, jala opatpulu borngin lelengna disi 12-18.
I. 1Dung i didok Jahowa ma tu si Musa: Nangkok ma hamu mandapothon Jahowa, ho dohot si Aron, Nadab dohot Abihu, ro di na pitupulu halak sintua ni Israel, mandaodao ma hamu marsomba Ahu. #4Mus 11:16 2Sasada si Musa pe jumonok mandapothon Jahowa, alai anggo nasida ndang jadi jumonok, bangso i pe ndang jadi nangkok rap dohot ibana. 3Dung i ro ma si Musa, jala dipajojor tu bangso i saluhut hata ni Jahowa dohot sude angka uhum. Jadi sahata ma sandok bangso i mangalusi, didok nasida ma: Sude hata angka na pinaboa ni Jahowa, sai bahenonnami do. #2Mus 19:8 4Jadi disurathon si Musa ma sude hata ni Jahowa, jala dipasogot manogotna i, dipauli ma sada langgatan di bona ni dolok i dohot sampuludua tiang parningotan marguru sian na sampuludua marga ni Israel. #2Mus 34:27; 1Raj 18:31 5Dung i disuru ma angka dolidoli sian halak Israel, asa dipelehon nasida angka pelean situtungon dohot mamotongi lombu bahen angka pelean hamauliateon di Jahowa. 6Dung i dibuat si Musa ma mudar i satonga, jala dibahen tu bagasan angka saoan; alai anggo mudar na satonganari, tu langgatan i do dipispishon. 7Dung i dibuat ma pustaha parpadanan i, jala dijaha tu pinggol ni natorop i. Jadi didok nasida ma: Sude na nidok ni Jahowa, sai bahenonnami do, jala tangihononnami do. #2Mus 24:4 8Dung i dibuat si Musa ma mudar i, jala dipispishon tu na torop i, jala ninna ma: Ida ma, on ma mudar ni parpadanan i, naung pinahot ni Jahowa tu hamu ala saluhut hata ondeng. #Heb 9:19 ud.
II. 9Jadi nangkok ma si Musa dohot si Aron, si Nadab dohot Abihu ro di na pitupulu sintua ni halak Israel i. 10Jadi diida nasida ma Debata ni Israel; ia sidegean ni patna, songon mata intan na rata riongna, jala songon rupa ni langit jumpa puasa bintang. #2Mus 33:20, 23; Hes 1:26 11Jala ndang disurdukkon tanganna mangkahua angka sintua ni halak Israel. Jadi dung diida nasida Debata mangan dohot minum ma nasida. #2Mus 33:22; Jes 6:5
III. 12Dung i ninna Jahowa ma tu si Musa: Nangkok ma ho mandapothon Ahu tu dolok on, disi ma ho, asa hulehon tu ho angka batu na marsurat dohot patik ro di uhum, angka naung husurati, sipodahononmu tu nasida. #2Mus 32:15 13Jadi hehe ma si Musa dohot si Josua parhaladona i, gabe nangkok ma si Musa tu dolok ni Debata. 14Jala didok ma tu angka sintua i: Tading dison ma anggo hamu, paima mulak hami tu hamu. Antong si Aron dohot si Hur do di lambungmuna on; manang ise na marparkaro, tu nasida ma diboan. 15Jadi dung sahat si Musa tu punsu ni dolok i, gabe dihungkupi ombun i ma dolok i. 16Jadi mangulon ma hamuliaon ni Jahowa di punsu ni dolok Sinai, jala dihungkupi ombun i dolok i onom ari lelengna; tole papituarihon dijou ma si Musa sian bagasan ni ombun i. #2Mus 16:10 17Jala songon api na marjilam rupa ni hamuliaon ni Jahowa di punsu ni dolok i, diida halak Israel. #5Mus 4:24, 9:3; Heb 12:29 18Jadi masuk ma si Musa tu bagasan ombun i laho nangkok tu dolok i gabe didolok i ma si Musa opatpulu ari opatpulu borngin lelengna. #2Mus 34:28; Mat 4:2
Currently Selected:
2 MUSA Bindu 24: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.