EPESUS Bindu 6
Bindu 6
Siparangehonon ni anak, ama, anak somang dohot induk 1-9.
Taringot tu sinjata ni halak Kristen 10-20.
Hata parujungan 21-24.
I. 1Hamu angka anak, oloi hamu ma angka natuatuamuna di bagasan Tuhan i; ai i do na tigor. #Kol 3:20 2“Parsangapi amangmu dohot inangmu!” I do patik na parjolo mardongan bagabaga: #2Mus 20:12 3“Asa martua ho jala leleng mangolu di tano on!” #5Mus 5:10 4Hamu angka ama, unang gintali hamu angka anakkonmuna; pagodanggodang hamu ma nasida di bagasan ajar dohot poda ni Tuhan i! #5Mus 6:7; Ps 78:4; Poda 19:18; Kol 3:21 5Hamu angka anak somang, oloi hamu ma angka indukmuna di hasiangan on mardongan biar dohot lomos ni roha; marroha na bulus songon na maradophon Kristus! #Tit 2:9-10; 1Ptr 2:18 6Unang hamu pangoloi di mata, songon na mambuat roha ni jolma; songon naposo ni Kristus ma ulahon hamu roha ni Debata, sian nasa rohamuna. 7Sian burjumuna ma hamu mangoloi: Songon di Tuhan i, unang di jolma i! 8Ai diboto hamu do: Sumuang jaloon ni ganup sian Tuhan i na denggan na niulana, manang hatoban ibana manang anak mata. #2Kor 5:10 9Hamu angka induk pe, laos songon i ma bahen hamu tu nasida; antahi hamu ma na mangasupi i, ai diboto hamu do, di banua ginjang do nang Tuhanmuna, jala ndada siida bohi Ibana. #Ul 10:34; Kol 4:1
II. 10Dungkon ni i, gabe togu ma rohamuna di bagasan Tuhan i dohot di bagasan hagogoonna na togu i! #1Kor 16:13; 1Joh 2:14 11Solukkon hamu ma pangkean sinjata na sian Debata, asa taralo hamu utiutian ni sibolis i. #2Kor 10:4 12Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i. #Joh 14:30; Eps 2:2 13Dibahen i, jalo hamu ma pangkean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude. 14Antong, jongjong ma hamu, marhohoshon hasintongan di gontingmuna, angka naung manolukkon bajubaju partahanan, i ma hatigoran i. #Luk 12:35; 1Tes 5:8; 1Ptr 1:13 15Marsipatu ma patmuna, laho mangkaringgashon barita na uli, pardamean i. #Mrk 6:9 16Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i. #1Ptr 5:9; 1Joh 5:4 17Jangkon hamu ma nang tahuluk haluaon dohot podang ni tondi, i ma hata ni Debata. #1Tes 5:8; Heb 4:12 18Martangiang ma hamu, mardongan sandok pangidoan dohot elehelek di bagasan Tondi, manang sadihari pe, huhut dungo jala jugul tongtong, tumangiangkon saluhut angka na badia, #Mat 26:41 19nang ahu pe, asa dibungka pamanganku, mandok sidohononku, laho pabotohon hahomion ni barita na uli, mardongan hiras ni roha. #Ul 4:29; Kol 4:3; 2Tes 3:1 20Ai tusi do disuru ahu na tarrante on, asa marhiras ni roha ahu disi, mangkatahonsa songon na tama. #2Kor 5:20
III. 21Alai paboaon ni si Tikikus do tu hamu saluhutna i, asa diboto hamu na masa di ahu, ro di ulaonku; ai ibana do dongan na hinaholongan jala parhobas haposan di bagasan Tuhan i. #Ul 20:4; 2Tim 4:12 22Ala ni i do husuru ibana mandapothon hamu, asa dapot botoonmuna na masa di hami, jala asa diapuli rohamuna. 23Dame ma di angka dongan, dohot holong ni roha raphon haporseaon sian Debata Ama i, nang sian Tuhan Jesus Kristus i! #Kol 4:7-8 24Asi ni roha i ma mandongani saluhut, angka na marsihohot mangkaholongi Tuhanta Jesus Kristus!
Currently Selected:
EPESUS Bindu 6: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.