EPESUS Bindu 1
Bindu 1
Tabi ni apostel i 1-2.
Ragam ni pasupasu na marhite sian Kristus 3-14.
Kristus na hehe sian hamatean, I do ulu ni huria i 15-23.
I. 1Ahu surat tinongos ni Paulus, apostel ni Kristus Jesus, sian lomo ni roha ni Debata, mandapothon angka na badia na di Epesus, angka na porsea di Kristus Jesus: #Rom 1:7; 1Kor 1:2 2Asi ni roha ma di hamu dohot dame sian Debata Amanta, nang sian Tuhan Jesus Kristus i!
II. 3Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus. #Eps 2:6 4Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanna i, di bagasan holong ni roha. #Joh 15:16; 2Tim 1:9 5Ditodo hian do hita bahen anakna, marhitehite Jesus Kristus, asa tu Ibana, mangihuthon halomoan ni rohana, #Joh 1:12 6asa tarpuji asi ni rohana na marmulia i, na niasihonna tu hita di bagasan na Hinaholonganna i. #Mat 3:17 7Di bagasan Ibana dapot hita haluaon i, binahen ni mudarna i, i ma hasesaan ni angka pangalaosion, mangihuthon asi ni rohana na tarlobi i, #Eps 2:7, 18, 3:8, 16; Kol 1:14 8naung buas niusehonna i tu hita mardongan hapistaran dohot habisuhon godang. 9Ai dipabotohon Ibana do tu hita tahi ni rohana, na buni hian mangihuthon halolomona, naung pinahotna i di bagasan dirina, #Rom 16:25; Eps 3:9 10laho pasauthonsa di hagogok ni tingkina, mandok: Pasadahon di bagasan Kristus i sasudena, na di banua ginjang dohot na diatas tano on. #Gal 4:4 11Ai di bagasan Ibana do dapotan partalian hita, angka naung tinodona hian, marguru tu tahi ni na patulushon sasude, mangihuthon pandok ni rohana, #Rom 8:28; Kol 1:12 12asa tarpuji hasangaponna marhitehite hita, angka naung mangkirim hian di Kristus i. 13Di bagasan Ibana dohot hamu umbege hata hasintongan i, i ma barita na uli na taringot tu haluaonmuna, jala di bagasan Ibana gabe porsea hamu, laos disahaphon do tu hamu Tondi Parbadia na pinarbagabaga i. #Eps 4:30 14Ibana do patujolo ni arta siteanonta, bahen haluaon ni na hinophopna i, asa tarpuji hasangaponna i. #2Kor 1:22, 5:5
III. 15Asa ahu pe, dung hubege, naung porsea hamu di Tuhan Jesus jala holong rohamuna di saluhut angka na badia, #Kol 1:4, 9 16ndang mansadi ahu mandok mauliate siala hamu, marningot hamu, di na martangiang ahu: 17Anggiat dilehon Debata ni Tuhanta Jesus Kristus, Ama ni hasangapon i, tu hamu Tondi hapistaran dohot pangungkapon mananda Ibana. 18Dipatiur ma mata ni rohamuna, asa diboto hamu rumang ni arta sihirimon sian panjouonna i ro di surung ni hasangapon, siteanon ni angka na badia i. 19Asa ditanda hamu nang hagogok ni gogona na sumurung i na tu hita, angka na porsea sian pangkorhon ni hagogoonna na marmulia i. 20Ai di Kristus do i diulahon Debata, di na pinahehena i Ibana sian na mate jala pinahundulna i tu siamunna di bagasan banua ginjang i, #Ps 110:1 21tu ginjang ni nasa harajaon dohot huaso, nang hagogoon dohot hamuliaon, nang tu ginjang ni nasa goar na tarhatahon, ndada holan di hasiangan on, dohot do di na ro sogot. #Kol 2:10 22Saluhutna do dipatunduk tutoru ni patna, jala dipabangkit do Ibana, na mangatasi sasude, gabe ulu ni huria i. #Ps 8:7; Mat 28:18; Eps 4:15 23I do pamatangna na manggohi Ibana, asa gohanna sasude di bagasan saluhutna. #Rom 12:5; 1Kor 12:27; Eps 4:10
Currently Selected:
EPESUS Bindu 1: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.