PARJAMITA SIAN SI SALOMO Bindu 1
Bindu 1
Hata pangarimpunan ni buku i: Ndang adong na hot tongtong, na laho salpu do luhutna 2-3.
Mimbarimbar do luhut na tinompa 4-11.
Parbinotoan ni jolma pe ndang hot 12-18.
1On ma pangkataion ni parjamita, anak ni si Daud, raja di Jerusalem.
I. 2Tung na laho salpu do luhutna, ninna parjamita i, alogo sambing do tutu luhutna i! #Ps 62:10 3Tung aha ma na hot tinggal di jolma i sian saluhut hangalutonna, na hinangaluthonna saleleng di hasiangan on? #Pjm 2:22
II. 4Marlaho ro angka jolma i marsundutsundut, alai hot do anggo tano on ro di salelenglelengna. #Ps 90:3, 104:5 5Binsar ia mata ni ari jala sundut muse tumopot ingananna hian, pola marheahea binsar muse di habinsaranna hian. 6Alogo i pe mangombus do dompak dangsina, husor muse dompak utara, sai songon i didatdati munsatunsat, jala mulahulak tu hamunsatanna hian alogo i. 7Luhut angka batang aek marmuara tu laut, hape matua so binsat laut i; ai matua tu parmuaranna hian sai didatdati angka batang aek i mardalan. 8Luhut hatahata * marhangaluton do, tung na so tarhatahon jolma do i. + Mata i ndang olo marnasombu marnida, jala pinggol i ndang olo marnamahap marbinege. #* Ps 90:10; + Poda 27:20 9Manang aha naung dung masa na jolo, laos i do na masa sogot; jala manang aha naung pinatupa ni halak na jolo, laos i do patupaonna nang sogot; tung na so adong do surasuraon na so dung hea masa di hasiangan on. #Pjm 3:15 10Tung adong ma nanggo sada tardok halak: Ida ma, na so dung hea do anggo on masa? Hape tibu hian do i masa di tingki na robi angka na jumolo sian hita. 11Ndang adong be parningotan di angka naung salpu i, suang le songon i di angka na ro sian pudina, ndang tagamon adong parningotanna di pinompar na ro sogot.
III. 12Ahu parjamita i bangkit raja na jolo gumomgom Israel di Jerusalem. #Pjm 1:1 13Jala diringkoti rohangku do nian manulingkiti dohot mangarisik mardongan hapistaran saluhut angka na tarjadi di hasiangan on. Hape ulaon hangaluton do i na tinurpukkon ni Debata tu jolma manisia, asa marhangaluton marhite sian angka i. #1Raj 5:9-14 14Nunga huida saluhut jadijadian angka na tarjadi di hasiangan on, gabe ida ma, saluhutna i na laho salpu do, jala pangeahion di alogo sambing do i. 15Na bengkuk hian * ndang tarbahen gabe tigor, jala ndang dapot bilangan na so disi. #* Pjm 7:13 16Nunga pola didok rohangku di bagasan songon on: Ida ma, nunga nian hupagodang jala huambai hapistaran di ahu lobi sian di saluhut jolma angka na jumolo sian ahu di Jerusalem, jala godang situtu hapistaran dohot parbinotoan diida rohangku. #1Raj 3:12; Pjm 2:9 17Alai dung diringkoti rohangku naeng botoon mangarisik hapistaran dohot parbinotoan, habodoon dohot habobangon, gabe mamoto rohangku, mangeahi alogo sambing do iba hape nang disi. #Pjm 2:12, 7:25 18Ai molo ganda hapistaran, ganda ma dohot hajepolon, jala manang ise na patamba parbinotoan, patamba hangaluton ibana disi.
Currently Selected:
PARJAMITA SIAN SI SALOMO Bindu 1: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.