5 MUSA Bindu 23
Bindu 23
Halak na so jadi masuk tu huria ni Jahowa 1-9.
Ingkon pansing do bahenon parsaroan i 10-15.
Angka patik marragamragam 16-26.
I. 1Ndang jadi pagodangon ni manang ise jolma ni amana, ala naung sampur amana i tu nasida. #3Mus 18:8 2Ianggo halak na tarlisat, manang na pinaias ndang jadi masuk tu huria ni Jahowa. 3Anak gampang pe ndang jadi masuk tu huria ni Jahowa; nang sundut na pasampuluhon ndang jadi masuk tu huria ni Jahowa. 4Halak Amon pe manang Moab ndang jadi masuk tu huria ni Jahowa, nang sundut na pasampuluhon ndang jadi masuk sian nasida tu huria ni Jahowa ro di saleleng lelengna. 5Ala so ditomutomuhon nasida tu hamu sagusagu manang aek di dalan, uju ruar hamu sian Misir, lam diupai tahe mangalo hamu si Bileam, anak ni si Beor sian Petor di Padang Ram, asa buraanna hamu. #4Mus 22:5-6 6Alai ndang olo Jahowa Debatam manolopi hata ni si Bileam, lam dipabalik Jahowa, Debatam bura i gabe pasupasu di ho, ala holong roha ni Jahowa, Debatam mida ho. 7Ndang jadi luluanmu hadameonnasida manang hasonanganna saleleng ho mangolu ro di salelenglelengna. 8Ndang jadi marbiasbias roham anggo mida halak Edom, ai haham do ibana; ndang jadi marbiasbias roham nang mida halak Misir, ai halak dagang do ho na jolo di tanona. #1Mus 25:25-26 9Pinomparnasida na tubu patolusunduthon, jadi do i masuk tu huria ni Jahowa.
II. 10Molo borhat ho tu parporangan laho mangalo dompak musum, ingkon ramotanmu dirim maradophon nasa hajahaton. 11Tung sura adong di tongatongamu sahalak na ramun, ala bolong bonina bornginna i, ingkon ruar ibana tu balian ni parsaroan, jala ndang jadi ulahanna masuk tu parsaroan i. #3Mus 15:16, 18 12Ia dung marhira bodari ingkon didionna dagingna di bagasan aek, ia dung mate mata ni ari, jadi ma ibana masuk tu parsaroan i. 13Ingkon adong huhut di ho di balian ni parsaroan sada inganan sitopotonmu laho haduru. 14Angkup ni angka sinjatam ingkon adong di ho sada siuksiuk, asa ia laho ho haduru ingkon pangkeonmu do i mangkali godunggodung, jala hungkupanmu muse ginagatmu. 15Ai Jahowa, Debatam mardalandalan di tongatonga ni parsaroanmu laho paluahon ho sian parmaraan laho pasahathon anggo musum tu ho. Dibahen i ingkon badia do parsaroanmu, asa unang adong idaonna di tongatongami tau haurahon, asa unang manginsurut Ibana sian lambungmu. #3Mus 26:12
III. 16Ndang jadi pasahatonmu sada hatoban mulak tu tangan ni indukna, dung sapala maporus ibana tu ho tumadingkon indukna. 17Pasombu ibana maringan di lambungmu di tongatongamu, di inganan pinillitna i di bagasan sada sian angka hutam, marguru tu lomo ni rohana, ndang jadi rupaonmu ibana. #2Mus 22:20 18Ndang jadi adong sian boru ni halak Israel na pasahathon dirina mangulahon parmainanon, jala ndang jadi adong anak ni halak Israel na pasahathon dirina mangulahon parmainanon. #3Mus 19:29; 1Raj 14:24; Rom 1:27 19Ndang jadi boanonmu upa parmainanon, manang hepeng tuhor ni sada biang masuk tu joro ni Jahowa, Debatam bahen garar ni bagabaga manang dia; ai marbiasbias do roha ni Jahowa, Debatam mida duansa. #3Mus 18:22; Pgk 22:15 20Ndang jadi jaloonmu bunga sian donganmu, manang bunga ni hepeng, manang bunga ni sipanganon, manang bunga ni ugasan dia pe, na somal marbunga dibahen halak. #2Mus 22:24; 3Mus 25:36; Neh 5:7, 11; Ps 15:5; Luk 6:36 21Anggo sian halak sileban jadi do jaloonmu bunga, alai anggo tu donganmu ndang jadi bahenonmu marbunga manang aha, asa pasupasuon ni Jahowa Debatam ho di saluhut na jinama ni tanganmu, di tano sitopotonmi bahen partalianmu. 22Tung sura naung marbagabaga, ho tu Jahowa, Debatam, ndang jadi ho marlemba manggararsa; ai sai na tungguon ni Jahowa, Debatam do i sian ho, jala gabe dosa do i di ho, tung sura. #4Mus 30:3; Ps 50:14 23Alai tung sura unang nian ho marbagabaga ndang dosa i di ho. 24Alai anggo hata naung puas sian pamanganmu, ingkon ingotonmu do i jala ulahononmu, songon naung pinorbagabagam tu Jahowa, Debatam sian lomo ni roham, pola naung pamanganmu marbagabagahon. 25Molo masuk ho tu bagasan porlak anggur ni donganmu, jadi do panganonmu parbue ni anggur guru sombu ni roham, maradu mahap ho; alai ndang jadi bahenonmu tu hadanghadanganmu nanggo sada. 26Molo mamolus ho sian hauma ni donganmu sigotilon, jadi do gotilonmu biurna dohot tanganmu, alai ndang jadi pola sabihononmu sasabim tu hauma ni donganmu. #Mat 12:1
Currently Selected:
5 MUSA Bindu 23: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.